Connect with us

Views

തെരഞ്ഞെടുപ്പില്‍ റഷ്യ ഇടപെട്ടു: യുഎസ് ഇന്റലിജന്‍സ് മേധാവി

Published

on

വാഷിങ്ടണ്‍: യുഎസ് തെരഞ്ഞെടുപ്പില്‍ റഷ്യന്‍ ഇടപെടല്‍ ഉണ്ടായിട്ടില്ലെന്ന നിയുക്ത പ്രസിഡണ്ട് ഡൊണാള്‍ഡ് ട്രംപിന്റെ വാദത്തിനെതിരെ യുഎസ് രഹസ്യാന്വേഷണമേധാവി ജയിംസ് ക്ലാപ്പര്‍ രംഗത്ത്. ‘ റഷ്യ ഇടപെട്ടെന്ന കാര്യം തറപ്പിച്ചു പറയാന്‍ യുഎസ് ഏജന്‍സികള്‍ക്കാകും. റഷ്യ രാജ്യത്തിന്റെ നിലനില്‍പിന് ഭീഷണിയാണ്’. ക്ലാപ്പര്‍ വ്യക്തമാക്കി. റഷ്യന്‍ നീക്കങ്ങളെക്കുറിച്ചുള്ള അതീവരഹസ്യ സ്വഭാവമുള്ള റിപ്പോര്‍ട്ട് പ്രസിഡണ്ട് ഒബാമയ്ക്ക് സമര്‍പ്പിച്ചു.

റഷ്യന്‍ ഹാക്കിങ്ങ് തിരഞ്ഞെടുപ്പ് ഫലത്തെ ബാധിച്ചോയെന്ന ചോദ്യത്തിന് മറുപടി പറയാന്‍ തങ്ങള്‍ക്കാകില്ലെന്നും ജയിംസ് ക്ലാപ്പര്‍ പറഞ്ഞു. തിരഞ്ഞെടുപ്പിനു മുമ്പു തന്നെ റഷ്യന്‍ ഇടപെടലിനെക്കുറിച്ച് താനും ഒബാമയും റഷ്യയോട് ആശങ്ക അറിയിച്ചിരുന്നെന്ന പരാമര്‍ശവുമായി സ്‌റ്റേറ്റ് സെക്രട്ടറി ജോണ്‍ കെറിയും രംഗത്തെത്തി. തിരഞ്ഞെടുപ്പ് ഫലത്തെ ബാധിക്കുമെന്നു കരുതിയാണ് അന്ന് വിവരം പുറത്തു വിടാതിരുന്നെതെന്നും ജോണ്‍ കെറി പറഞ്ഞു.

Continue Reading
Advertisement
Click to comment

Leave a Reply

Your email address will not be published. Required fields are marked *

Article

സി എച്ച് സര്‍ക്കാര്‍ ചരിത്രവും രാഷ്ട്രീയവും

അടിയന്തരാവസ്ഥക്ക് ശേഷം 1977 മാര്‍ച്ച് 19 ന് നടന്ന പൊതുതിരഞ്ഞെടുപ്പില്‍ കോണ്‍ഗ്രസ്, സി.പി.ഐ, മുസ്‌ലിംലീഗ്, കേരള കോണ്‍ഗ്രസ്, ആര്‍.എസ്.പി എന്നീ പാര്‍ട്ടികള്‍ അടങ്ങിയ ഐക്യമുന്നണി, മാര്‍ക്‌സിസ്റ്റ് മുന്നണിയെ വന്‍ഭൂരിപക്ഷത്തില്‍ പരാജയപ്പെടുത്തി അധികാരത്തില്‍ വന്നു. 103 സീറ്റുകളില്‍ ഐക്യമുന്നണി വിജയിച്ചെങ്കില്‍ 37 സീറ്റില്‍ മാത്രമാണ് മാര്‍ക്‌സിസ്റ്റ് മുന്നണിക്ക് വിജയിക്കാന്‍ സാധിച്ചത്.

Published

on

സുഫ്‌യാന്‍ അബ്ദുസ്സലാം

1979 ഡിസംബര്‍ ഒന്ന് കേരളത്തിന് മറക്കാന്‍ സാധിക്കാത്ത ദിനമാണ്. ഭരണ പ്രതിസന്ധിയില്‍ ആടിയുലഞ്ഞിരുന്ന സംസ്ഥാനത്തിന് പ്രതീക്ഷകളുടെ പുതുനാമ്പുകള്‍ നല്‍കി അധികാരത്തില്‍ വന്ന സി.എച്ച് മുഹമ്മദ് കോയ സര്‍ക്കാര്‍ രാജിവെച്ച ദിവസമാണത്. സി. അച്യുതമേനോന്‍ മുഖ്യമന്ത്രിയായി 1970 മുതല്‍ രൂപംകൊണ്ട ഐക്യമുന്നണിയുടെ തുടര്‍ച്ചയായി കെ. കരുണാകരന്‍, എ.കെ ആന്റണി, പി.കെ വാസുദേവന്‍ നായര്‍ എന്നിവര്‍ക്ക് ശേഷമാണ് സി.എച്ച് മുഹമ്മദ്‌കോയ കേരളത്തിന്റെ മുഖ്യമന്ത്രിയായത്. സംസ്ഥാനത്തെ ഭരണ പ്രതിസന്ധി സി.എച്ചിലൂടെ പരിഹരിക്കാന്‍ സാധിക്കുമെന്ന ശുഭാപ്തി വിശ്വാസമാണ് ഐക്യമുന്നണിക്കും ഭൂരിപക്ഷ ന്യൂനപക്ഷ വ്യത്യാസമില്ലാതെ കേരളത്തിലെ പൊതുസമൂഹത്തിനുമുണ്ടായിരുന്നത്. സി.പി.ഐ, മുസ്‌ലിംലീഗ്, ആര്‍.എസ്.പി എന്നീ പാര്‍ട്ടികളുടെ നേതൃത്വത്തില്‍ രൂപംകൊണ്ട ഐക്യമുന്നണിക്ക് കോണ്‍ഗ്രസിന്റെ പിന്തുണയുമുണ്ടായിരുന്നു.

