കൊല്ലത്ത് ആശുപത്രിയിലേക്ക് പോകാന്‍ പ്രേരിപ്പിച്ച അമ്മയെ മകന്‍ വെട്ടിക്കൊന്നു

കൊല്ലം: കൊട്ടാരക്കരക്കടുത്ത് പെരുങ്കുളത്ത് അമ്മയെ മകന്‍ വെട്ടിക്കൊന്നു. നെടുമ്പറമ്പ് ചെറുകോട്ട് മഠത്തില്‍ ശാന്താദേവി അന്തര്‍ജനം (68)ആണ് മകന്‍ അശോക് കുമാറിന്റെ ആക്രമണത്തില്‍ കൊല്ലപ്പെട്ടത്. അമ്മയെ കൊലപ്പെടുത്തിയ ശേഷം ഇയാള്‍ സ്വയം കുത്തി പരുക്കേല്‍പ്പിച്ചു. പരിക്കേറ്റ ഇയാളെ ആശുപത്രിയില്‍ പ്രവേശിപ്പിച്ചു. പ്രതിക്ക് വര്‍ഷങ്ങളായി മാനസികാസ്വസ്ഥ്യം ഉളളതായി ബന്ധുക്കള്‍ പറഞ്ഞു.യാതൊരു പ്രകോപനമില്ലാതെ അമ്മയെ മകന്‍ അക്രമിക്കുകയായിരുന്നെന്ന് പൊലീസ് അറിയിച്ചു. സംഭവവുമായി ബന്ധപ്പെട്ട് മകന്‍ അശോക് കുമാറിനെ പൊലീസ് അറസ്റ്റ് ചെയ്തിട്ടുണ്ട്.

മാനസികാസ്വസ്ഥ്യമൂലം അശോക് കുമാറിനെ ആശുപത്രിയിലേക്ക് കൊണ്ടുപോകാന്‍ പിതാവ് രാവിലെ പൊലീസിന്റെ സഹായം തേടിയിരുന്നു. എന്നാല്‍ ആശുപത്രിയിലേക്ക് പോകാന്‍ തയാറാകാതിരുന്ന അശോക് കുമാര്‍ പൊലീസിനെയും നാട്ടുകാരെയും കണ്ടതോടെ വീടിനുള്ളില്‍ കയറി കതകടച്ചു. ശേഷം ആശുപത്രിയിലേക്ക് പോകാന്‍ പ്രേരിപ്പിച്ച അമ്മ ശാന്താദേവിയെ കൊടുവാള്‍കൊണ്ട് വെട്ടിക്കൊലപ്പെടുത്തുകയായിരുന്നു.