ടെലിവിഷന്‍ റിയാലിറ്റി ഷോയിലെ സാഹസിക പ്രകടനം അനുകരിക്കാന്‍ ശ്രമിച്ച പതിനൊന്നുകാരന് ദാരുണ മരണം. തെലുങ്കാനയില്‍ ആറാം ക്ലാസ് വിദ്യാര്‍ത്ഥിയായ രാപല്‍ കാളി വിശ്വനാഥാണ് കൊല്ലപ്പെട്ടത്.

ടെലിവിഷനില്‍ കണ്ട സാഹസിക പ്രകടനം അനുകരിച്ച് വായില്‍ മണ്ണെണ്ണ ഒഴിച്ച് തീ കൊളുത്തിയ കുട്ടിക്ക് ഗുരുതരമായി പൊള്ളലേറ്റിരുന്നു. ഉടന്‍തന്നെ അടുത്തുള്ള സ്വകാര്യ ആശുപത്രിയില്‍ പ്രവേശിപ്പിച്ച കുട്ടിയെ അടിയന്തര ചികിത്സക്കായി ഹൈദരാബാദിലേക്ക് മാറ്റിയെങ്കിലും വെള്ളിയാഴ്ച മരിക്കുകയായിരുന്നു.

ബോര്‍ഡിങ് സ്‌കൂളില്‍ താമസിച്ച് പഠിച്ചിരുന്ന രാപല്‍ അവധിക്ക് മുത്തശ്ശിയുടെ വീട്ടിലെത്തിയപ്പോഴാണ് സാസാഹസിക പ്രകടനം അനുകരിക്കാന്‍ ശ്രമിച്ചത്. പഠനത്തില്‍ മിടുക്കനായിരുന്ന കുട്ടി എന്തും ശ്രദ്ധയോടെ വീക്ഷിക്കാറുണ്ടായിരുന്നെന്നും, പലപ്പോഴും ടി വി യില്‍ കാണുന്ന സാഹസിക പ്രകടനങ്ങള്‍ അനുകരിക്കാന്‍ ശ്രമിക്കാറുണ്ടെന്നും ബന്ധുക്കള്‍ പറഞ്ഞു.  നാല് മാസം മുന്‍പ് ഇതേ സാഹസിക പ്രകടനം അനുകരിക്കാന്‍ ശ്രമിച്ച് കരിംനഗറില്‍ ആറാം ക്ലാസ് വിദ്യാര്‍ത്ഥി കൊല്ലപ്പെട്ടിരുന്നു.