1970 ല്‍ അധികാരത്തില്‍ വന്ന സി. അച്യുതമേനോന്‍ മന്ത്രിസഭക്ക് 1975 ല്‍ കാലാവധി കഴിഞ്ഞിട്ടും അടിയന്തരാവസ്ഥ സൃഷ്ടിച്ച പ്രതിസന്ധി കാരണം 1977 വരെ അധികാരത്തില്‍ തുടരേണ്ടി വന്നു. അടിയന്തരാവസ്ഥക്ക് ശേഷം 1977 മാര്‍ച്ച് 19 ന് നടന്ന പൊതുതിരഞ്ഞെടുപ്പില്‍ കോണ്‍ഗ്രസ്, സി.പി.ഐ, മുസ്‌ലിംലീഗ്, കേരള കോണ്‍ഗ്രസ്, ആര്‍.എസ്.പി എന്നീ പാര്‍ട്ടികള്‍ അടങ്ങിയ ഐക്യമുന്നണി, മാര്‍ക്‌സിസ്റ്റ് മുന്നണിയെ വന്‍ഭൂരിപക്ഷത്തില്‍ പരാജയപ്പെടുത്തി അധികാരത്തില്‍ വന്നു. 103 സീറ്റുകളില്‍ ഐക്യമുന്നണി വിജയിച്ചെങ്കില്‍ 37 സീറ്റില്‍ മാത്രമാണ് മാര്‍ക്‌സിസ്റ്റ് മുന്നണിക്ക് വിജയിക്കാന്‍ സാധിച്ചത്. കെ. കരുണാകരന്റെ നേതൃത്വത്തില്‍ മന്ത്രിസഭ രൂപീകരിച്ചെങ്കിലും രാജന്‍ കേസിന്റെ പേരില്‍ ഒരു മാസത്തിനകം അദ്ദേഹത്തിന് മുഖ്യമന്ത്രി പദം രാജിവെക്കേണ്ടിവന്നു. തുടര്‍ന്ന് അധികാരത്തില്‍ വന്ന എ.കെ ആന്റണി ഒരു വര്‍ഷം അധികാരത്തിലിരുന്നെങ്കിലും 1978ല്‍ ചിക്കമംഗ്ലൂരില്‍ ഇന്ദിരാഗാന്ധിയെ മത്സരിപ്പിച്ച കോണ്‍ഗ്രസ് തീരുമാനത്തില്‍ പ്രതിഷേധിച്ച് മുഖ്യമന്ത്രി സ്ഥാനം രാജിവെച്ചു. ആന്റണിയുടെ രാജിയെ തുടര്‍ന്ന് സി. പി.ഐ നേതാവായ പി.കെ വാസുദേവന്‍ നായര്‍ മുഖ്യമന്ത്രിയായി.

ഉണ്ടിരുന്ന നായര്‍ക്ക് ഉള്‍വിളി ഉണ്ടായി എന്നു പറഞ്ഞപോലെ വളരെ പെട്ടെന്നായിരുന്നു പി.കെ.വിക്ക് കമ്യൂണിസ്റ്റ് ഐക്യം എന്ന ഉള്‍വിളി ഉണ്ടാവുന്നത്. 1965ല്‍ പിളര്‍ന്നുപോയ സി.പി.എമ്മിനെ അടുപ്പിച്ച് കമ്യൂണിസ്റ്റ് പാര്‍ട്ടിയെ വളര്‍ത്തുക എന്ന ലക്ഷ്യം മുന്നില്‍കണ്ട് 1978 ഏപ്രിലില്‍ പഞ്ചാബിലെ ഭട്ടിന്‍ഡയില്‍ ചേര്‍ന്ന സി. പി.ഐ ദേശീയ സമ്മേളനം മുന്നോട്ടുവെച്ച ‘കമ്യൂണിസ്റ്റ് ഐക്യം’ എന്ന സ്വപ്‌നമാണ് പി.കെ.വിയുടെ രാജിയിലേക്ക് നയിച്ചത്. പി.കെ.വിയുടെ അന്തഃകരണത്തില്‍ ഉദിച്ചുപൊന്തിയ കമ്യൂണിസ്റ്റ് ഐക്യമെന്ന ദിവാസ്വപ്‌നം ഐക്യമുന്നണിയില്‍ നിന്നും പുറത്തുപോകാന്‍ സി.പി.ഐയെ പ്രേരിപ്പിച്ചു. 1979 ഒക്ടോബര്‍ ഏഴിന് പി. കെ.വി മുഖ്യമന്ത്രി പദം രാജിവെച്ചു. ഐക്യമുന്നണിയില്‍നിന്ന് മത്സരിച്ച സി.പി.ഐക്ക് 23 എം.എല്‍.എമാര്‍ ഉണ്ടായിരുന്നു. സി.പി.എമ്മിന് 17 അംഗങ്ങള്‍ മാത്രമാണുണ്ടായിരുന്നത്. എന്നാല്‍ ഐക്യമുന്നണിയെ ഉപേക്ഷിച്ച് മാര്‍ക്‌സിസ്റ്റ് കൂടാരത്തിലെത്തിയ സി.പി.ഐക്ക് പിന്നീട് നടന്ന തിരഞ്ഞെടുപ്പില്‍ 17 സീറ്റിലേ വിജയിക്കാനായുള്ളൂ. സി.പി.എം 35 സീറ്റുകള്‍ നേടുകയും ചെയ്തു.

