Connect with us

News

അര്‍ജന്റീന വീണ ഗ്രൗണ്ടില്‍ ബ്രസീല്‍ ഇന്നിറങ്ങും

ബ്രസീലിന് ആശ്വാസമുള്ള നല്ല വാര്‍ത്ത രാത്രി വൈകിയാണ് ഈ മല്‍സരം എന്നതാണ്. അര്‍ജന്റീനക്കാര്‍ നട്ടുച്ചക്കാണ് ഇവിടെ കളിച്ചത്.

Published

on

ലുസൈല്‍ എന്ന വേദി തല്‍ക്കാലം അര്‍ജന്റീനക്കാര്‍ മറക്കാന്‍ ആഗ്രഹിക്കുന്നു. ഖത്തര്‍ ലോകകപ്പിലെ ഏറ്റവും വലിയ വേദി. 80,000 പേര്‍ക്ക് സുന്ദരമായി കളി കാണാം. പക്ഷേ അവിടെ കഴിഞ്ഞ ദിവസം അര്‍ജന്റീനക്കാരെ സഊദി അറേബ്യക്കാര്‍ വെള്ളം കുടിപ്പിച്ച കാഴ്ച്ച ബ്രസീലുകാരും കണ്ടിരുന്നു. അതേ വേദിയില്‍ ഗ്രൂപ്പ് ജി പോരാട്ടത്തില്‍ ഇന്ന് ടിറ്റേയും സംഘവുമിറങ്ങുമ്പോള്‍ മറുഭാഗത്ത് സെര്‍ബിയ.

ബ്രസീലിന് ആശ്വാസമുള്ള നല്ല വാര്‍ത്ത രാത്രി വൈകിയാണ് ഈ മല്‍സരം എന്നതാണ്. അര്‍ജന്റീനക്കാര്‍ നട്ടുച്ചക്കാണ് ഇവിടെ കളിച്ചത്. രണ്ടാം പകുതിയില്‍ മെസിയും സംഘവും ആകെ തളര്‍ന്നപ്പോള്‍ പരിചിതമായ അറേബ്യന്‍ കാലാവസ്ഥയില്‍ സഊദിക്കാര്‍ വെട്ടിത്തിളങ്ങുകയായിരുന്നു. അര്‍ജന്റീനയുടെ തോല്‍വി ബ്രസീലിനും പല പാഠങ്ങള്‍ നല്‍കുന്നുണ്ട്. പ്രതിയോഗികളെ വില കുറച്ച് കാണരുത്. അര്‍ജന്റീന സഊദിയെ ദുര്‍ബലരായി കണ്ടു. ആദ്യം മെസിയുടെ പെനാല്‍ട്ടി ഗോള്‍ വന്നപ്പോള്‍ പാട്ടും പാടി മല്‍സരം ജയിക്കാമെന്ന് കരുതി.

പക്ഷേ 90 മിനുട്ടാണ് ഫുട്‌ബോള്‍ എന്ന കാര്യം മറന്നു. ബ്രസീല്‍ കോച്ച് ടിറ്റേ അനുഭവ സമ്പന്നനാണ്. തുടര്‍ച്ചയായി രണ്ടാം ലോകകപ്പില്‍ ടീമിനെ ഒരുക്കുന്നു. ടെലി സന്ദാനക്ക് ശേഷം ആദ്യമായാണ് ബ്രസീല്‍ ഒരു പരിശീലകന് തുടര്‍ച്ചയായി രണ്ട് ലോകകപ്പുകളില്‍ അവസരം നല്‍കുന്നത്. അഞ്ച് ലോകകപ്പുകളില്‍ മുത്തമിട്ടവര്‍. പക്ഷേ 2002 ലെ വിജയത്തിന് ശേഷം ഒരു തവണ മാത്രമാണ് ബ്രസീലിന് ലോകകപ്പ് അവസാന നാലില്‍ പ്രവേശിക്കാനായത്. മറ്റ് മൂന്ന് തവണ ക്വാര്‍ട്ടര്‍ ഫൈനലില്‍ തോല്‍ക്കാനായിരുന്നു വിധി. റഷ്യയില്‍ ബെല്‍ജിയത്തിനോട് പരാജയപ്പെട്ടായിരുന്നു നെയ്മറും സംഘവും പുറത്തായത്. റഷ്യയിലെ തോല്‍വികള്‍ക്ക് കാരണമായി ടിറ്റേ പറഞ്ഞത് വലിയ വേദിയിലെ തന്റെ അപരിചിതത്വമായിരുന്നു. സ്വിറ്റ്‌സര്‍ലന്‍ഡിനെതിരായ മല്‍സരത്തിന് മുമ്പ് റഫറിയിംഗില്‍ പരാതിപ്പെടരുതെന്നും വീഡിയോ റഫറിയുണ്ടെന്നുമെല്ലാം ഞാന്‍ കളിക്കാരോട് പറഞ്ഞിരുന്നു. ഇത് കാരണം നഷ്ടങ്ങളാണ് സംഭവിച്ചത്. പിന്നെ ആ തീരുമാനം മാറ്റി. ആ അപരിചിതത്വം ഇപ്പോഴില്ലെന്ന് അദ്ദേഹം പറഞ്ഞു. യോഗ്യതാ റൗണ്ടില്‍ തോല്‍വിയില്ല. 1982 ന് ശേഷം തുടരുന്ന വന്‍കരാധിപത്യം നിലനിര്‍ത്തി.

