ഫാത്തോര്ദ: സൂപ്പര് കപ്പ് ഗ്രൂപ്പ് ഡി-യിലെ നിര്ണായക മത്സരത്തിനായി കേരള ബ്ലാസ്റ്റേഴ്സ് എഫ്.സി നാളെ രാത്രി 7:30-ന് ഫാത്തോര്ദയിലെ ജവഹര്ലാല് നെഹ്റു സ്റ്റേഡിയത്തില് മുംബൈ സിറ്റി എഫ്.സിയെ നേരിടും. തുടര്ച്ചയായ രണ്ട് ജയങ്ങളുടെ ആത്മവിശ്വാസത്തിലാണ് മഞ്ഞപ്പട കളത്തിലിറങ്ങുന്നത്.
മത്സരം സമനിലയായാലും സെമിഫൈനല് സ്ഥാനം ഉറപ്പിക്കാം, എങ്കിലും മൂന്ന് പോയിന്റ് ലക്ഷ്യമിട്ട് ഗ്രൂപ്പ് ഘട്ടം മികച്ച രീതിയില് പൂര്ത്തിയാക്കാനാണ് ബ്ലാസ്റ്റേഴ്സിന്റെ നീക്കം.
ഇതിനകം കളിച്ച രണ്ട് മത്സരങ്ങളില് നിന്ന് ആറ് പോയിന്റ് നേടി ബ്ലാസ്റ്റേഴ്സ് ഗ്രൂപ്പില് ഒന്നാമതുണ്ട്. കാറ്റലയുടെ പരിശീലന ശൈലിയുടെ പ്രതിഫലനമായി ടീമിന്റെ കളിയില് നിയന്ത്രണവും ലക്ഷ്യബോധവും വ്യക്തമാണ്. സ്പാനിഷ് സ്ട്രൈക്കര് കോള്ഡോ ഒബിയേറ്റ ആദ്യ രണ്ട് മത്സരങ്ങളില് മൂന്ന് ഗോളുകള് നേടി ഉജ്ജ്വല ഫോമിലാണ്. ഹുവാന് റോഡ്രിഗസും ബികാഷ് യുമ്നവും അടങ്ങിയ പ്രതിരോധ നിര ഇതുവരെ ഒരു ഗോള്പോലും വഴങ്ങിയിട്ടില്ല.
നാല് ഗോളുകള് നേടി, രണ്ട് ക്ലീന് ഷീറ്റുകള് സ്വന്തമാക്കിയ ബ്ലാസ്റ്റേഴ്സ് ഈ ടൂര്ണമെന്റിലെ മികച്ച ടീമുകളില് ഒന്നായി വിലയിരുത്തപ്പെടുന്നു.
മറ്റുവശത്ത്, മുംബൈ സിറ്റി എഫ്.സി.യ്ക്കിത് ”ജയിക്കേണ്ടതേ ഉള്ളൂ” എന്ന അവസ്ഥയാണ്. കഴിഞ്ഞ മത്സരത്തില് രാജസ്ഥാന് യുണൈറ്റഡിനോട് തോറ്റതോടെ അവര് മൂന്നു പോയിന്റുമായി രണ്ടാമതുണ്ട്. സെമിഫൈനല് സാധ്യത നിലനിര്ത്താന് ജയം അനിവാര്യമാണ്, അതും മികച്ച ഗോള് മാര്ജിനോടെ. ജയത്തില് കുറവൊന്നും മുംബൈയെ പുറത്താക്കും. അതിനാല് പീറ്റര് ക്രാറ്റ്കിയുടെ ടീം ശക്തമായ ആക്രമണത്തോടെയാകും കളത്തിലിറങ്ങുക.
ഇരു ടീമിനും നിര്ണായകമായ ഈ മത്സരം കടുത്ത പോരാട്ടമാകുമെന്ന് ഉറപ്പ്. സെമിയിലേക്ക് കാല്വെയ്ക്കാനൊരുങ്ങുന്ന കേരള ബ്ലാസ്റ്റേഴ്സ്, മികച്ച പ്രകടനത്തോടെ ആത്മവിശ്വാസം ഇരട്ടിയാക്കാനാണ് ശ്രമിക്കുക.