Connect with us

columns

മഹാപാരമ്പര്യത്തിന്റെ പ്രകാശധാര

Published

on

പാണക്കാട് സയ്യിദ് സാദിഖലി ശിഹാബ് തങ്ങള്‍

ചന്ദ്രിക പ്രചാരണ ക്യാമ്പയിന്‍ ആരംഭിച്ചിരിക്കുകയാണ്. ഈ മാസം ഇരുപത് വരെ നീണ്ടു നില്‍ക്കുന്നതാണ് ക്യാമ്പയിന്‍. പത്ര വായന നമ്മുടെ സംസ്‌കാരത്തിന്റെ ഭാഗമാണ്. വിവര സാങ്കേതിക വിദ്യയില്‍ ഏറെ മുന്നോട്ടു പോവുകയും വിരല്‍തുമ്പില്‍ വാര്‍ത്തകളും വിവരങ്ങളും വന്നുനില്‍ക്കുകയും ചെയ്യുന്ന ഈ കാലത്തും പത്ര വായന ദിനചര്യയുടെ ഭാഗമാണ് മലയാളിക്ക്. പത്രങ്ങളും പ്രസിദ്ധീകരണങ്ങളും നമ്മുടെ സാംസ്‌കാരത്തിന് മികച്ച സംഭാവനകള്‍ നല്‍കിയിട്ടുണ്ട്.

വാര്‍ത്തകള്‍ക്കൊപ്പം ആശയ പ്രചരണങ്ങള്‍ക്കുള്ള ഉപാധികൂടിയാണ് പത്രങ്ങള്‍. മുസ്‌ലിം ലീഗ് പാര്‍ട്ടിയുടെ മുഖപത്രമാണ് ചന്ദ്രിക. മുസ്‌ലിംലീഗ് കേരളത്തില്‍ പ്രവര്‍ത്തനം ആരംഭിക്കുന്നതിനുമുമ്പേ ചന്ദ്രിക പ്രസിദ്ധീകരണത്തിന് തുടക്കമായിട്ടുണ്ട്. 1934 ല്‍ പ്രതിവാര പത്രമായിട്ടായിരുന്നു തുടക്കം. ഇന്ത്യക്കു സ്വാതന്ത്ര്യം കിട്ടുന്നതിനും പത്തു വര്‍ഷം മുമ്പ് ചന്ദ്രിക ദിനപത്രമായി പ്രസിദ്ധീകരണമാരംഭിച്ചിരുന്നു. എട്ടര പതിറ്റാണ്ടിന്റെ പാരമ്പര്യം കേവലം ഒരു പ്രസിദ്ധീകരണത്തിന്റെ പാരമ്പര്യം മാത്രമല്ല, ഒരു ആശയത്തിന് പ്രതിരോധവും പ്രചാരണവും തീര്‍ത്ത പാരമ്പര്യം കൂടിയാണത്.

ന്യൂനപക്ഷങ്ങളുടേയും പിന്നാക്കക്കാരുടേയും ഇതു രണ്ടും ചേര്‍ന്ന മുസ്‌ലിം സമൂഹത്തിന്റേയും ആവശ്യങ്ങള്‍ക്കും അവകാശങ്ങള്‍ക്കുംവേണ്ടി ചന്ദ്രിക ശബ്ദമുയര്‍ത്തി തുടങ്ങിയകാലത്ത് കൂടെനില്‍ക്കാന്‍ അധികമാരുമുണ്ടായിരുന്നില്ല. ക്ഷേമമന്വേഷിക്കാനും അവകാശ നിഷേധങ്ങളെ തുറന്നുകാട്ടാനും വേറെ മാധ്യമങ്ങള്‍ അധികമുണ്ടായിരുന്നില്ല. ബ്രിട്ടീഷ് സര്‍ക്കാറിന്റെ കാലത്ത് ആരംഭംകുറിച്ച ചന്ദ്രിക ബ്രിട്ടീഷ് അധികാരികളുടെ അവഗണനക്കെതിരേയും അവകാശനിഷേധങ്ങള്‍ക്കെതിരേയും നിരന്തരം ശബ്ദിച്ചിരുന്നു. ഇടപെടേണ്ട ഒരു ഘട്ടത്തിലും നിശബ്ദതപാലിച്ചിട്ടില്ല.

