മകളുടെ വിവാഹമാണ്, വരനെ വിട്ടുതരൂ.. ഒരു കശ്മീരി പിതാവിന്റെ രോദനം

ശ്രീനഗര്‍: ജമ്മു കശ്മീരില്‍ സ്ഥിതിഗതികള്‍ സാധാരണ നിലയിലാണെന്ന കേന്ദ്ര സര്‍ക്കാറിന്റെ വാദങ്ങള്‍ ഒരു വിഭാഗം മാധ്യമങ്ങള്‍ ആഘോഷമാക്കുമ്പോള്‍ യാഥാര്‍ത്ഥ്യം ഇതില്‍ നിന്നും എത്രയോ അകലെയെന്ന് തെളിയിക്കുന്ന റിപ്പോര്‍ട്ടുകളാണ് പുറത്ത് വരുന്നത്. ജമ്മുകശ്മീരിന്റെ പ്രത്യേക പദവി റദ്ദാക്കിയതിന് പിന്നാലെ തടവിലാക്കപ്പെട്ട പ്രതിശ്രുത വരനെ വിട്ടു കിട്ടണമെന്നാവശ്യപ്പെട്ട് പെണ്‍കുട്ടിയുടെ പിതാവ് നടത്തുന്ന പോരാട്ടമാണിപ്പോള്‍ വാര്‍ത്തകളില്‍ ഇടം നേടുന്നത്.
മകളുടെ നിക്കാഹ് നടത്തിയതിന്റെ സര്‍ട്ടിഫിക്കറ്റും കൈയ്യിലേന്തി അരഡസന്‍ പത്രം ഓഫീസുകളില്‍ കയറി ഇറങ്ങുകയാണ് ഭാരമുല്ല ജില്ലയിലെ റാഫിയാബാദ് സ്വദേശിയായ നസീര്‍ അഹമ്മദ് ഭട്ട് എന്ന മധ്യവയസ്‌കന്‍. വിവാഹത്തിനായി മകളുടെ ഭര്‍ത്താവിനെ വിട്ടു തരണമെന്നാണ് ഭട്ടിന്റെ അഭ്യര്‍ത്ഥന. പത്രത്തില്‍ വാര്‍ത്ത വന്നാല്‍ ചിലപ്പോള്‍ സര്‍ക്കാര്‍ തടവിലാക്കിയ മകളുടെ ഭര്‍ത്താവിനെ വിട്ടയച്ചേക്കുമെന്ന ബന്ധുവിന്റെ നിര്‍ദേശം ഉള്‍ക്കൊണ്ടാണ് ഗ്രാമത്തില്‍ നിന്നും 60 കിലോമീറ്റര്‍ അകലെയുള്ള ശ്രീനഗറിലുള്ള പത്രം ഓഫീസുകളില്‍ ഭട്ട് കയറി ഇറങ്ങുന്നത്. ഈ മാസം എട്ടിനായിരുന്നു ഭട്ടിന്റെ മകളുടെ വിവാഹം നിശ്ചയിച്ചിരുന്നത്. നിക്കാഹ് നടന്നു. കഴിഞ്ഞ ആറുമാസമായി വിവാഹത്തിന് വേണ്ടി തയാറെടുപ്പുകള്‍ നടത്തിവരുന്ന കുടുംബത്തിന് പക്ഷേ നിശ്ചിത തീയതിക്ക് വിവാഹം നടത്താനായില്ല. ബിസിനസ് മാനേജ്‌മെന്റില്‍ ബിരുദം കരസ്ഥമാക്കിയ മരുമകന്‍ തന്‍വീര്‍ അഹമ്മദിനെ ജമ്മുകശ്മീരിന്റെ പ്രത്യേക പദവി എടുത്തു കളഞ്ഞ മോദി സര്‍ക്കാര്‍ തീരുമാനം വന്ന ദിവസമാണ് പൊലീസ് അറസ്റ്റു ചെയ്തത്.
സംസ്ഥാനത്തെ രാഷ്ട്രീയ നേതാക്കളേയും വിഘടനവാദികളേയും അറസ്റ്റു ചെയ്തതിന് പിന്നാലെ താഴ് വരയിലെ ചെറുപ്പക്കാരെയും പൊലീസ് പിടികൂടിയിരുന്നു. സര്‍ക്കാര്‍ ജീവനക്കാരനായ ഭട്ടിന് പക്ഷേ മൊബൈല്‍, ലാന്റ് ഫോ ണ്‍ കണക്ഷനുകള്‍ വിച്ഛേദിച്ചത് കാരണം മരുമകന്റെ അറസ്റ്റു സംബന്ധിച്ച വിവരം നാലു ദിവസം കഴിഞ്ഞാണ് അറിയാന്‍ സാധിച്ചത്. അതും ശ്രീനഗറില്‍ നിന്നും ലക്‌നോ ജയിലിലേക്ക് മാറ്റിയ ശേഷം. ബാരമുള്ളയിലെ മക്ബൂല്‍ അബദ് ഗ്രാമത്തിലാണ് അഹമ്മദിന്റെ വസതി. ഹൃദ്രോഗിയായ മാതാവിനും, പ്രമേഹ രോഗിയായ പിതാവിനും അഞ്ചു സഹോദരിമാരുടേയും ഏക ആശ്രയമാണ് അഹമ്മദ്. കുറച്ച് ദിവസത്തേക്കെങ്കിലും അഹമ്മദിനെ വിട്ടു കിട്ടിയാല്‍ വിവാഹം നടത്താമായിരുന്നെന്നും തന്റെ മകള്‍ക്ക് അഹമ്മദിന്റെ മാതാപിതാക്കളെ നോക്കാമായിരുന്നെന്നുമാണ് ഭട്ട് പറയുന്നത്. മകള്‍ സുരയ്യ നിയമപ്രകാരം നിക്കാഹോടെ അഹമ്മദിന്റെ ഭാര്യ ആയെങ്കിലും ആചാര പ്രകാരം വിവാഹം കഴിഞ്ഞെങ്കില്‍ മാത്രമേ കുടുംബത്തിന്റെ ഭാഗമായി കണക്കാക്കാനാവൂ എന്നാണ് ഭട്ട് പറയുന്നത്.
ഇതേ ആവശ്യവുമായി ഭട്ട് സര്‍ക്കാര്‍ ഓഫീസുകളിലും പൊലീസ് സ്റ്റേഷനുകളിലും ദിവസങ്ങളായി കയറി ഇറങ്ങുകയാണ്. കശ്മീരില്‍ സമാധാനം സ്ഥാപിക്കാനായാണ് നിരവധി പേരെ അറസ്റ്റു ചെയ്തതെന്നാണ് അധികൃതര്‍ പറയുന്നത്. പക്ഷേ ഇവരില്‍ പലരേയും സംസ്ഥാനത്തിന് പുറത്തെ ജയിലുകളിലേക്ക് ഇതിനോടകം മാറ്റിയിട്ടുണ്ട്.

SHARE