തൃശൂരിലെ ലുലു മാള് നിര്മ്മാണത്തിനെതിരെ കേസ് നല്കിയത് സിപിഐ നേതാവ്. വരന്തരപ്പിള്ളി മുന് ലോക്കല് സെക്രട്ടറി ടി എന് മുകുന്ദനാണ് പരാതി നല്കിയത്. അതേസമയം പരാതി നല്കിയത് വ്യക്തിപരമായ കാരണത്തിനാലാണെന്ന് വിശദീകരണം.
നെല്വയല് പരിവര്ത്തനപ്പെടുത്തിയതിനെതിരെയാണ് പരാതി നല്കിയതെന്നും ഹൈക്കോടതിയില് വാദം പൂര്ത്തിയായി വിധി പറയാനായി വച്ചിരിക്കുകയാണ് കേസ് ഇപ്പോഴെന്നും മുകുന്ദന് പറഞ്ഞു.
തൃശൂരില് ലുലു മാള് ഉയരാന് വൈകുന്നത് ഒരു രാഷ്ട്രീയപാര്ട്ടിയുടെ ഇടപെടല് കാരണമെന്ന് ലുലു ഗ്രൂപ്പ് ചെയര്മാന് എം എ യൂസഫലി പറഞ്ഞിരുന്നു. രണ്ടരവര്ഷം മുന്പ് പ്രവര്ത്തനം ആരംഭിക്കേണ്ട മാളിന്റെ തുടര്പ്രവര്ത്തനവുമായി മുന്നോട്ട് പോകാന് കഴിയാത്തത് ഒരു രാഷ്ട്രീയ പാര്ട്ടിയിലുള്ള ആള് അനാവശ്യമായ കേസുമായി മുന്നോട്ട് പോകുന്നതിനാലാണെന്നും അദ്ദേഹം പറഞ്ഞിരുന്നു. 3000 പേര്ക്ക് ജോലി ലഭിക്കേണ്ട വലിയ പ്രോജക്ടാണ് തൃശൂരിലെ ലുലു ഷോപ്പിങ്ങ് മാളിലൂടെ മുന്നോട്ട് വെച്ചതെന്നും യൂസഫലി പറഞ്ഞു.