മലയാളത്തിന്റെ അഭിമാനം വിശ്വത്തോളം ഉയര്‍ത്തിയ മഹാപ്രതിഭകളില്‍ പലര്‍ക്കും പ്രചോദനവും പിന്തുണയും നല്‍കാന്‍ ചന്ദ്രികക്ക്‌സാധിച്ചു. മലയാള കലാ സാഹിത്യ രംഗത്തെ പ്രമുഖരില്‍ പലരുടേയും ആദ്യകാല കളരി ചന്ദ്രികയായിരുന്നു. മലയാളത്തിന്റെ മഹാകവികളായ ജി.ശങ്കരകുറുപ്പും വള്ളത്തോളുമടക്കം എസ്.കെ പൊറ്റക്കാടും വൈക്കം മുഹമ്മദ് ബഷീറും എം.ടി വാസുദേവന്‍ നായരും തുടങ്ങിയ ഒട്ടേറെ പ്രമുഖര്‍. ആ പാരമ്പര്യത്തിന്റെ തുടര്‍ച്ചയാണ് ഇന്നും ചന്ദ്രിക പിന്തുടരുന്നത്.

സത്യാനന്തന്തര കാലം എന്ന് വിശേഷിപ്പിക്കുന്ന വര്‍ത്തമാനത്തില്‍ സത്യത്തോടൊപ്പം നില്‍ക്കുക എന്നത് വലിയ പരീക്ഷണമായി മാറിയിരിക്കുന്നു. ആ പരീക്ഷണത്തില്‍ വിട്ടുവീഴ്ചയില്ലാതെ നില്‍ക്കുന്നു എന്നത് ചന്ദ്രികക്ക് സാധ്യമാകുന്നു. മുസ്‌ലിം സമൂഹത്തെ രാഷ്ട്രീയ പ്രബുദ്ധമാക്കുന്നതിലും ജനാധിപത്യ ചേരിയില്‍ ഉറപ്പിച്ചുനിര്‍ത്തുന്നതിലും ചന്ദ്രിക വലിയ പങ്കു വഹിച്ചു. മുസ്‌ലിംലീഗിന്റെ വളര്‍ച്ചയിലും ബഹുജന പിന്തുണ നേടിക്കൊടുക്കുന്നതിലും ചന്ദ്രികക്കുള്ള പങ്ക് തുല്യതയില്ലാത്തതാണ്. ഇന്ത്യാരാജ്യത്തിന്റെ ഐക്യവും അഖണ്ഡതയും കാത്തുസൂക്ഷിക്കാന്‍ ജനങ്ങളെ ബോധവാന്മാരാക്കുകയും പ്രത്യേകിച്ച് മുസ്‌ലിം ന്യൂനപക്ഷത്തിന്റെ രാഷ്ട്രത്തോടുള്ള ബാധ്യത ബോധ്യപ്പെടുത്തിക്കൊടുക്കാനും ചന്ദ്രികയുടെ താളുകള്‍ ഉപയോഗപ്പെടുത്തി. സമുദായ ഐക്യത്തിനും സാമുദായിക സൗഹാര്‍ദ്ദത്തിനും വിരുദ്ധമായ ആശയങ്ങള്‍ക്കുനേരെ പോരാടി.