സി.പി.ഐ ഉപ്പുവെച്ച കാലം പോലെയായി. ഇപ്പോള്‍ 16 അംഗങ്ങളാണ് സി.പി.ഐക്ക് ഉള്ളത്. 1977 ല്‍ കേവലം 17 സീറ്റ് മാത്രമുണ്ടായിരുന്ന സി.പി.എമ്മിന് ഇന്ന് കേരള നിയമസഭയില്‍ 62 എം.എല്‍.എമാരുണ്ട് എന്ന കാര്യം വിലയിരുത്തുമ്പോള്‍ കമ്യൂണിസ്റ്റ് ഐക്യമെന്ന ആശയം സി.പി.ഐ എന്ന പാര്‍ട്ടിക്ക് വലിയ നഷ്ടമാണ് വരുത്തിവെച്ചതെന്ന് മനസ്സിലാകും.

1970 മുതല്‍ 77 വരെ കേരളം ഭരിച്ച പ്രഗത്ഭമതിയും പ്രായോഗിക രാഷ്ട്രീയത്തിന്റെ പ്രണേതാവുമായിരുന്ന സി. അച്യുതമേനോന്‍ സി.പി.എം ബന്ധം സി.പി.ഐക്ക് ഗുണം ചെയ്യില്ല എന്ന് മനസ്സിലാക്കിയ നേതാവായിരുന്നു. കോണ്‍ഗ്രസിന്റെയും മുസ്‌ലിംലീഗിന്റെയും കൂടെ ഏഴു വര്‍ഷക്കാലം കേരളം ഭരിച്ച സി.പി.ഐക്ക് അന്ന് ആരുടേയും വല്യേട്ടന്‍ ഭീഷണികള്‍ അനുഭവിക്കേണ്ടിവന്നിരുന്നില്ല. അതുകൊണ്ടുതന്നെ പൊതുജനങ്ങള്‍ക്ക് മുമ്പില്‍ രാജിക്ക് രാഷ്ട്രീയ കാരണങ്ങള്‍ നിരത്താന്‍ പി.#ംകെ.വിയുടെ കൈയില്‍ ഒന്നുമുണ്ടായിരുന്നില്ല. അങ്ങനെ ജനങ്ങളോട് പറയാനുള്ള കാരണമായി പി. കെ.വി കണ്ടെത്തിയത് ‘ഇഷ്ടദാനം’ ആയിരുന്നു. അദ്ദേഹം തന്നെ ആവിഷ്‌കരിച്ച ഇഷ്ടദാന ബില്ലിനോട് ഇഷ്ടക്കേട് രാഷ്ട്രീയകാരണമായി അവതരിപ്പിക്കുകയായിരുന്നു.

എന്താണ് ഇഷ്ടദാനം? ജന്മിത്തത്തിന്റെ കരാളഹസ്തങ്ങളില്‍നിന്നും കേരളത്തിന്റെ ഭൂ വിഭവങ്ങളെ സംരക്ഷിക്കുന്നതിന് വേണ്ടി കേരളത്തിന്റെ രാഷ്ട്രീയ നേതൃത്വം പൊതുവില്‍ അംഗീകരിച്ച ആശയമായിരുന്നു ഭൂ പരിഷ്‌കരണം. ഒരു വ്യക്തിക്ക് പരമാവധി കൈവശം വെക്കാവുന്ന ഭൂമിയുടെ അളവ് കണക്കാക്കുകയും മിച്ചം വരുന്ന ഭൂമി സര്‍ക്കാറിലേക്ക് നല്‍കുകയും ചെയ്യുക എന്ന പ്രക്രിയയാണ് ഭൂ പരിഷ്‌കരണത്തിലൂടെ ഉദ്ദേശിക്കപ്പെട്ടത്. അവിഭക്ത സി.പി.എം 1957 ഏപ്രില്‍ 5 നു ഇ.എം.എസിന്റെ നേതൃത്വത്തില്‍ അധികാരത്തില്‍ വന്നശേഷം 1958 ല്‍ റവന്യു മന്ത്രിയായിരുന്ന കെ.ആര്‍ ഗൗരിയാണ് ഭൂ പരിഷ്‌കരണ ബില്‍ നിയമസഭയില്‍ അവതരിപ്പിച്ചത്. ആര് അധികാരത്തില്‍ വന്നാലും അവര്‍ക്ക് ഭൂ പരിഷ്‌കരണ നിയമം കൊണ്ടുവരേണ്ടിവരും എന്നതായിരുന്നു സാമൂഹിക സാഹചര്യം. 1958 ല്‍ ഗൗരിയമ്മ ബില്‍ കൊണ്ടുവന്നെങ്കിലും അത് നടപ്പാക്കാന്‍ യോഗമുണ്ടായത് മുസ്‌ലിംലീഗിന് കൂടി പങ്കാളിത്തമുണ്ടായിരുന്ന 1970 ലെ അച്യുതമേനോന്‍ സര്‍ക്കാറിനായിരുന്നു.

