സംസ്ഥാനത്ത് കനത്ത മഴയെ തുടര്ന്ന് കാസര്ഗോഡ് ജില്ലയിലെ വിദ്യാഭ്യാസ സ്ഥാപനങ്ങള്ക്ക് നാളെ അവധി. പ്രൊഫഷണല് കോളേജുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്ക് നാളെ ജില്ലാ കളക്ടര് അവധി പ്രഖ്യാപിച്ചു. ട്യൂഷന് സെന്ററുകള്, അങ്കണവാടികള്, മദ്രസകള് എന്നിവയ്ക്കും ബാധകമാണ്. മോഡല് റസിഡന്ഷല് സ്കൂളുകള്ക്ക് അവധി ബാധകമല്ല.
കാസര്ഗോഡ്, കണ്ണൂര് ജില്ലകളില് നാളെ ഓറഞ്ച് അലര്ട്ട് പ്രഖ്യാപിച്ചു. മലപ്പുറം, കോഴിക്കോട്, വയനാട് ജില്ലകളില് യെല്ലോ അലര്ട്ടും നല്കിയിട്ടുണ്ട്. നാളെ ഒരു ജില്ലയിലും അതിതീവ്ര മഴ മുന്നറിയിപ്പില്ല.
ഫിന്ജാല് ചുഴലിക്കാറ്റ് വടക്കന് തമിഴ്നാടിനു മുകളില് ശക്തി കൂടിയ ന്യൂനമര്ദമായി സ്ഥിതിചെയ്യുകയാണ്. നാളെയോടെ വടക്കന് കേരളത്തിനും കര്ണാടകക്കും മുകളിലൂടെ ന്യൂനമര്ദമായി അറബിക്കടലില് എത്തിച്ചേരാന് സാധ്യതയെന്ന് കേന്ദ്ര കാലാവസ്ഥാ വകുപ്പ് വ്യക്തമാക്കിയിട്ടുണ്ട്. കേരളത്തില് അടുത്ത 5 ദിവസം ഇടിമിന്നലോടു കൂടിയ നേരിയ മഴയ്ക്ക് സാധ്യത.