നമ്മുടെ മതേതരത്വത്തെ ശക്തിപ്പെടുത്തുന്ന വാര്‍ത്തകള്‍ സംഭവങ്ങള്‍ വ്യക്തികള്‍ ചന്ദ്രികക്ക് എന്നും നിറം പകര്‍ന്നിട്ടുണ്ട്. ബാബരി മസ്ജിദ് അടക്കം വൈകാരികമായ വിഷയങ്ങളില്‍ ചന്ദ്രികയിലെ അക്ഷരങ്ങള്‍ക്ക് തീവ്രത പോരാ എന്ന ആക്ഷേപങ്ങളും പരിഹാസങ്ങളും കേള്‍ക്കേണ്ടിവന്നിട്ടുണ്ട്. തീവ്ര ചിന്തകളെ നിരുല്‍സാഹപ്പെടുത്തി സമുദായത്തിന്റെ അടിസ്ഥാനപരമായ വിഷയങ്ങളെ ഉയര്‍ത്തിക്കൊണ്ടുവരാനാണ് ചന്ദ്രിക ശ്രമിച്ചത്. വിദ്യാഭ്യാസം, സാംസ്‌കാരികം, രാഷ്ട്രീയം, സ്വത്വബോധം എന്നിങ്ങനെയുള്ള വിഷയങ്ങളില്‍ സമുദായത്തെ ഉണര്‍ത്താനും ഉത്തേജനം നല്‍കാനും നിരന്തരം പരിശ്രമിച്ചു. മേല്‍ വിഷയങ്ങളില്‍ സമുദായം കൈവരിച്ച പുരോഗതിക്ക് ചന്ദ്രികയോളം കടപ്പെട്ട മറ്റൊരു പ്രസിദ്ധീകരണമില്ല. സമുദായത്തിന്റെ പുരോഗതി ആഗ്രഹിച്ചവരുടെ ആശയങ്ങള്‍ അക്ഷരങ്ങളായിമാറിയത് ചന്ദ്രികയിലൂടെയായിരുന്നു. സീതീസാഹിബിന്റെ ധിഷണയായിരുന്നു ചന്ദ്രികയുടെ വെളിച്ചം. ബാഫഖിതങ്ങളുടെ ആത്മാര്‍ത്ഥതയും സി.എച്ചിന്റെ പ്രതിഭയും പൂക്കോയ തങ്ങളും ശിഹാബ് തങ്ങളും ഓര്‍ക്കപ്പെടേണ്ട മറ്റു ധാരാളമാളുകളുമുണ്ട്. കെ.കെ മുഹമ്മദ് ഷാഫി മുതല്‍ തുടക്കംകുറിച്ച പ്രതിഭാശാലികളായ നിരവധി പത്രാധിപര്‍. എണ്‍പത്തി ആറു വര്‍ഷങ്ങള്‍ക്ക് മുമ്പ് തലശ്ശേരിയില്‍നിന്ന്ആരംഭിച്ച് ഇന്ന് ജി. സി.സി രാഷ്ട്രങ്ങളില്‍ നിന്നടക്കം പതിമൂന്ന് കേന്ദ്രങ്ങളില്‍ നിന്നു ചന്ദ്രിക പ്രസിദ്ധീകരിക്കുന്നുണ്ട്.

മനുഷ്യ ജീവിതത്തിന്റെ ഗതിവിഗതികള്‍ പോലെ ചന്ദ്രികക്കും കിതപ്പും കുതിപ്പുമുണ്ടായിട്ടുണ്ട്. പുതിയ കാലത്ത് എല്ലാ മേഖലയിലും ഉണ്ടായ പോലെ സ്വാഭാവികമായ പ്രതിസന്ധികളും പ്രയാസങ്ങളുമുണ്ടായിട്ടുണ്ട്. കാലത്തിന്റേയും സമൂഹത്തിന്റേയും മാറ്റങ്ങള്‍ അഭിമുഖീകരിച്ച് ഇനിയുമേറെ കാതങ്ങള്‍ മുന്നേറാനുമുണ്ട്. ചന്ദ്രിക ക്യാമ്പയിന്‍ നടക്കുമ്പോള്‍ തീര്‍ച്ചയായും ചന്ദ്രിക നിര്‍വ്വഹിച്ച ചരിത്രദൗത്യം മനസ്സിലാക്കുകയും ആ ചരിത്ര ദൗത്യത്തിന്റെ തുടര്‍ച്ചക്ക് ചന്ദ്രിക വായിക്കാനും വരിക്കാരാവാനും വരിക്കാരെ ചേര്‍ത്താനും നല്ല മനസ്സുകളോട് അഭ്യര്‍ത്ഥിക്കുന്നു.