ഒരു വ്യക്തി അയാള്‍ക്ക് അവകാശപ്പെട്ട സ്ഥലം സ്വേച്ഛപ്രകാരം, പ്രതിഫലം കൂടാതെ മറ്റൊരാള്‍ക്ക് എഴുതിക്കൊടുക്കുന്നതിനെയാണ് ഇഷ്ടദാനം എന്ന് പറയുന്നത്. മിച്ചഭൂമി സര്‍ക്കാരിന് നല്‍കേണ്ടിവരുമെന്ന് ഭയന്ന് മറ്റാരുടെയെങ്കിലും പേരില്‍ എഴുതിക്കൊടുത്ത് രക്ഷപ്പെടാനുള്ള അവസരം ഇഷ്ടദാനം വഴി ഉണ്ടാവാന്‍ പാടില്ല. എന്നാല്‍ ഭൂ പരിഷ്‌കരണത്തിന്റെ പേരില്‍ ഒരാള്‍ക്കും തന്റെ മക്കള്‍ക്കോ പേരമക്കള്‍ക്കോ ഭൂമി ദാനം ചെയ്യാന്‍ സാധിക്കാത്ത അവസ്ഥ ഉണ്ടാവുന്നത് നീതിക്ക് ചേര്‍ന്നതുമല്ല. അതുകൊണ്ട് തന്നെ ഇഷ്ടദാനത്തിന്റെ അനിവാര്യതയും അതിലെ ചൂഷണവും എല്ലാവര്‍ക്കും നേരത്തെ തന്നെ ബോധ്യപ്പെട്ടിരുന്നു. 1979 ല്‍ സി.എച്ച് ഉണ്ടാക്കിയ ആശയം എന്ന നിലക്കാണ് പലരും ഇഷ്ടദാനത്തെ പ്രചരിപ്പിക്കുന്നത്. എന്നാല്‍ 1958 ല്‍ റവന്യൂ മന്ത്രി കെ.ആര്‍ ഗൗരിയമ്മ നിയമസഭയില്‍ അവതരിപ്പിച്ച ഭൂ പരിഷ്‌കരണ ബില്ലില്‍ തന്നെ ഇഷ്ടദാനം ഇടം പിടിച്ചിരുന്നു. 1964 ല്‍ പി.ടി ചാക്കോയും 1969 ല്‍ കെ.ആര്‍ ഗൗരിയമ്മ രണ്ടാമതും അവതരിപ്പിച്ച നിയമത്തിലും ഇഷ്ടദാനം ഉണ്ടായിരുന്നു. 69 ല്‍ ഗൗരിയമ്മ അവതരിപ്പിച്ച ബില്ലില്‍ ‘സ്‌നേഹവാത്സല്യങ്ങളുടെ’ പേരില്‍ ആര്‍ക്കും ഇഷ്ടദാനം നല്‍കാം എന്ന് പ്രത്യേകം എഴുതിച്ചേര്‍ക്കുകയും ചെയ്തു. എന്നാല്‍ തോന്നിയ പോലെ ഇഷ്ടദാനം നല്‍കാമെന്ന അപാകത പരിഹരിക്കുന്നതിനും ഇഷ്ടദാനം ഇല്ലാത്ത കാരണത്താല്‍ നഷ്ടം സംഭവിക്കുന്ന വിഭാഗങ്ങളുടെ പ്രശ്‌നങ്ങള്‍ പരിഹരിക്കുന്നതിനായി ഇഷ്ടദാനത്തിന് കൃത്യമായ വ്യവസ്ഥയും ഭേദഗതിയും നിര്‍ണയിച്ചത് 1972 ല്‍ മുഖ്യമന്ത്രി അച്യുതമേനോന്‍ അവതരിപ്പിച്ച ഭൂ പരിഷ്‌കരണ ഭേദഗതി ബില്ലിലൂടെയായിരുന്നു. എന്നാല്‍ ഇത് കോടതിയില്‍ ചോദ്യം ചെയ്യപ്പെടുകയും തന്നിമിത്തം 1974 ല്‍ കേരള ഹൈക്കോടതി ഇഷ്ടദാനം മൊത്തത്തില്‍ അസാധുവായി പ്രഖ്യാപിക്കുകയും ചെയ്യുകയായിരുന്നു.
(തുടരും)

Continue Reading

Article

സില്‍വര്‍ലൈന്‍ ഉപേക്ഷിക്കുമ്പോള്‍- എഡിറ്റോറിയല്‍

അനുമതി ലഭിക്കാത്ത പദ്ധതിക്കായി മൂന്നു വര്‍ഷം കൊണ്ട് 31 കോടി രൂപയാണ് സര്‍ക്കാര്‍ പൊടിച്ചത്. ഇതിന് കണക്കുപറയാതെ സര്‍ക്കാറിന് മുന്നോട്ടുപോകാനാവില്ല.

Published

on

പിണറായി സര്‍ക്കാര്‍ പിടിവാശിയോടെ നടപ്പാക്കാന്‍ പുറപ്പെട്ട കെ റെയില്‍ പദ്ധതിയില്‍ നിന്ന് സര്‍ക്കാര്‍ പിന്‍വാങ്ങുകയാണെന്ന് റവന്യൂ ഉദ്യോഗസ്ഥരെ പിന്‍വലിച്ചതോടെ വ്യക്തമായിരിക്കുകയാണ്. സില്‍വര്‍ലൈന്‍ ഉപേക്ഷിക്കുന്നതിന്റെ ആദ്യ നടപടിയെന്ന നിലയില്‍ പദ്ധതിക്കായി ഭൂമി ഏറ്റെടുക്കാന്‍ നിയോഗിച്ച മുഴുവന്‍ ഉദ്യോഗസ്ഥരേയും അടിയന്തരമായി സര്‍ക്കാര്‍ തിരിച്ചുവിളിച്ചിരിക്കുകയാണ്. ഇനി റെയില്‍വെ ബോര്‍ഡ് അനുമതിക്ക് ശേഷം മാത്രമായിരിക്കും തുടര്‍ നടപടിയെന്നും സാമൂഹ്യാഘാത പഠനത്തിനുള്ള പുതിയ വിജ്ഞാപനവും കേന്ദ്ര അനുമതി ലഭിച്ചതിന് ശേഷം മതിയെന്നാണ് തീരുമാനമെന്നും വ്യക്തമാക്കി റവന്യു വകുപ്പിന്റെ ഉത്തരവിറങ്ങിയത് കഴിഞ്ഞദിവസമാണ്. പദ്ധതി പ്രവര്‍ത്തനങ്ങള്‍ അവസാനിപ്പിക്കുന്നതായ റിപ്പോര്‍ട്ടുകള്‍ പുറത്തുവന്നിരുന്നുവെങ്കിലും മന്ത്രിമാരും ഇടത് നേതാക്കളും ഇത് തള്ളുകയും സില്‍വര്‍ലൈനില്‍ പിന്നോട്ടില്ലെന്ന നിലയില്‍ പ്രതികരണം നടത്തുകയും ചെയ്തിരുന്നു.