നെയ്മര്‍ തന്നെ കോച്ചിന്റെ വജ്രായുധം. മൂന്നാമത് ലോകകപ്പ് കളിക്കുന്ന അദ്ദേഹം തന്നെ പറഞ്ഞിരിക്കുന്നു ഇനിയൊരു ലോകകപ്പിനില്ലെന്ന്. ഖത്തറില്‍ മൂന്ന് ഗോള്‍ കൂടി സ്‌കോര്‍ ചെയ്താല്‍ ബ്രസീലിന് വേണ്ടി ഏറ്റവുമധികം ഗോളുകള്‍ സ്വന്തമാക്കിയ താരമെന്ന പെലെയുടെ ബഹുമതി നെയ്മറിലെത്തും. പി.എസ്.ജിക്കായി സീസണില്‍ നല്ല ഫോമിലാണ് 30കാരന്‍. ആറ് ഗോളുകള്‍ സ്‌കോര്‍ ചെയ്തു. രണ്ട് ഗോളുകള്‍ക്ക് സഹായവും നല്‍കി. മൂന്ന് ലോകകപ്പ് കളിച്ചവരാണ് സെര്‍ബിയക്കാര്‍. പക്ഷേ ഒന്നില്‍ പോലും മുന്നേറാന്‍ അവര്‍ക്കായിരുന്നില്ല. പ്രധാന താരങ്ങളായ സാസാ ലുകിച്ച്, ഫിലിപ് കോസ്റ്റിച്ച്, അലക്‌സാണ്ടര്‍ മിത്രോവിച്ച് എന്നിവരുടെ പരിക്കുകള്‍ ടീമിനെ അലട്ടുന്നുണ്ട്. പരിക്കില്‍ പരിഭ്രമമില്ലെന്നാണ് ടീമിന്റെ പരിശീലകന്‍ ഡ്രാഗണ്‍ സ്‌റ്റേകോവിച്ച് പറയുന്നത്. അത് എല്ലാവര്‍ക്കും സംഭവിക്കാവുന്നതാണ്. പ്രീമിയര്‍ ലീഗില്‍ ഫുള്‍ഹാമിന് വേണ്ടി കളിക്കുന്ന അലക്‌സാണ്ടര്‍ മിത്രോവിച്ചാണ് സെര്‍ബിയന്‍ നിരയിലെ അപകടകാരി.

News

മെസ്സി അവതരിച്ചു; മെക്‌സിക്കോയെ രണ്ടു ഗോളിന് തകര്‍ത്ത് അര്‍ജന്റീന

ആദ്യ മത്സരത്തിലെ തോല്‍വിക്ക് ശേഷം അര്‍ജന്റീനയുടെ ഗംഭീര തിരിച്ചുവരവ്.

Published

on

ആദ്യ മത്സരത്തിലെ തോല്‍വിക്ക് ശേഷം അര്‍ജന്റീനയുടെ ഗംഭീര തിരിച്ചുവരവ്. മെക്സിക്കോയ്ക്കെതിരെ എതിരില്ലാത്ത രണ്ട് ഗോളിനാണ് അര്‍ജന്റീന ജയിച്ചുകയറിയത്. ഗോളും അസിസ്റ്റുമായി തിളങ്ങിയ ക്യാപ്റ്റന്‍ ലിയോണല്‍ മെസിയാണ് അര്‍ജന്റീനയുടെ ഹീറോ.

എന്‍സോ ഫെര്‍ണാണ്ടസിന്റെ വകയായിരുന്നു രണ്ടാം ഗോള്‍.

 

Continue Reading

News

ഡെന്മാര്‍ക്കിനേയും വീഴ്ത്തി; ഫ്രാന്‍സ് പ്രീക്വാര്‍ട്ടറില്‍

പന്ത് കൈവശം വയ്ക്കുന്നതില്‍ ഇരു ടീമുകളും തുല്യരായിരുന്നെങ്കിലും ഫ്രാന്‍സിന്റെ പോരാട്ടം ഒരുപടി മുന്‍പിലായിരുന്നു.