columns

ഇറാന്‍ നേരിടുന്നത് വിശ്വാസ പ്രതിസന്ധി

ഇസ്ലാമിക രാഷ്ട്രം സ്ഥാപിച്ചാലുളള പ്രശ്‌നമാണ് ഇറാന്‍ നേരിടുന്നത്. ഒരു മത നിരപേക്ഷ രാഷ്ട്രം പൗരന്‍മാര്‍ക്കെതിരെ എടുക്കുന്ന ഒരു നടപടി പോലും ഏതെങ്കിലും മതത്തിന്റെ അക്കൗണ്ടില്‍ വരവ് വെക്കില്ല. എന്നാല്‍ ഇസ്ലാമിക രാഷ്ട്രത്തിന്റെ പൊലീസ് ഒരു ലാത്തിച്ചാര്‍ജ് നടത്തിയാല്‍ പോലും അത് ഇസ്ലാമിന്റെ പേരിലാണ് എഴുതപ്പെടുന്നത്.

Published

on

ഖാദര്‍ പാലാഴി

ഇസ്ലാമിക രാഷ്ട്രം സ്ഥാപിച്ചാലുളള പ്രശ്‌നമാണ് ഇറാന്‍ നേരിടുന്നത്. ഒരു മത നിരപേക്ഷ രാഷ്ട്രം പൗരന്‍മാര്‍ക്കെതിരെ എടുക്കുന്ന ഒരു നടപടി പോലും ഏതെങ്കിലും മതത്തിന്റെ അക്കൗണ്ടില്‍ വരവ് വെക്കില്ല. എന്നാല്‍ ഇസ്ലാമിക രാഷ്ട്രത്തിന്റെ പൊലീസ് ഒരു ലാത്തിച്ചാര്‍ജ് നടത്തിയാല്‍ പോലും അത് ഇസ്ലാമിന്റെ പേരിലാണ് എഴുതപ്പെടുന്നത്. അത്‌കൊണ്ടാണ് അമേരിക്കയിലോ ബ്രിട്ടനിലോ ഇന്ത്യയിലോ ഉള്ള മുസ്ലിമിന്റെ വിശ്വാസ ദാര്‍ഢ്യത ഇറാനിലെയോ സഊദി അറേബ്യയിലേയോ മുസ്ലിമിനില്ലാത്തത്. സെക്യുലര്‍ സമൂഹത്തിലെ മുസ്ലിം ഇസ്ലാമിനകത്തും പുറത്തുമുള്ള ആശയധാരകളോട് വിനിമയം ചെയ്തും സംവദിച്ചുമാണ് മുന്നോട്ട് പോകുന്നത്. മുസ്ലിമോ ഹിന്ദുവോ ക്രിസ്ത്യാനിയോ ആയതിന്റെ പേരില്‍ മാത്രം ഏതെങ്കിലും രാഷ്ട്രം ശത്രുതയോടെയോ വിവേചനത്തോടെയോ പെരുമാറുകയാണെങ്കിലും സമാന സാഹചര്യം സംജാതമാകും.

ദാര്‍ശനികരും തത്വചിന്തകരും എമ്പാടുമുള്ള ഇറാനില്‍ ആയത്തുല്ലാമാര്‍ക്ക് ഏറെക്കാലം ജനങ്ങളെ വരുതിയില്‍ നിര്‍ത്താന്‍ കഴിയില്ല. ഷാ റിസാഷാ പഹ്ലവിമാര്‍ യു.എസ് പിന്തുണയോടെ രാജ്യത്തെ കൊള്ളയടിച്ച് ഭരിക്കുന്നത് കണ്ട് സഹികെട്ടാണ് ജനം ആയത്തുല്ലാ ഖുമൈനിയില്‍ രക്ഷകനെ കണ്ടത്. ആ തലമുറ മരിച്ച് മണ്ണടിഞ്ഞു കൊണ്ടിരിക്കുന്നു. പുതിയ തലമുറ കാണുന്നത് പഹ്ലവിമാരുടെ പുതിയ രൂപങ്ങളെയാണ്. അറബ് രാജാക്കന്‍മാരെ അപേക്ഷിച്ച് ഇറാനില്‍ പരിമിത ജനാധിപത്യമുണ്ടെങ്കിലും 12 അംഗ ഗാര്‍ഡിയന്‍ കൗണ്‍സിലിന്റെ കടമ്പ കടക്കുന്നവര്‍ക്കേ മത്സരിക്കാന്‍ കഴിയൂ. ആ ജനാധിപത്യത്തിലും ജനത്തിന് വിശ്വാസം കുറഞ്ഞു. 2021 ലെ തെരഞ്ഞെടുപ്പില്‍ 49% പേര്‍ മാത്രമാണ് വോട്ട് ചെയ്തത്. അതില്‍തന്നെ 13% നിഷേധ വോട്ടുകളായിരുന്നു.

