ഉള്ളുതുറന്നു ചിരിക്കാന്‍ കഴിയാത്ത നിങ്ങളാണ് കേരളത്തിന്റെ ശാപമെന്ന് കോണ്‍ഗ്രസ് ഐ .ടി . സെല്‍ മേധാവി ഡോ. പി. സരിന്‍.ഫെയ്‌സ്ബുക്കിലൂടെയാണ് അദ്ദേഹത്തിന്റെ പ്രതിരകരണം.ഉമ്മന്‍ചാണ്ടി വിട്ട പോയതിന് പിന്നാലെയാണ് അദ്ദേഹം വൈകാരികമായി പ്രതികരിച്ചകത്.താങ്കള്‍ ദയനീയമായി തോറ്റു പോയിരിക്കുന്നു. 70കള്‍ മുതല്‍ കൊന്നും കൊലവിളിച്ചും അധിക്ഷേപിച്ചും ‘നേടി’ എന്ന് താങ്കള്‍ വിചാരിക്കുന്നതൊക്കെയും പൊളിച്ചു പുരപ്പുറത്തു കയറ്റിയാണ് സാറ് പോയത് സരിന്‍ കുറിപ്പില്‍ പറയുന്നു.

കുറിപ്പിന്റെ പൂര്‍ണ്ണരൂപം

ശ്രീ പിണറായി വിജയന്‍,

താങ്കള്‍ ദയനീയമായി തോറ്റു പോയിരിക്കുന്നു. 70കള്‍ മുതല്‍ കൊന്നും കൊലവിളിച്ചും അധിക്ഷേപിച്ചും ‘നേടി’ എന്ന് താങ്കള്‍ വിചാരിക്കുന്നതൊക്കെയും പൊളിച്ചു പുരപ്പുറത്തു കയറ്റിയാണ് സാറ് പോയത്.

വിദ്വേഷ പ്രചാരണങ്ങള്‍ക്ക് നിങ്ങള്‍ തിരഞ്ഞെടുത്തവര്‍ തന്നെ മന:സ്താപം കൊണ്ട് കേരളത്തോട് മാപ്പ് പറയുകയാണ്. കല്ലെറിഞ്ഞ കൈകളോട്, കുത്തി നോവിച്ച മനസ്സുകളോട് ക്ഷമിക്കാനേ സാറിനറിയൂ; സാറിന്റെ നിഴലില്‍ ചവിട്ടി നടക്കുന്ന ഞങ്ങള്‍ കോണ്‍ഗ്രസ്സുകാര്‍ക്കും ആ ക്ഷമയുണ്ടാകും.

പക്ഷേ , ഇന്നാട്ടിലെ മനുഷ്യരില്‍ പലരെയും നുണകള്‍ സൃഷ്ടിച്ച് വെറുപ്പിന്റെ പ്രചാരകരാക്കി വളര്‍ത്തിയ നിങ്ങളോട് ഒരിക്കലും രാഷ്ട്രീയ കേരളം ക്ഷമിക്കുകയില്ല. ഇന്ന് കേരളം കണ്ടു കൊണ്ടിരിക്കുന്ന എല്ലാവിധ വിധ്വംസക പ്രവര്‍ത്തനങ്ങളുടെയും പിന്നില്‍ നിങ്ങളാണ്.നിങ്ങളൊരാള്‍.

വിശ്വസിക്കാന്‍ കൊള്ളാവുന്ന പല മനുഷ്യരുമുണ്ടായിരുന്ന ഒരു പ്രസ്ഥാനത്തെ സ്വന്തം ലാഭത്തിന് വേണ്ടി നിങ്ങള്‍ അടിമവല്‍ക്കരിച്ചു. നിങ്ങളെക്കാള്‍ ചങ്കുറപ്പോടെ ചുവന്ന കൊടി പിടിച്ച പല നേതാക്കളും സാറിന് മുന്നില്‍ വിതുമ്പുന്നത് ഞങ്ങള്‍ കണ്ടു. അവരോടും, ആ പ്രസ്ഥാനത്തില്‍ അവശേഷിക്കുന്ന നല്ല മനുഷ്യരോടുമുള്ള എല്ലാ സ്‌നേഹ-ബഹുമാനങ്ങളും നിലനിര്‍ത്തികൊണ്ട് തന്നെ പറയട്ടെ : ഉള്ളു തുറന്ന് ചിരിക്കാന്‍ അറിയാത്ത, മനസ്സ് തുറന്ന് ചിന്തിക്കാന്‍ കഴിയാത്ത നിങ്ങളൊരാളാണ് ഈ കേരളത്തിന്റെ ഇന്നത്തെ ശാപം.

സ്വാര്‍ത്ഥ താല്പര്യങ്ങള്‍ക്ക് വേണ്ടി നിങ്ങള്‍ വര്‍ഗ്ഗീയത പറയാതെ പറഞ്ഞും, ലഹരി സിരകളില്‍ പടര്‍ത്തിയും വിഷം കൊടുത്തു മയക്കികിടത്തി വളര്‍ത്തിയെടുത്ത കമ്മ്യൂണിസ്റ്റ് മൃഗങ്ങള്‍ പോലും, ആ KSRTC ബസ്സിന്റെ പുകയേറ്റ് ‘മനുഷ്യരാകുന്നു’. വെറുപ്പിനാല്‍ താങ്കളും കൂട്ടാളികളും ഉണ്ടാക്കിയെടുക്കുന്ന പ്രചാരണങ്ങള്‍ ഇനി കേരളത്തില്‍ വിലപ്പോകില്ല. ആരും നിങ്ങളെ വിശ്വസിക്കില്ല.

ജനം അവരുടെ യഥാര്‍ത്ഥ നാഥനെ തിരിച്ചറിഞ്ഞിരിക്കുന്നു. ആ മാന്ത്രിക മനുഷ്യനെ നെഞ്ചോട് ചേര്‍ത്തിരിക്കുന്നു.

സ്‌നേഹം കൊണ്ടയാള്‍ ലോകം ജയിച്ച കോണ്‍ഗ്രസ്സുകാരനാണ്.

വിട. കരുതലിന്റെ ഉടയോനേ, വിട.