ഹരാരെ: ഐപിഎല് 2026 സീസണില് കൊല്ക്കത്ത നൈറ്റ് റൈഡേഴ്സില് നിന്ന് ബംഗ്ലാദേശ് പേസര് മുസ്താഫിസുര് റഹ്മാനെ ഒഴിവാക്കിയതിനെതിരെ ശക്തമായി പ്രതികരിച്ച് സഹതാരങ്ങള്. മുസ്താഫിസുറിന്റെ കാര്യത്തില് വിഷമമുണ്ടെന്നും ഇത് അദ്ദേഹത്തെ മാത്രമല്ല, വലിയൊരു പ്രശ്നത്തിന്റെ ഭാഗമാണെന്നും ഇംഗ്ലണ്ട് ഓള്റൗണ്ടര് മോയിന് അലി പറഞ്ഞു. ‘സത്യം പറഞ്ഞാല് ഇവിടെ എന്തൊക്കെയോ ശരിയല്ല. കാര്യങ്ങള് ഇങ്ങനെ തുടരാന് കഴിയില്ല,’ എന്നും അദ്ദേഹം വ്യക്തമാക്കി. കെകെആര് പുറത്താക്കിയതോടെ മുസ്താഫിസുറിന് നിരാശയുണ്ടാകാമെന്ന് സഹതാരമായ നൂറുല് ഹസനും പറഞ്ഞു.
ലോകോത്തര ബൗളറായ മുസ്താഫിസുര് വര്ഷങ്ങളായി തന്റെ കഴിവ് തെളിയിച്ചിട്ടുണ്ടെന്നും ഇപ്പോള് അദ്ദേഹത്തിന് ലഭിക്കുന്നത് അര്ഹതപ്പെട്ടതാണെന്നും നൂറുല് ഹസന് കൂട്ടിച്ചേര്ത്തു. ബംഗ്ലാദേശ് നായകന് നജ്മുല് ഹുസൈന് ഷാന്റോയും താരത്തിന് വിഷമമുണ്ടായിരിക്കാമെന്ന് പ്രതികരിച്ചു. ഐപിഎല് ഒഴിവാക്കലിന് പിന്നാലെ, അടുത്ത സീസണില് മുസ്താഫിസുര് പാകിസ്താന് സൂപ്പര് ലീഗില് (PSL) കളിക്കുമെന്ന് ഔദ്യോഗികമായി സ്ഥിരീകരിച്ചിട്ടുണ്ട്.
ഐപിഎല് ലേലത്തില് കെകെആര് 9.20 കോടി രൂപയ്ക്കാണ് താരത്തെ സ്വന്തമാക്കിയത്. ബിസിസിഐയുടെ നിര്ദേശത്തെ തുടര്ന്നാണ് കെകെആര് മുസ്താഫിസുറിനെ ടീമില് നിന്ന് ഒഴിവാക്കിയതെന്ന് റിപ്പോര്ട്ടുണ്ട്. ബംഗ്ലാദേശിലെ മാറിയ രാഷ്ട്രീയ സാഹചര്യവും ഇന്ത്യക്കാര്ക്കെതിരായ ആക്രമണങ്ങളുമായി ബന്ധപ്പെട്ട ആശങ്കകളും താരത്തെ കളിപ്പിക്കുന്നതിനെതിരായ ഭീഷണികളും വിമര്ശനങ്ങളും ശക്തമായതോടെയാണ് നടപടി. ബിസിസിഐ സെക്രട്ടറി ദേവജിത് സൈകിയയാണ് കെകെആറിന് നിര്ദേശം നല്കിയതെന്നും റിപ്പോര്ട്ടുകള് വ്യക്തമാക്കുന്നു. ഇതിന് പിന്നാലെ ബംഗ്ലാദേശ് ഭാഗത്തുനിന്നും പ്രതികരണങ്ങളും തുടര്നടപടികളും ഉണ്ടായി.