സഊദി അറേബ്യയെ താരതമ്യപ്പെടുത്തുമ്പോള്‍ ഇറാനില്‍ സ്ത്രീകളുടെ സാമൂഹ്യ പങ്കാളിത്തവും പദവികളും ബഹുദൂരം മുന്നിലാണ്. സൗദിയില്‍ സ്ത്രീകള്‍ക്ക് ഡ്രൈവിംഗ് ലൈസന്‍സ് ഈയിടെ മാത്രമാണ് കൊടുത്തതെങ്കില്‍ എണ്‍പതുകളില്‍തന്നെ ടാക്‌സി ഓടിക്കുന്ന സ്ത്രീകള്‍ ഇറാനിലുണ്ട്. 1997-2005 കാലത്ത് പ്രസിഡണ്ടായിരുന്ന മുഹമ്മദ് ഖാത്തമി പൗരാവകാശങ്ങളുടേയും സ്ത്രീ സ്വാതന്ത്ര്യത്തിന്റേയും ചാമ്പ്യനായിരുന്നെങ്കിലും 2005 – 2013 കാലത്ത് പ്രസിസണ്ടായ അഹമദ് നിജാദ് ഖാത്തമിയുടെ പരിഷ്‌കാരങ്ങളത്രയും എടുത്ത് കളഞ്ഞു. മൂപ്പരാണ് ഇപ്പോള്‍ റദ്ദാക്കിയ മൊറാലിറ്റി പൊലീസിംഗ് ഏര്‍പ്പെടുത്തിയത്.

മഹ്‌സ അമിനി ‘ധാര്‍മികസിപ്പൊലീസി’നാല്‍ കൊല്ലപ്പെട്ടപ്പോള്‍ മുഹമ്മദ് ഖാത്തമിയും ചില ഷിയാ പണ്ഡിതരും രംഗത്ത് വന്ന് ഈ നിര്‍ബന്ധ ഹിജാബ് പരിപാടി റദ്ദാക്കണമെന്ന് ഖുര്‍ആന്‍ ഉദ്ധരിച്ച്തന്നെ ആവശ്യപ്പെട്ടിരുന്നു.ഏതായാലും ഹിജാബ് പ്രക്ഷോഭം അവസാനിക്കുക ആയത്തുല്ലാ ഭരണത്തിന്റെ അന്ത്യത്തിലാണെന്ന് ഉറപ്പാണ്. അവസരം മുതലാക്കാന്‍ അമേരിക്കയും ഇസ്രാഈലും സഊദി അറേബ്യ ഉള്‍പ്പെടെയുള്ള സാമന്ത രാജ്യങ്ങളും 24 ഃ7 പരിശ്രമത്തിലാണ്. പ്രധാന പരിപാടി പേര്‍ഷ്യന്‍ ഭാഷയിലുള്ള റേഡിയോ – ടി.വി -സോഷ്യല്‍ മീഡിയ പ്രചാരണമാണ്. ഇറാന്‍ ജാം ചെയ്യാന്‍ നോക്കുന്നുണ്ടെങ്കിലും ഒന്നും ഏശുന്നില്ല. മേഖലയിലെ രാജാക്കന്‍മാരെല്ലാം ഇസ്രാഈലിനോട് ഒത്തുതീര്‍പ്പിലെത്തിയെങ്കിലും ഇറാന്‍ മാത്രമാണ് വഴങ്ങാത്തത്. മാത്രമല്ല അവര്‍ ഹിസ്ബുല്ലക്കും ഹമാസിനും സിറിയക്കും ഹൂഥികള്‍ക്കും പിന്തുണ നല്‍കുന്നു. അറബികളെ പോലെയല്ല ഇറാനികള്‍. വാങ്ങിക്കൊണ്ട് വന്ന ആയുധത്തിന്റെ സ്‌ക്രൂ മാറ്റാന്‍ പെന്റഗണിലേക്ക് ഫോണ്‍ ചെയ്യേണ്ടതില്ല. കടുത്ത ഉപരോധത്തിനിടയിലും ഹൈപ്പര്‍ സോണിക് മിസൈലുകളും ഡ്രോണുകളും സ്വന്തമായുണ്ടാക്കുന്നവരാണ്. ഇത്തരമൊരു ഇറാനെ തകര്‍ക്കാന്‍ അവര്‍ തക്കം പാര്‍ത്തിരിക്കയാണ്. അവരെ സഹായിക്കാന്‍ ഇറാനികള്‍തന്നെ ഇപ്പോള്‍ തയ്യാറുമാണ്. ആണവ ശാസ്ത്രജ്ഞന്‍ ഫക്രിസാദയെ ഇസ്രാഈല്‍ കൊന്നത് ഇറാന്‍ പൗരന്‍മാരെ ഉപയോഗിച്ചായിരുന്നു.

