ഗസ്സയിലേക്ക് ആവശ്യസാധനങ്ങളുമായി പോയ സുമൂദ് ഫ്‌ലോട്ടില്ലയെ ഇസ്രാഈല്‍ സൈന്യം കസ്റ്റഡിയിലെടുത്തതിനു പിന്നാലെ തങ്ങള്‍ നേരിട്ട ക്രൂര അനുഭവങ്ങള്‍ തുറന്ന് പറഞ്ഞ് ഫ്‌ലോട്ടില ആക്ടിവിസ്റ്റുകള്‍. ഫ്രീഡം ഫ്‌ലോട്ടില ബോട്ടുകളിലെ 450 ഓളം മനുഷ്യാവകാശ പ്രവര്‍ത്തകരെയാണ് ഇസ്രാഈല്‍ സൈന്യം അറസ്റ്റ് ചെയ്തത്. കസ്റ്റഡിയില്‍ ക്രൂരമായി പീഡിപ്പിക്കുകയും ഒടുവില്‍ നാടുകടത്തപ്പെടുകയും ചെയ്ത ആക്ടിവിസ്റ്റുകളാണ് തുറന്നു പറച്ചിലുമായി രംഗത്തെത്തിയിരിക്കുന്നത്.

ഇസ്രാഈല്‍ സൈന്യം തങ്ങളോട് വളരെ ക്രൂരമായി പെരുമാറിയെന്നും ഞങ്ങള്‍ക്ക് നേരെ തോക്കുകള്‍ ചൂണ്ടി നിലത്ത് വലിച്ചിഴച്ചെന്നും ആക്ടിവിസ്റ്റുകള്‍ പറഞ്ഞു. ടോയ്ലറ്റിലെ വെള്ളം കുടിക്കാന്‍ നല്‍കിയതായും ഒക്ടോബര്‍ ഒന്നിനാണ് അവസാനമായി ഭക്ഷണം കഴിച്ചതെന്നും തിരിച്ച് എത്തിയിട്ടാണ് പിന്നീട് ഭക്ഷണം കഴിച്ചതെന്നും അവര്‍ വെളിപ്പെടുത്തി. മൂന്ന് ദിവസം ഭക്ഷണം കഴിക്കാതെ ടോയ്ലറ്റ് വെള്ളം മാത്രമാണ് കുടിച്ചതെന്നും അവര്‍ പറഞ്ഞു.

മണിക്കൂറോളം മുട്ടുകുത്തിച്ച് നിര്‍ത്തുകയും തലതാഴ്ത്തി ഇരിക്കാന്‍ ആവശ്യപ്പെടുകയും ചെയ്തു. ഇടക്കൊന്ന് മുകളിലേക്ക് നോക്കിയപ്പോള്‍ തലക്ക് പിന്നില്‍ വന്ന് അടിച്ചെന്നും മറ്റൊരു ആക്ടിവിസ്റ്റ് പറഞ്ഞു. കൈകള്‍ സിപ്പ് ടൈകള്‍ കൊണ്ട് ബന്ധിച്ച് മണിക്കൂറുകളോളം ജയില്‍ വാനില്‍ കിടത്തിയെന്നും അപര്‍ പറഞ്ഞു.

നേരത്തെ, പരിസ്ഥിതി പ്രവര്‍ത്തക ഗ്രേറ്റ തുന്‍ബര്‍ഗിന് നേരെ അതിക്രമത്തിന്റെ വിവരങ്ങള്‍ പുറത്തുവന്നിരുന്നു. ഇസ്രാഈലി സൈനികര്‍ മുടിയില്‍ പിടിച്ചുവലിച്ചെന്നും ഇസ്രാഈല്‍ പതാക ചുംബിക്കാന്‍ നിര്‍ബന്ധിച്ചെന്നും ഒപ്പമുണ്ടായിരുന്ന മനുഷ്യാവകാശ പ്രവര്‍ത്തകര്‍ പറഞ്ഞിരുന്നു. മൃഗങ്ങളെ പോലെയാണ് ഇസ്രാഈല്‍ ഞങ്ങളെ പരിഗണിച്ചത്. ഭക്ഷണവും വെള്ളവും മരുന്നുകളും നല്‍കിയില്ലെന്നും പറഞ്ഞു.