സംസ്ഥാനത്തിന്റെ സ്വപ്‌ന പദ്ധതിയെന്ന് വിശേഷിപ്പിച്ചാണ് ഇടത്‌സര്‍ക്കാര്‍ സില്‍വര്‍ലൈന്‍ പദ്ധതിയെ അവതരിപ്പിച്ചത്. ഭൂമിയേറ്റെടുക്കല്‍ സര്‍വേ നടപടികളുമായി സര്‍ക്കാര്‍ മുന്നോട്ടുപോയതോടെ എതിര്‍പ്പുയര്‍ന്നു. സ്ത്രീകളും കുട്ടികളും പദ്ധതിക്കെതിരെ തെരുവിലിറങ്ങിയെങ്കിലും പിന്‍മാറില്ലെന്ന നിലപാടിലായിരുന്നു മുഖ്യമന്ത്രി പിണറായി വിജയനും സര്‍ക്കാരും. നിരവധി പേര്‍ക്കാണ് പ്രതിഷേധത്തിനിടയില്‍ പരിക്കേറ്റത്. സ്ത്രീകളോടും കുട്ടികളോടുപോലും പൊലീസ് മനുഷ്യത്വം കാണിച്ചിരുന്നില്ല. പലരേയും വലിച്ചിഴച്ചാണ് അറസ്റ്റ് ചെയ്തത്. പൊലീസുകാര്‍ ബൂട്ടിട്ട് ചവിട്ടുന്ന ദൃശ്യങ്ങള്‍ കരളലിയിക്കുന്നതായിരുന്നു. തൃക്കാക്കര ഉപതിരഞ്ഞെടുപ്പില്‍ തിരിച്ചടി നേരിടുമെന്ന് ഭയന്ന് തിരഞ്ഞെടുപ്പിന് തൊട്ടുമുമ്പാണ് സില്‍വര്‍ലൈന്‍ പ്രവൃത്തികള്‍ നിര്‍ത്തിെവച്ചത്. പിന്നീട് കാര്യമായ പ്രവൃത്തികളൊന്നും നടന്നില്ല.

എന്നാല്‍ റവന്യൂ ഉദ്യോഗസ്ഥരെ പിന്‍വലിച്ചെങ്കിലും പദ്ധതി ഉപേക്ഷിച്ചെന്ന് ഉത്തരവിറക്കാന്‍ സര്‍ക്കാര്‍ തയാറായിട്ടില്ല. ഈ സാഹചര്യത്തില്‍ സര്‍വേ നടത്താനായി കല്ലിടാന്‍ തിരഞ്ഞെടുത്ത 955.13 ഹെക്ടര്‍ സ്വകാര്യ ഭൂമിയുടെ കാര്യത്തിലുള്ള ജനങ്ങളുടെ ആശങ്ക അവസാനിക്കുന്നില്ല. 197 കിലോമീറ്ററില്‍ ഏഴായിരത്തോളം മഞ്ഞക്കുറ്റികളാണ് സ്ഥാപിച്ചത്. 9000 പേരുടെ വീടുകളും കടകളും പൊളിക്കണമെന്നായിരുന്നു കണക്കുകൂട്ടല്‍. പദ്ധതി ഉപേക്ഷിച്ച് സര്‍ക്കാര്‍ ഉത്തരവിറക്കുംവരെ ഭൂമിയില്‍ നിര്‍മാണങ്ങള്‍ക്ക് തദ്ദേശ സ്ഥാപനങ്ങള്‍ അനുമതി നല്‍കാന്‍ സാധ്യതയില്ല. ഭൂമി ഏറ്റെടുക്കാന്‍ റവന്യൂ വകുപ്പ് 11(1) വിജ്ഞാപനം പുറപ്പെടുവിച്ചാലേ ഭൂമിയുടെ ക്രയവിക്രയം മരവിപ്പിക്കാനാവു എങ്കിലും അതുണ്ടായിട്ടില്ല. ഭൂമി വില്‍ക്കുകയോ ഈടുവെച്ച് വായ്പ എടുക്കുകയോ അനന്തരാവകാശികള്‍ക്ക് കൈമാറുകയോ ചെയ്യുന്നതിന് തടസ്സമില്ലെന്ന് കെ റെയില്‍ വ്യക്തമാക്കിയിട്ടുണ്ടെങ്കിലും കല്ലിട്ട ഭൂമി ആര് വാങ്ങാനാണ് എന്ന ചോദ്യം പ്രസക്തമാണ്. ബാങ്ക് വായ്പ നിഷേധിക്കരുതെന്ന് ബാങ്കുകള്‍ക്കും സംഘങ്ങള്‍ക്കും സഹകരണ രജിസ്റ്റാര്‍ നിര്‍ദേശം നല്‍കിയിട്ടുണ്ടെന്ന് പറയുമ്പോഴും ദേശസാത്കൃത ബാങ്കുകള്‍ക്ക് ഇത്തരമൊരു നിര്‍ദേശം സംസ്ഥാന തല ബാങ്കേഴ്‌സ് സമിതിയില്‍നിന്ന് ലഭിച്ചിട്ടില്ലെന്നാണ് അറിയുന്നത്. ഫലത്തില്‍ സ്ഥലം ഈടുവെക്കാനും കഴിയാത്ത അവസ്ഥയാണ്.

