ചെമ്പരിക്ക ഖാസി കേസ്: സി.ബി.ഐ മെഡിക്കല്‍ സംഘം തെളിവെടുപ്പിനെത്തി

കാസര്‍കോട്: ചെമ്പരിക്ക ഖാസി സി.എം അബ്ദുല്ല മൗലവിയുടെ ദുരൂഹമരണവുമായി ബന്ധപ്പെട്ട കേസില്‍ പുനരന്വേഷണത്തിന്റെ ഭാഗമായി സി.ബി.ഐ മെഡിക്കല്‍ ടീം കാസര്‍കോട്ടെത്തി തെളിവെടുപ്പ് നടത്തി. കേസ് അന്വേഷിക്കുന്ന സി.ബി.ഐ ഡിവൈ. എസ്.പി കെ.ജി ഡാര്‍വിന്റെ നേതൃത്വത്തില്‍ ഡോക്ടര്‍മാര്‍ അടങ്ങുന്ന പ്രത്യേക സംഘമാണ് ചെമ്പരിക്കയിലെത്തിയത്.
ശാസ്ത്രീയ അന്വേഷണം നടത്തണമെന്ന എറണാകുളം സിജെഎം കോടതിയുടെ നിര്‍ദ്ദേശ പ്രകാരമാണ് പുതുച്ചേരി ജിപ്പ്‌മെറിലെ(ജവഹര്‍ലാല്‍ ഇന്‍സ്റ്റിറ്റിയൂട്ട് ഓഫ് പോസ്റ്റ് ഗ്രാജുവേറ്റ് മെഡിക്കല്‍ എജ്യൂക്കേഷന്‍ ആന്റ് റിസേര്‍ച്ച്) ഡോക്ടര്‍മാരടങ്ങുന്ന സംഘം എത്തിയത്. ഇതു മൂന്നാം തവണയാണ് കേസില്‍ സി.ബി.ഐ അന്വേഷണം നടക്കുന്നത്. സൈക്കോളിജിക്കല്‍ ഓട്ടോപ്‌സി (ബന്ധുക്കളും സുഹൃത്തുക്കളും മറ്റ് അടുപ്പക്കാരുമായി സംസാരിച്ച് മരിച്ചയാളിന്റെ മനോനില മനസിലാക്കുന്ന രീതി)യുടെ ഭാഗമായാണ് സംഘം തെളിവെടുപ്പ് നടത്തിയത്. സംസ്ഥാനത്ത് ഈരീതിയില്‍ അന്വേഷണം നടത്തുന്ന ആദ്യ കേസാണിത്. ചെമ്പരിക്കയിലെ ഖാസി താമസിച്ചിരുന്ന വീട്ടിലെത്തിയ സംഘം ഭാര്യ, മകന്‍ ഉസ്മാന്‍, മറ്റൊരു മകനായ മുനീറിന്റെ ഭാര്യ, ഖാസിയുടെ അനിയന്‍ ഉബൈദ് എന്നിവരുമായി സംസാരിച്ചു. ഖാസി മരണപ്പെട്ട ദിവസം കടപ്പുറത്ത് രാത്രിയില്‍ കാറും ആള്‍ക്കാരുടെ ശബ്ദവും കേട്ടു എന്നു പറയുന്ന സ്ത്രീയുടെയും മൊഴിയും രേഖപ്പെടുത്തി. അന്വേഷണ സംഘത്തില്‍ ജിപ്‌മെര്‍ സൈക്യാട്രി ഡിപ്പാര്‍ട്ട്‌മെന്റ് അഡീഷണല്‍ പ്രൊഫസര്‍ ഡോ. വികാസ് മേനോന്‍, ഫോറന്‍സിക് മെഡിസിന്‍ പ്രൊഫ. ആന്റ് എച്ച്ഒഡി ഡോ. കുസകുമാര്‍ സാഹ, സൈക്യാട്രി പ്രൊഫസര്‍ ഡോ. മൗഷ്മി പുര്‍കായസ്ത, ക്ലിനിക്കല്‍ സൈക്കോളജിസ്റ്റ് കെ. അറിവഴകന്‍, സൈക്യാട്രി സോഷ്യല്‍ വര്‍ക്കര്‍ കെ. ഗ്രീഷ്മ എന്നിവര്‍ സംഘത്തിലുണ്ടായിരുന്നു. 2010 ഫെബ്രുവരി 15നാണ് സി.എം അബ്ദുല്ല മൗലവിയെ ചെമ്പരിക്ക കടപ്പുറത്ത് കടലില്‍ മരിച്ചനിലയില്‍ കാണപ്പെട്ടത്.

SHARE