അമ്മയിലെ രാജി: ഗണേഷ്‌കുമാറിനെതിരെ രൂക്ഷവിമര്‍ശനവുമായി നടി രമ്യ നമ്പീശന്‍

അമ്മയില്‍ നിന്നുള്ള നടിമാരുടെ രാജിയെത്തുടര്‍ന്നുള്ള ഗണേഷ്‌കുമാറിന്റെ പരാമര്‍ശത്തിനെതിരെ രൂക്ഷവിമര്‍ശനവുമായി നടി രമ്യ നമ്പീശന്‍. ഗണേഷിന്റെ വാക്കുകള്‍ മറുപക്ഷത്തിന്റെ നിലവാരത്തെയാണ് കാണിക്കുന്നതെന്ന് രമ്യ നമ്പീശന്‍ പറഞ്ഞു. ഏഷ്യാനെറ്റ് ന്യൂസിന് നല്‍കിയ അഭിമുഖത്തിലാണ് നടിയുടെ പ്രതികരണം. അമ്മയില്‍ നിന്ന് രാജിവെച്ച നടിമാര്‍ കുഴപ്പക്കാരാണെന്ന് ഗണേഷ്‌കുമാര്‍ പറഞ്ഞിരുന്നു.

‘അതീവ രഹസ്യമായാണ് ദിലീപിനെ സംഘടനയിലേക്ക് തിരിച്ചെടുത്തത്. തീരുമാനങ്ങള്‍ എക്‌സിക്യൂട്ടീവ് അംഗങ്ങളെ അറിയിക്കേണ്ടതാണ്. നേരത്തേ എടുത്ത തീരുമാനമാണെങ്കില്‍ എന്തുകൊണ്ട് അറിയിച്ചില്ല?’ ദിലീപിനെ തിരിച്ചെടുക്കാനുള്ള തീരുമാനം ചിലരുടേത് മാത്രമാണെന്നും സംഘടനയില്‍ ചിലര്‍ മാത്രം തീരുമാനം എടുക്കുകയായിരുന്നു” രമ്യ നമ്പീശന്‍ പറഞ്ഞു.

അമ്മയില്‍ മുമ്പും രാജിവെച്ച നടിമാര്‍ പ്രശ്‌നങ്ങള്‍ ഉണ്ടാക്കിയിട്ടുണ്ട്. അതുകൊണ്ട് രാജിയുടെ കാര്യത്തില്‍ അമ്മയിലെ അംഗങ്ങളാരും പ്രതികരിക്കേണ്ടെന്നും ഗണേഷ്‌കുമാര്‍ ജനറല്‍സെക്രട്ടറി ഇടവേള ബാബുവിനോട് പറഞ്ഞിരുന്നു. ഈ ശബ്ദസന്ദേശത്തിനോടാണ് രമ്യയുടെ പ്രതികരണം. വാര്‍ത്തകളും ഫേസ്ബുക്ക് പോസ്റ്റുകളും കണ്ട് ഭയപ്പെടരുതെന്നും രാജിവെച്ചവര്‍ അമ്മയോട് ശത്രുത പുലര്‍ത്തുന്നവരുമാണെന്നും ഗണേഷ്‌കുമാര്‍ പറഞ്ഞിരുന്നു.