കൊച്ചിയില്‍ ചരക്കുകപ്പല്‍ മുങ്ങിയതിന് പിന്നാലെ കൊല്ലം തീരത്ത് അടിഞ്ഞ കണ്ടെയ്‌നറുകള്‍ നീക്കുന്നത് വൈകിയേക്കും. കടലിലൂടെ കൊല്ലം പോര്‍ട്ടിലേക്ക് എത്തിക്കാനുള്ള നീക്കം മോശം കാലാവസ്ഥയിലും ശക്തമായ തിരമാലയും കാറ്റും മൂലം പാളിയിരുന്നു.

അതെസമയം, കണ്ടെയ്‌നറുകള്‍ അടിഞ്ഞ പ്രദേശത്തെ റോഡുകള്‍ക്ക് വീതി കുറവായതിനാല്‍ കര മാര്‍ഗ്ഗവും മാറ്റാനാകില്ല. കണ്ടെയ്‌നറുകള്‍ മുറിച്ച് ചെറു കഷണങ്ങളാക്കി കൊണ്ടുപോകാനുള്ള നീക്കമാണ് ആലോചിക്കുന്നത്. ഇതിനായി കസ്റ്റംസിന്റെ അനുമതി തേടും. ഇതുവരെ കൊല്ലത്ത് അടിഞ്ഞത് 35 കണ്ടെയ്‌നറുകളാണ്.

കണ്ടെയ്‌നറുകള്‍ നീക്കാന്‍ കമ്പനി നിയോഗിച്ച ഏഴ് റസ്‌ക്യൂ ടീമുകള്‍ കൊല്ലത്ത് എത്തുമെന്നും റസ്‌ക്യു ടീമിന് ജില്ലാ ദുരന്താ നിവാരണ അതോറിറ്റി സഹായം ഉറപ്പാക്കിയിരുന്നു. സാഹചര്യങ്ങള്‍ പ്രതികൂലമായതോടെയാണ് തിരിച്ചടിയായത്.

സംസ്ഥാനത്ത് സ്വര്‍ണവിലയില്‍ വീണ്ടും വര്‍ധന. ഗ്രാമിന് 45രൂപ വര്‍ധിച്ച് 8995രൂപയും പവന് 360 രൂപ വര്‍ധിച്ച് 71,960 രൂപയുമായി. ഇന്നലെ ഗ്രാമിന് 40 രൂപ കുറഞ്ഞ് 8950 രൂപയും പവന് 320 രൂപ കുറഞ്ഞ് 71,600 രൂപയുമായിരുന്നു.

എട്ടാം തീയതി 73,040 രൂപയായി ഈ മാസത്തെ ഏറ്റവും ഉയര്‍ന്ന നിരക്കിലേക്ക് എത്തിയിരുന്നു. 15ന് ഈ മാസത്തെ ഏറ്റവും കുറഞ്ഞ നിരക്കായ 68,880 രൂപയിലേക്ക് താഴ്ന്നിരുന്നു.

മഴക്കെടുതിയില്‍ കൊല്ലം പട്ടാഴിയില്‍ മരം ഒടിഞ്ഞ് വീണ് ഗൃഹനാഥന്‍ മരിച്ചു. മൈലാടുംപാറ സ്വദേശി ബൈജു വര്‍ഗ്ഗീസാണ് (52) മരിച്ചത്. ഇന്നലെയാണ് അപകടമുണ്ടായത്. ഇയാളുടെ പുരയിടത്തിലെ നിരവധി മരങ്ങള്‍ കാറ്റില്‍ ഒടിഞ്ഞുവീണിരുന്നു. ഇതിന്റെ ചില്ലകള്‍ വെട്ടിമാറ്റുന്നതിനിടെ ദേഹത്തേക്ക് വീണാകാം മരണമെന്നാണ് നിഗമനം.

സംസ്ഥാനത്ത് ഇന്നും കനത്ത മഴ തുടരുന്നു. കോഴിക്കോട്, വയനാട്, കണ്ണൂര്‍ ജില്ലകളില്‍ ഇന്ന് റെഡ് അലര്‍ട്ട് പ്രഖ്യാപിച്ചു. തൃശ്ശൂര്‍, മലപ്പുറം, കാസര്‍കോട് ജില്ലകളില്‍ ഓറഞ്ച് അലര്‍ട്ടും ബാക്കി ജില്ലകളില്‍ യെല്ലോ അലര്‍ട്ടുമാണ്. മഴക്കെടുതിയില്‍ ഇതുവരെ ഏഴ് പേര്‍ക്കാണ് ജീവന്‍ നഷ്ടമായത്.