ഏതായാലും സ്വയം രാഷ്ട്രീയ പരിഷ്‌ക്കരണം നടത്തിയല്ലാതെ ഇറാന് മുന്നോട്ട് പോകാനാവില്ല. സ്വന്തം പൗരന്‍മാരെ വെടിവെച്ച് കൊന്നും ജയിലിലിട്ടും എത്രനാള്‍ പിടിച്ച് നില്‍ക്കും. സ്വയം മാറുക, അല്ലെങ്കില്‍ മാറിക്കൊടുക്കുക. രണ്ടും ചെയ്തില്ലെങ്കില്‍ 1979 ന് തനിയാവര്‍ത്തനം ഉറപ്പ്.

Continue Reading

columns

നാളെ ഡിസംബര്‍ 6: ബാബരി; മതേതര ധ്വംസനത്തിന്റെ ദു:ഖ ദിനം

മുസ്ലിം സമു ദായത്തെ സംബന്ധിച്ചിടത്തോളം അത്ര തൃപ്തികരമായ വിധിയല്ലാതിരുന്നിട്ടു പോലും വിവിധ മത-രാഷ്ട്രീയ-സമുദായിക സംഘടനകള്‍ സമചിത്തയോടെ സമീപിക്കാന്‍ മുന്‍കയ്യെടുത്തത് ഏറെ കൗതുകത്തോടെയാണ് ഇതര ജനാധിപത്യ വിശ്വാസികള്‍ നോക്കിക്കണ്ടത്. ഒരു കലാപകാരിക്ക് തക്കം പാര്‍ത്തിരിക്കാന്‍ ലഭിച്ച അവസരമായിരുന്നു മഞ്ഞുപോലെ അലിഞ്ഞുപോയത്. വിധി മറ്റൊരു രീതിയിലായിരുന്നെങ്കില്‍ ഇന്ത്യ നേരിടേണ്ടി വരുമായിരുന്ന മറുവശത്തെക്കുറിച്ചും ആരുംചിന്തിക്കാതിരുന്നില്ല.