Published

on

ലോകകപ്പില്‍ വിജയകുതിപ്പ് തുടര്‍ന്ന് ഫ്രാന്‍സ്. ഡെന്മാര്‍ക്കിനെതിരെയുള്ള പോരാട്ടത്തില്‍ ഒന്നിനെതിരെ രണ്ടു ഗോളുകള്‍ക്ക് ഫ്രാന്‍സ് വിജയിച്ചു.

ഫ്രാന്‍സ് സൂപ്പര്‍താരം കിലിയന്‍ എംബാപ്പയാണ് ഫ്രാന്‍സിനു വേണ്ടി രണ്ടു ഗോളുകളും നേടിയത്. ആദ്യപകുതി ഗോള്‍ രഹിതമായിരുന്നു. 61ാം മിനുട്ടിലാണ് ആദ്യ ഗോള്‍ ഫ്രാന്‍സ് നേടുന്നത്. എന്നാല്‍ ഈ സന്തോഷം അധികം നീണ്ടു നിന്നില്ല. 68ാം മിനിറ്റില്‍ ഡെന്മാര്‍ക്കിന്റെ ക്രിസ്റ്റെന്‍സന്റെ ഗോളിലൂടെ അവര്‍ തിരിച്ചടിച്ചു. എന്നാല്‍ 86ാം മിനിറ്റില്‍ എംബാപ്പ അതിന് പകരം ചോദിച്ചു. പന്ത് കൈവശം വയ്ക്കുന്നതില്‍ ഇരു ടീമുകളും തുല്യരായിരുന്നെങ്കിലും ഫ്രാന്‍സിന്റെ പോരാട്ടം ഒരുപടി മുന്‍പിലായിരുന്നു.

Continue Reading

News

ലാ..ലിബെര്‍തേ..ലാ..ലിബെര്‍തേ…. പോരാട്ട ഗീതങ്ങളാല്‍ സംഗീത സാന്ദ്രമാവുന്ന സൂഖിലെ പാതിര

ഉറങ്ങാത്ത സൂഖ് വാഖിഫ് കാണാന്‍ കഴിഞ്ഞ ദിവസം വീണ്ടുമെത്തിയതായിരുന്നു. അര്‍ധരാത്രി രണ്ടര മണി പിന്നിട്ടിട്ടും എങ്ങും ആരവങ്ങള്‍. വിവിധ രാജ്യക്കരായ ഫുട്ബോള്‍ ആരാധകര്‍ കൊടികളുമായി നൃത്തം ചെയ്യുന്നു..

Published

on

ദോഹ ദവാര്‍

അശ്റഫ് തൂണേരി

ദോഹ:ഉറങ്ങാത്ത സൂഖ് വാഖിഫ് കാണാന്‍ കഴിഞ്ഞ ദിവസം വീണ്ടുമെത്തിയതായിരുന്നു. അര്‍ധരാത്രി രണ്ടര മണി പിന്നിട്ടിട്ടും എങ്ങും ആരവങ്ങള്‍. വിവിധ രാജ്യക്കരായ ഫുട്ബോള്‍ ആരാധകര്‍ കൊടികളുമായി നൃത്തം ചെയ്യുന്നു.. മുദ്രാവാക്യങ്ങള്‍.. കൈയ്യില്‍ കൊണ്ടു നടക്കുന്ന മൈക്കില്‍ പാട്ടുപാടുന്നവരും റെക്കോര്‍ഡിട്ട് താളത്തില്‍ തുള്ളുന്നവരും. റസ്റ്റോറന്റുകളിലേയും കോഫി ഷോപ്പുകളിലേയും നടപ്പാതയിലെ ഇരിപ്പിടങ്ങളില്‍ രുചിയാസ്വദിക്കുന്നവരുടേയും ഹുക്ക നീട്ടിവലിക്കുന്നവരേയും നീണ്ടനിര.