11 ജില്ലകളിലായി 250 ലേറെ കേസുകളാണ് കെ റെയിലുമായി ബന്ധപ്പെട്ട് രജിസ്റ്റര്‍ ചെയ്തത്. 200 പേര്‍ക്ക് ഇതുവരെ സമന്‍സ് അയച്ചിട്ടുണ്ട്. കോവിഡ് മാനദണ്ഡം ലംഘിച്ചതിന് 5000 മുതല്‍ 10,000 രൂപ വരെ പിഴയടയ്ക്കാന്‍ നിരവധി പേര്‍ക്ക് നോട്ടീസ് ലഭിച്ചിട്ടുണ്ട്. നിരവധി സ്ത്രീകള്‍ക്കെതിരെയും കേസെടുത്തിട്ടുണ്ട്. പൊതുമുതല്‍ നശിപ്പിച്ച കേസില്‍ അറസ്റ്റിലാവുന്നവര്‍ നശിപ്പിക്കപ്പെട്ട പൊതുമുതലിന്റെ മൂല്യത്തിന് തുല്യമായ തുക ജാമ്യത്തിനായി കെട്ടിവെക്കേണ്ട അവസ്ഥയുമുണ്ട്. കല്ലൊന്നിന് 5000 രൂപ വരെയാണ് ഈടാക്കുക. പൊതുമുതല്‍ നശിപ്പിച്ച കേസുകളില്‍ കുറ്റപത്രം നല്‍കുമെങ്കിലും അറസ്റ്റും റിമാന്‍ഡും ഉണ്ടാവില്ലെന്നാണ് സര്‍ക്കാര്‍ പറയുന്നത്. പിന്നീട് കേസ് പിന്‍വലിക്കുന്നത് സംബന്ധിച്ച് സര്‍ക്കാര്‍ തീരുമാനമെടുക്കുമെന്ന് പറയുന്നുണ്ടെങ്കിലും പൊതുമുതല്‍ നശിപ്പിച്ചതിനെടുത്ത കേസുകള്‍ പിന്‍വലിക്കാനാവില്ലെന്ന് സുപ്രീം കോടതി ഉത്തരവ് നിലനില്‍ക്കുന്നുണ്ട്.

സില്‍വര്‍ ലൈന്‍ ഉപേക്ഷിക്കാനുള്ള സര്‍ക്കാര്‍ തീരുമാനം വൈകി ഉദിച്ച വിവേകമാണ്. പ്രതിഷേധിച്ചവര്‍ക്കെതിരെ എടുത്ത പൊലീസ് കേസുകള്‍ പിന്‍വലിക്കുകയും പൊലീസിന്റെയും പാര്‍ട്ടി ഗുണ്ടകളുടെയും ക്രൂരമര്‍ദ്ദനത്തിനിരയായവര്‍ക്ക് നഷ്ടപരിഹാരം നല്‍കുകയും വേണം. മര്‍ദനത്തിനിരയായവരോട് സര്‍ക്കാര്‍ മാപ്പു ചോദിക്കുകയും വേണം. അനുമതി ലഭിക്കാത്ത പദ്ധതിക്കായി മൂന്നു വര്‍ഷം കൊണ്ട് 31 കോടി രൂപയാണ് സര്‍ക്കാര്‍ പൊടിച്ചത്. ഇതിന് കണക്കുപറയാതെ സര്‍ക്കാറിന് മുന്നോട്ടുപോകാനാവില്ല.

Continue Reading

Article

സാഹസികത അവിവേകത്തിന് വഴിമാറുമ്പോള്‍

പക്വത എത്താത്തവരുടെ ഡ്രൈവിംഗ് അവരുടെ ജീവന് ഭീഷണിയാണ് എന്ന് മാത്രമല്ല റോഡുപയോഗിക്കുന്ന മറ്റു നിരപരാധികള്‍ പോലും ഇരയാകുന്നത് സാധാരണമാണ്. ഇതിന് അറുതിവരുത്തേണ്ടത് രക്ഷിതാക്കള്‍ തന്നെയാണ്. മിക്ക സ്‌കൂളുകളിലേക്കും കുട്ടികള്‍ വാഹനവുമായി വരുന്നത് തടയുന്നുണ്ടെങ്കിലും സമീപ പ്രദേശങ്ങളില്‍ പാര്‍ക്ക് ചെയ്ത് വരുന്നതാണ് പതിവ്.

Published

on

എം.പി അബ്ദുല്‍ സുബൈര്‍

ആധുനികതയുടെ മാസ്മരികതയില്‍ വേഗതയുടെ ഉന്നതിയില്‍ ജീവിതം മറന്ന ഒരു വിഭാഗമാണ് സാഹസികത എന്ന തോന്നലില്‍ എന്തിനും തയ്യാറായ ന്യൂ ജനറേഷന്‍. ഇവരുടെ യാത്ര പ്രത്യേകിച്ച് ഇരുചക്ര വാഹന ഉപയോഗം അശാന്തിയുടെ അനന്തതയിലേക്ക് നീങ്ങുന്നത്. നിയമത്തെ കുറിച്ചുള്ള അജ്ഞതയല്ല അനുസരിക്കില്ലെന്ന വാശിയില്‍ നിന്നാണ് സാഹസികത അവിവേകത്തിന് വഴിമാറുന്നത്. ഇരുചക്ര വാഹനം സ്വന്തമാക്കിയാല്‍ ആദ്യമായി ചെയ്യുന്നത് ആ വാഹനത്തിന്റെ യാത്ര സുരക്ഷക്ക് വേണ്ടിയുള്ള ഉപകരണങ്ങള്‍ (റിയര്‍ വ്യൂ മിറര്‍, ക്രാഷ് ഗാര്‍ഡ്, സാരി ഗാര്‍ഡ്, സൈലന്‍സര്‍, ഹാര്‍ഡില്‍ ബാര്‍ തുടങ്ങിയവ) അഴിച്ചുമാറ്റുക എന്നതാണ്. പിന്നീടുള്ളയാത്ര ആരുണ്ടിവിടെ എന്നെ പിടിച്ചുകെട്ടാന്‍ എന്ന ഭാവത്തില്‍. ഈ അശ്വമേധത്തിന്റെ പര്യവസാനം മിക്കതും ദുരന്തമാണ്. സമൂഹത്തിന്റെ അല്ലെങ്കില്‍ കുടുംബത്തിന്റെ കണ്ണീരാണ് പിന്നെ കാണുക. പിന്നെ വിധിയെ പഴിച്ച് കാലം കഴിക്കും. വാട്ടര്‍ ബെഡുകളിലും വീല്‍ചെയറുകളിലും ഊന്നുവടികളിലും ശേഷിച്ച ജീവിതം കഴിച്ചുകൂട്ടുന്നവര്‍ സമൂഹത്തില്‍ വര്‍ധിക്കുന്നു. ഒരല്‍പം ശ്രദ്ധ ഇക്കാര്യത്തില്‍ ഉണ്ടായിരുന്നുവെങ്കില്‍ അമിത വേഗത ആപത്താണെന്നും ഒരിക്കലും എത്താതിരിക്കുന്നതിലും എത്രയോ ഭേദം അല്‍പം വൈകി എത്തുന്നതാണെന്നും റോഡ് നിയമങ്ങള്‍ രക്ഷക്കാണ് എന്നും വിചാരിച്ചിരുന്നെങ്കില്‍ ഒരുപക്ഷേ വിധി മറിച്ചാകുമായിരുന്നു.