Published

on

ജാസിം ചുള്ളിമാനൂര്‍

നിയമത്തിന്റെ വഴിയില്‍ വിധിയെഴുതിക്കഴിഞ്ഞെങ്കിലും ബാബരി ധ്വംസനം ഇന്നും മതേതര ഇന്ത്യയ്ക്ക് നേരിട്ട കനത്ത മുറിവു തന്നെയാണ്. 2019 നവംബര്‍ ഒമ്പതിനാണ് ചീഫ് ജസ്റ്റിസ് രഞ്ജന്‍ ഗോ ഗോയിയുടെ നേതൃത്വത്തിലുള്ള അഞ്ചംഗ സുപ്രീംകോടതി ബെഞ്ച് വിധി പ്രസ്താവിച്ചത്. വിധിപ്രകാരം 2.7 ഏക്കര്‍ ഭൂമി രാമക്ഷേത്ര നിര്‍മാണത്തിനായി സര്‍ക്കാര്‍ രൂപീകരിക്കുന്ന ട്രസ്റ്റിന് കൈമാറണമെന്നും പള്ളി നിര്‍മ്മിക്കാന്‍ അയോധ്യയിലെ ബാബരി മസ്ജി ദിന് പകരം ധന്നിപ്പൂര്‍ വില്ലേജില്‍ അഞ്ചേക്കര്‍ ഭൂമി നല്‍കുമെന്നുമായിരുന്നു ഉത്തരവ്.

വിധിയിലെ ന്യായാന്യായങ്ങള്‍ ഉത്തരവ് പുറപ്പെടുവിച്ച കാലത്ത് ഇന്ത്യയിലൊട്ടാകെ ഏറെ ചര്‍ച്ച ചെയ്യുകയുണ്ടായി. മുസ്ലിം സമു ദായത്തെ സംബന്ധിച്ചിടത്തോളം അത്ര തൃപ്തികരമായ വിധിയല്ലാതിരുന്നിട്ടു പോലും വിവിധ മത-രാഷ്ട്രീയ-സമുദായിക സംഘടനകള്‍ സമചിത്തയോടെ സമീപിക്കാന്‍ മുന്‍കയ്യെടുത്തത് ഏറെ കൗതുകത്തോടെയാണ് ഇതര ജനാധിപത്യ വിശ്വാസികള്‍ നോക്കിക്കണ്ടത്. ഒരു കലാപകാരിക്ക് തക്കം പാര്‍ത്തിരിക്കാന്‍ ലഭിച്ച അവസരമായിരുന്നു മഞ്ഞുപോലെ അലിഞ്ഞുപോയത്. വിധി മറ്റൊരു രീതിയിലായിരുന്നെങ്കില്‍ ഇന്ത്യ നേരിടേണ്ടി വരുമായിരുന്ന മറുവശത്തെക്കുറിച്ചും ആരുംചിന്തിക്കാതിരുന്നില്ല.

സംസ്‌കാരങ്ങളുടെ വൈവിധ്യങ്ങള്‍ വിളക്കണിഞ്ഞ നമ്മുടെ നാട്ടില്‍ ഒരോ പൗരനും മതം സ്വീകരിക്കാനും നിരാകരിക്കാനും പ്രചരിപ്പിക്കാനുമൊക്കെ അവകാശത്തോടൊപ്പം സ്വാതന്ത്ര്യവുമുണ്ട്.എന്നാല്‍ ഒരു മതത്തിന്റെ അടയാളങ്ങളെ തകര്‍ത്ത് മറ്റൊരു മതത്തിന്റെ ശിലാസ്ഥാപനം നടത്തുമ്പോള്‍ അവിടെ ഉയരുന്നത് ഇന്ത്യയുടെ വിധ്വംസ ചാലകങ്ങളാണ്. നോക്കുകുത്തിയാകുന്നത് ഭരണകൂട മൂല്യങ്ങളുടെയും ഭാരതീയ സംസ്‌കാരത്തിന്റെയും തനതു പാരമ്പര്യങ്ങളും.

