കേരളത്തില്‍ ശക്തമായ കാറ്റിനും മഴക്കും സാധ്യത: ജാഗ്രതാ നിര്‍ദ്ദേശം നല്‍കി

തിരുവനന്തപുരം: കേരളത്തില്‍ ശക്തമായ കാറ്റിനും മഴയ്ക്കും സാധ്യതയെന്ന് റിപ്പോര്‍ട്ട്. 6 ജില്ലകളില്‍ അതീവ ജാഗ്രതാനിര്‍ദേശം പുറപ്പെടുവിച്ചു. കേരളമടക്കം 10 സംസ്ഥാനങ്ങളില്‍ ശക്തമായ കാറ്റിന് സാധ്യതയുണ്ടെന്ന് കേന്ദ്ര കാലാവസ്ഥാ നിരീക്ഷണ കേന്ദ്രമാണ് മുന്നറിയിപ്പ് നല്‍കിയത്.

രണ്ടു ദിവസത്തേക്കാണ് ജാഗ്രതാനിര്‍ദേശം. മഴക്കൊപ്പം ഇടിമിന്നലിനും സാധ്യതയുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ,കോട്ടയം, എറണാകുളം ജില്ലാ അധികൃതര്‍ക്ക് ദുരന്തനിവാരണഅതോറിട്ടി അതീവജാഗ്രതാനിര്‍ദേശം നല്‍കി.

മത്സ്യത്തൊഴിലാളികള്‍ കടലില്‍ പോകരുത്. അടിയന്തര ദുരിതാശ്വാസ പ്രവര്‍ത്തനങ്ങള്‍ക്ക് തയ്യാറായിരിക്കാന്‍ പൊലീസ്, വൈദ്യുതി ഉള്‍പ്പടെയുള്ള വകുപ്പുകള്‍ക്കും നിര്‍ദേശം നല്‍കി.