ഹെല്‍മറ്റും സീറ്റ് ബെല്‍റ്റും ശരിയായ വിധത്തില്‍ ഉപയോഗിച്ചെങ്കില്‍ മാത്രമേ കാര്യമുള്ളൂ. മറ്റാര്‍ക്കോ വേണ്ടിയാവരുത്. ഗുണമേന്‍മയുള്ള ഹെല്‍മറ്റ് നിര്‍ദ്ദേശാനുസരണം ധരിച്ച് മാത്രം അപകടത്തില്‍ നിന്ന് രക്ഷപ്പെട്ടത് പുനര്‍ജന്മമായി അഭിമാനത്തോടെ പറയുന്നവരെ കണ്ടിട്ടുണ്ട്. അതുകൊണ്ടാണ് ഇരുചക്രവാഹനങ്ങളിലെ എല്ലാവരും ഹെല്‍മെറ്റ് അണിയണമെന്ന് നിര്‍ദ്ദേശം വന്നത്. ജീവീതം നടുറോഡില്‍ തകര്‍ത്ത് കളയാനുള്ളതല്ല സന്തോഷിച്ച് കുടുംബത്തോടെ ആസ്വദിച്ച് നന്മ ചെയ്ത് ജീവിക്കാനുള്ളതാണ്. മക്കളുടെ പഠനകാര്യത്തിലും മറ്റും പ്രോത്സാഹനം നല്‍കുന്നതിനായി ഇരുചക്ര വാഹനങ്ങള്‍ വാഗ്ദാനം നല്‍കുകയും പ്രായപൂര്‍ത്തിയാകാത്ത പക്വത എത്താത്ത കുട്ടികള്‍ക്ക് വാഹനം വാങ്ങികൊടുക്കുന്ന രക്ഷിതാക്കളുമുണ്ട്. പ്രവാസികള്‍ നാട്ടിലെത്തുമ്പോള്‍ ഉപയോഗിക്കുന്ന വാഹനങ്ങള്‍ മാതാപിതാക്കളുടെ മൗനാനുവാദത്തോടെ ദുരുപയോഗം ചെയ്യുന്ന സാഹചര്യവും വിരളമല്ല. സ്‌കൂളുകളില്‍ പി.ടി.എ മീറ്റിംഗിന് അമ്മമാരെ എത്തിക്കുന്നത് മോട്ടോര്‍ സൈക്കിളില്‍ അതേ സ്‌കൂളിലെ കുട്ടികള്‍ തന്നെ എന്നത് വിരോധാഭാസം തന്നെയല്ലെ? ഇത്തരത്തിലുള്ള പ്രവര്‍ത്തി മൂലം ദുരന്ത മുഖങ്ങളില്‍പെട്ട് ജീവിതകാലം മുഴുവന്‍ യാതന അനുഭവിക്കാന്‍ വിധിക്കപ്പെട്ട് തീരാദുഃഖവുമായി കഴിയുന്ന മാതാപിതാക്കള്‍ക്ക് ഉത്തരവാദിത്വത്തില്‍നിന്നും ഒഴിഞ്ഞ് മാറാനാകുമോ?

പക്വത എത്താത്തവരുടെ ഡ്രൈവിംഗ് അവരുടെ ജീവന് ഭീഷണിയാണ് എന്ന് മാത്രമല്ല റോഡുപയോഗിക്കുന്ന മറ്റു നിരപരാധികള്‍ പോലും ഇരയാകുന്നത് സാധാരണമാണ്. ഇതിന് അറുതിവരുത്തേണ്ടത് രക്ഷിതാക്കള്‍ തന്നെയാണ്. മിക്ക സ്‌കൂളുകളിലേക്കും കുട്ടികള്‍ വാഹനവുമായി വരുന്നത് തടയുന്നുണ്ടെങ്കിലും സമീപ പ്രദേശങ്ങളില്‍ പാര്‍ക്ക് ചെയ്ത് വരുന്നതാണ് പതിവ്. രക്ഷിതാക്കളും നാട്ടുകാരും അധ്യാപകരും ഒത്തൊരുമിച്ച് പക്വതയില്ലാത്തവരുടെ ഡ്രൈവിംഗ് കര്‍ശനമായും തടയേണ്ടതാണ്. പുതിയ വാഹന നിയമത്തിലെ ശിക്ഷ കടുത്തതാണ് എന്നും ആധുനിക ഇലക്ട്രോണിക്‌സ് ഉപകരങ്ങള്‍ ഉപയോഗിച്ചുള്ള പരിശോധന വാഹനങ്ങള്‍ വിറ്റാല്‍ പോലും പിഴ അടക്കാന്‍ തികയാതെ വരുമെന്നും മനസ്സിലാക്കുക.