കൈക്കുഞ്ഞുമായുള്ളവരുള്‍പ്പെടെ സ്ത്രീകളും കുട്ടികളും വൃദ്ധരുമെല്ലാം ഒഴുകിക്കൊണ്ടേയിരിക്കുന്നു. ഏറ്റവും പഴക്കം ചെന്ന ഹോട്ടലായ ബിസ്മില്ല ഹോട്ടലിനരികെയെത്തിയപ്പോഴാണ് ഒരേ താളത്തില്‍ പാട്ടും ഏറ്റുപാടലും കേട്ടത്. ബിസ്മില്ലയും പിന്നിട്ട് മുശൈരിബ് ഭാഗത്തേക്ക് പോവുമ്പോള്‍ കോര്‍ണറിലായുള്ള ദി വില്ലേജ് ഹോട്ടലിന്റെ അരികുഭിത്തിയില്‍ കയറി നിന്ന കുറേ ചെറുപ്പക്കാര്‍ അള്‍ജീരിയ, തുനീഷ്യ, മൊറോക്കോ, ഫലസ്തീന്‍ പതാകകള്‍ വീശുന്നുണ്ട്. അവരും ഇടവഴി മുഴുവന്‍ തിങ്ങിനിറഞ്ഞു നില്‍ക്കുന്ന യുവാക്കളും യുവതികളും ഒരുമിച്ചു പാടുകയാണ്. ലാ..ലിബെര്‍തേ..ലാ..ലിബെര്‍തേ…. നമ്മിലും ആവേശം ജനിപ്പിക്കുന്ന വരികള്‍. ഒന്ന് നിന്നു. പാടുന്നവരും ഏറ്റുപാടുന്നവരും ഏറിക്കൊണ്ടേയിരുന്നു. പാട്ടിലെ വരികളറിയാന്‍ താത്പര്യം ഏത് കേള്‍വിക്കാരനും തോന്നും. അടുത്തുണ്ടായിരുന്ന അറബ് വംശജനെന്ന് തോന്നിയ യുവാവിനോട് ഈ പാട്ട്…. എന്നൊരു സംശയം

പറയേണ്ട താമസം അയാള്‍: ഇതൊരു സ്വാതന്ത്ര്യപ്പോരാട്ട ഗാനമാണ്. 2019-ല്‍ അള്‍ജീരിയ ആവേശത്തോടെ ഏറ്റെടുത്ത ഗാനം. സൂള്‍കിംഗ് എന്ന് വിളിപ്പേരുള്ള അള്‍ജീരിയന്‍ യുവഗായകനും റാപ്പറുമായ അബ്ദുര്‍റഊഫ് ദെറാദ്ജിയാണ് പാടുന്നത്. പാരീസില്‍ രേഖകളില്ലാതെ അഭയാര്‍ത്ഥിയായി താമസിക്കുകയാണ് സൂള്‍കിംഗ്. അള്‍ജീരിയന്‍ തെരുവുകളിലെ സമരപോരാട്ടങ്ങളില്‍ ഉയര്‍ന്നുകേട്ട ഈ ഗാനം ഭരണാധികാരി അബ്ദുല്‍അസീസ് ബൂത്തെഫല്‍ക്കയെ രാജിയിലേക്ക് പ്രേരിപ്പിച്ച ഒരു കലാവിഷ്‌കാരം കൂടിയായി മാറിയതോടെ കൂടുതല്‍ ജനകീയമായി. 2019 മാര്‍ച്ചില്‍ യൂടുബില്‍ അപ്ലോഡ് ചെയ്ത ഈ ഗാനം കോടിക്കണക്കിനു പേര്‍ ഇതിനം കാണുകയും കേള്‍ക്കുകയും ചെയ്തു. (339,136,156 കാഴ്ചക്കാര്‍). അള്‍ജീരിയന്‍ ഫുട്ബോള്‍ സ്റ്റേഡിയങ്ങളിലെ സംഗീത ബാന്റായ ഔലെദ് എല്‍ ബഹ്ദ്ജ എന്ന ഗ്രൂപ്പില്‍ നിന്നുള്ള ഒരു ഗാനമാണിത്. കുറച്ചുവരികള്‍ അവര്‍ക്ക് വേണ്ടി സൂള്‍കിംഗ് ഫ്രഞ്ചില്‍ എഴുതുകയായിരുന്നു. ലാലിബെര്‍തെയെന്നാല്‍ സ്വാതന്ത്ര്യം. അവസാന ഭാഗത്ത് അറബ് വരികളും ഇടകലരുന്നു. ഫുട്ബോള്‍ ആവേശത്തിനായി രചിച്ച് ഈണം പകര്‍ന്ന ആ പാട്ട് പിന്നീട് സമരഗാനമായി മധ്യപൂര്‍വ്വേഷ്യയെ പിടിച്ചുകുലുക്കി. വീണ്ടും ഫുട്ബോള്‍ ആവേശഗാനമായി, സമരപോരാട്ട വീര്യമായി ഖത്തറിലെത്തിയിരിക്കുന്നു.സൂഖ് വാഖിഫിന്റെ ഇടനാഴികളില്‍… ലാ..ലിബെര്‍തേ..ലാ..ലിബെര്‍തേ.. പാടുമ്പോള്‍ അറബ് ദേശക്കാര്‍ക്കൊപ്പം ഏറ്റുപാടുന്നവര്‍ രാജ്യാതിര്‍ത്തിയില്ലാത്തവരാണ്. ഫുട്ബോള്‍ മാത്രം അതിരുകണ്ടവര്‍.

Continue Reading

Trending