വിവാദ പ്രസ്താവനയില്‍ നിയമസഭ സ്പീക്കര്‍ എ.എന്‍ ഷംസീറിനെതിരായ എന്‍.എസ്.എസ് നിലപാടിനെ പിന്തുണച്ച് കെ.ബി ഗണേഷ് കുമാര്‍ എം.എല്‍.എ. ഷംസീറിനെതിരായ എന്‍എസ്എസ് നിലപാടിനൊപ്പമാണ് താനെന്ന് എന്‍.എസ്.എസ് ഡയറക്ടര്‍ ബോര്‍ഡ് അംഗം കൂടിയായ കെ ബി ഗണേഷ് കുമാര്‍ വ്യക്തമാക്കി. എന്‍.എസ്.എസ് എടുക്കുന്ന ഏത് തീരുമാനവും താന്‍ ഉള്‍പ്പെടെ മുഴുവന്‍ സമുദായ അംഗങ്ങളും അംഗീകരിക്കുമെന്നും ഗണേഷ് കുമാര്‍ പറഞ്ഞു.
സ്പീക്കര്‍ എഎ ന്‍ ഷംസീറിനെതിരെ തെരുവിലിറങ്ങി പ്രതിഷേധിക്കാന്‍ എന്‍എസ്എസ് ആഹ്വാനം ചെയ്തതിന് പിന്നാലെയാണ് ഇടത് എം.എല്‍.എ കൂടിയായ ഗണേഷ് കുമാര്‍ വിഷയത്തില്‍ തന്റെ നിലപാട് വ്യക്തമാക്കിയത്.
ബുധനാഴ്ച സംസ്ഥാന വ്യാപകമായി വിശ്വാസ സംരക്ഷണ ദിനമായി ആചരിക്കാനാണ് എന്‍എസ്എസിന്റെ ആഹ്വാനം. എന്‍എസ്എസ് പ്രവര്‍ത്തകരും വിശ്വാസികളുമായിട്ടുള്ളവര്‍ രാവിലെ തന്നെ അവരവരുടെ വീടിന് സമീപത്തെ ഗണപതി ക്ഷേത്രങ്ങളിലെത്തി വഴിപാട് നടത്തുകയും വിശ്വാസ സംരക്ഷണത്തിന് അനുഗ്രഹം ഉണ്ടാകണമെന്ന് പ്രാര്‍ത്ഥിക്കുകയും ചെയ്യേണ്ടതാണെന്നും ജനറല്‍ സെക്രട്ടറി ജി സുകുമാരന്‍ നായര്‍ താലൂക്ക് യൂണിയന്‍ പ്രസിഡന്റുമാര്‍ക്ക് അയച്ച സര്‍ക്കുലറില്‍ പറയുന്നു.
ഇടതുമുന്നണി ഘടകക്ഷി നേതാവായ ഗണേഷ്‌കുമാര്‍ മന്ത്രിസ്ഥാനം ലഭിക്കാത്തതില്‍ ഇടഞ്ഞുനില്‍ക്കുകയാണ്.