നടൻ അനിൽ നെടുമങ്ങാടിന്റെ അപ്രതീക്ഷിത വിയോഗത്തിൽ നടുങ്ങിയിരിക്കുകയാണ് സിനിമാ ലോകവും ആരാധകരും. സിനിമ പുറത്തിറങ്ങി അധികം കഴിയുംമുമ്പേയാണ് ചിത്രത്തിന്റെ സംവിധായകൻ സച്ചി മരണത്തിന് കീഴടങ്ങിയത്. ഇന്ന് രാവിലെ സച്ചിയെ സ്മരിച്ചു കൊണ്ട് ഫേസ്ബുക്കിൽ പോസ്റ്റിട്ട അനിൽ, വൈകീട്ടോടെ സംവിധായകന്റെ പാതയിൽ മരണം പുൽകിയ വാർത്തയാണെത്തിയത്.

ഇന്ന് രാവിലെ 10.30 ന് അനിൽ ഫേസ്ബുക്കിൽ കുറിച്ചത് ‘അയ്യപ്പനും കോശിയും’ ചിത്രത്തിന്റെ ഷൂട്ടിങ് സൈറ്റിൽ വൈകിയെത്തിയ ഒരു അനുഭവമാണ്. ചിത്രത്തിലെ സി.ഐ സതീഷ് എന്ന കഥാപാത്രം, സച്ചിയെ നിരീക്ഷിച്ച് അവതരിപ്പിച്ചതാണെന്നും അനിൽ പറയുന്നു.

കുറിപ്പിന്റെ പൂർണരൂപം ഇങ്ങനെ:

‘ഈ ദിവസം ഇങ്ങേരെ കുറിച്ചാണ് എഴുതേണ്ടത് .. ഒന്നും എഴുതാനും കഴിയുന്നില്ല. ഞാനും മരിക്കുവോളം എഫ് ബി യിലെ കവർ ഫോട്ടോയായിട്ട് നിങ്ങളിങ്ങിനെ …. ഷൂട്ടിനിടയിൽ ഒരു ദിവസം എന്റെതല്ലാത്ത കുറ്റം കൊണ്ട് എത്താൻ ലേറ്റായപ്പോ കുറച്ച് സെക്കന്റ് എന്റെ കണ്ണിൽ നോക്കിയിരുന്നിട്ട് നീയും സ്റ്റാറായി അല്ലേ ? ഞാൻ പറഞ്ഞു ആയില്ല ആവാം .ചേട്ടൻ വിചാരിച്ചാൽ ഞാൻ ആവാം….സിഐ സതീഷ് എന്ന കഥാപാത്രത്തിനെ സച്ചിച്ചേട്ടനെ ഞാൻ നിരീക്ഷിച്ച് അവതരിപ്പിച്ചതാണ് .സച്ചിയുടെ സംസാരവും പെരുമാറ്റവും ഒക്കെ ഞാൻ ചേട്ടനോട് പറയാതെ അനുകരിക്കുകയായിരുന്നു…’