അപകടം വരുത്തുന്ന ഡ്രൈവര്‍മാര്‍ ഭൂരിഭാഗവും ലൈസന്‍സ് എടുത്ത് രണ്ട് മൂന്ന് വര്‍ഷത്തിനുള്ളിലാണ്. അത് അവരുടെ പരിചയകുറവും അമിതമായ ആത്മവിശ്വാസവുംമൂലം സംഭവിക്കുന്നതാണ്. ഡ്രൈവിംഗ് ആരംഭിക്കുന്നതിന്റെ ആദ്യഘട്ടത്തില്‍ മിതവേഗത്തില്‍ വളരെ ശ്രദ്ധയോടെ വാഹനം ഓടിക്കണം എന്നാണ് ഇത് സൂചിപ്പിക്കുന്നത്. വാഹന സാന്ദ്രത ഏറെ വര്‍ധിച്ചുവരുന്ന ഈ കാലഘട്ടത്തില്‍ കാര്യക്ഷമതയോടെ നിയമങ്ങള്‍ പാലിച്ചുകൊണ്ട് ക്ഷമയോടുകൂടി വാഹനം ഓടിച്ചെങ്കില്‍ മാത്രമേ സുരക്ഷിതയാത്ര ഉറപ്പ് വരുത്താനാകൂ. ഡ്രൈവിംഗ് എന്ന ജോലിക്കിടെ മറ്റു പ്രവര്‍ത്തനങ്ങള്‍ (മൊബൈല്‍ ഫോണ്‍, വെള്ളം കുടിക്കുക, റേഡിയോ ട്യൂണിംഗ് തുടങ്ങിയവ) നിര്‍ബന്ധമായും ഒഴിവാക്കിയേ മതിയാവൂ. ഡ്രൈവ് ചെയ്യുമ്പോള്‍ നൂറ് ശതമാനം ശ്രദ്ധയും ഡ്രൈവിംഗില്‍ തന്നെയാവണം. കൊച്ചുകുട്ടികളെ മടിയിലിരുത്തിയുള്ള ഡ്രൈവിംഗും ഉറക്കിനെ വെല്ലുവിളിച്ചുള്ള ഡ്രൈവിംഗും ലഹരിക്കടിമപ്പെട്ടുള്ള ഡ്രൈവിംഗും നിരുല്‍സാഹപ്പെടുത്തണം.

2018 ന് ശേഷം പുതുതായി വന്നുചേര്‍ന്ന പ്രതിഭാസമാണ് വിദ്യാര്‍ത്ഥികളുടെയും യുവാക്കളുടെയും വിനോദയാത്രകളിലും പഠനയാത്രകളിലും ഉള്ള സാഹസികത എന്നറിയപ്പെടുന്ന യുവതയുടെ വഴിവിട്ട ആഭാസങ്ങള്‍. ശബ്ദ മലിനീകരണത്തിലൂന്നിയ ആഭാസങ്ങളും ഡാന്‍സിംഗ് ലൈറ്റുകളും ചെന്നെത്തിക്കുന്നത് നന്മയേക്കാളേറെ തിന്‍മയിലേക്കാണ്. പാട്ടിനൊപ്പം താളംപിടിച്ച് ഗിയര്‍ ലിവര്‍ മറ്റുള്ളവരെ ഏല്‍പിച്ച് മാസ്മരികതയുടെ അനുഭൂതിയില്‍ വാഹനം ഓടിക്കുന്ന ഡ്രൈവറുടെ പ്രവൃത്തി നാം കണ്ടതാണ്. ഇവരെ നിലക്ക് നിര്‍ത്താന്‍ നിലവിലെ ശിക്ഷ മതിയാവില്ല. വാഹന ഉടമകള്‍ നിലനില്‍പ്പിനായി പുതിയ ട്രെന്റിലേക്ക് മാറുമ്പോള്‍ യാത്രകള്‍ ദുരന്തത്തിലേക്ക് വഴിമാറുന്നു. അറിഞ്ഞോ അറിയാതെയോ രക്ഷിതാക്കളും അധ്യാപകരും ഡ്രൈവര്‍മാരും അതിന്റെ ഭാഗമാകുന്നു. അല്‍പം അശ്രദ്ധ ആയുസിന്റെ കണ്ണീരാണെന്നതും നിങ്ങളുടെ ഈ മൗനം കാത്തിരിക്കുന്നവരുടെ കണ്ണീരിലാണ് അവസാനിക്കുക എന്ന പ്രപഞ്ച സത്യം മനസിലാക്കുക.

കൂടെ യാത്രചെയ്യുന്ന യാത്രാസംഘ മേധാവിമാരും ടൂര്‍ ഓപറേറ്റര്‍മാരും വാഹന ഉടമകള്‍ക്കും ഇതില്‍നിന്നും ഒഴിഞ്ഞുമാറാന്‍ പറ്റില്ല. അവരുടെ മൗനം ഇവര്‍ക്ക് പ്രോത്സാഹനമാണ്. സാഹസികതക്ക് ഉത്സാഹം കൂട്ടുന്ന എല്ലാത്തരം ഉപകരണങ്ങളും ഇത്തരം യാത്രകളില്‍ ബന്ധപെട്ടവര്‍ ഒരുക്കിവെക്കുന്നു എന്നത് ഭയപ്പെടുത്തുന്നു. വാഹന നിയമം അവര്‍ക്കതിരെ ഉപയോഗിച്ചാല്‍ മാത്രം ഈ കുറ്റങ്ങള്‍ കുറയുകയില്ല. ഇത്തരത്തിലുള്ളവര്‍ക്കെതിരെ ഐ.പി.സി പ്രകാരം ക്രിമിനല്‍ കേസ് എടുത്താല്‍ മാത്രമേ ഇവ പൂര്‍ണമായും നിര്‍ത്താന്‍ സാധിക്കുകയുള്ളൂ. വാഹനാപകടങ്ങള്‍ ആകസ്മികവും മനുഷ്യ ശേഷിക്ക് അപ്പുറവുമായി സംഭവിക്കുന്നതിനാല്‍ വാഹന യാത്ര തുടങ്ങുന്നതിന് മുമ്പ് ഈ വാഹനം നിങ്ങള്‍ക്ക് അധീനപ്പെടുത്തി തന്ന പ്രപഞ്ച നാഥനെ സ്മരിച്ച് അവനില്‍ ഭരമേല്‍പ്പിച്ചുകൊണ്ടാകട്ടെ യാത്രകള്‍.
(തിരൂരങ്ങാടി ജോയിന്റ് ആര്‍.ടി.ഒ ആ ണ് ലേഖകന്‍)

Continue Reading

Trending