ഇന്ത്യയെ സംബന്ധിച്ചിടത്തോളം ജനങ്ങള്‍ക്കിടയില്‍ എപ്പോഴും വളര്‍ന്നുകൊണ്ടിരിക്കേണ്ടത് സാഹോദര്യവും സഹവര്‍ത്തിത്വവുമാണ്. അതിന് ചുക്കാന്‍ പിടിക്കേണ്ടത് രാജ്യത്തെ ഭരണകൂടങ്ങളും. എന്നാല്‍ ബാബരി വിധിയെ തുടര്‍ന്ന് ഇന്ത്യന്‍ പ്രധാനമന്ത്രിയില്‍നിന്നും കണ്ടത് അപ്രതീക്ഷിത സമീപനമായിരുന്നു. നല്ലപാഠങ്ങളുമായി രാജ്യത്തെ അഭിസംബോധന ചെയ്യുന്നതിനു പകരം അദ്ദേഹം തിടുക്കം കൂട്ടിയത് രാമക്ഷേത്രത്തി ന്റെ ശിലാപൂജ നിര്‍വ്വഹിക്കാനായിരുന്നു. ഭരണഘടനാസങ്കല്പം അനുസരിച്ചാണെങ്കില്‍ രാജ്യത്തിന്റെ പ്രധാനമന്ത്രി എല്ലാ മതങ്ങളോടും സമദൂരം പാലിക്കുകയാണ് ചെയ്യേണ്ടത്. പ്രസ്തുത വിഷയത്തില്‍ രാജ്യത്തിന് കാണേണ്ടി വന്നത് പ്രധാനമന്ത്രിയുടെ മറ്റൊരു മുഖവും.താനൊരു ഹിന്ദു എന്നതിനപ്പുറം ഹിന്ദുരാഷ്ട്രത്തിന്റെ ശിലാസ്ഥാപകന്‍ ആകാനുള്ള വ്യഗ്രതയാണ് കാട്ടുന്നതെന്ന് പറഞ്ഞാല്‍ ഒരു മതേതര വിശ്വാസിക്ക് തിരുത്താന്‍ ഏത് ഉദ്ധരണിയാണ് തിരയേണ്ടി വരിക?

ഭരണപക്ഷത്തിന്റെ സമീപനത്തില്‍ നിന്നും ഏറെ വിഭിന്നമായിരുന്നില്ല ചില പ്രതിപക്ഷ ചേരികളുടെ ഇടപെടലും. ന്യൂനപക്ഷത്തിനൊപ്പം സമാശ്വാസത്തിന്റെ വാക്കുകള്‍ ചൊരിയുന്നതിന് പകരം അത്തര ക്കാര്‍ വ്യാകുലപ്പെട്ടത് ശിലാപൂജയ്ക്ക് ക്ഷണം കിട്ടാത്തതിന്റെ പേരിലായിരുന്നു. അവരെഴുതിപ്പഠിച്ച രാഷ്ട്രീയമീമാംസകള്‍ ഒരു വേള പുറത്തുചാടിയതാവാം. അല്ലെങ്കിലും എണ്‍പത്തിയഞ്ച് ശതമാനത്തോളം വരുന്ന ബഹുഭൂരിപക്ഷ സമൂഹത്തെ പ്രീണിപ്പിച്ചാലല്ലേ അടുത്ത നറുക്കെടുപ്പിനെങ്കിലും ലോട്ടറിയടിക്കുകയുള്ളു’ എന്നുനിനച്ചിട്ടുണ്ടാവും. പതിനഞ്ച് ശതമാനം മാത്രം വരുന്ന ഒരു സമുദായത്തിന്റെ ആശിര്‍വാദം കൊണ്ട് സീറ്റു കിട്ടുമെന്ന് സ്വപ്നം കാണുന്നതേ ഹിമാലയ മൗഢ്യമല്ലേ..! തുമ്മിയാല്‍ തെറിക്കുന്ന മൂക്കിനു പകരം മുള്ളിയാല്‍ ഒലിച്ചു പോകുമെന്ന് പരാമര്‍ശിക്കപ്പെട്ട ആശയത്തോടാവും അവരുടെ കടപ്പാടുകളത്രയും. ഒന്നു ചുരമാന്തിയാല്‍ പുറത്തുചാടാവുന്നതേയുള്ളു ആശയങ്ങളും ആദര്‍ശങ്ങളും.

വാസ്തവത്തില്‍ മത വകഭേദങ്ങള്‍ മറികടന്ന് ചിന്തിക്കുന്ന ഏത് വിശ്വാസിക്കും സ്വീകാര്യമാകുന്ന തത്വം, ഭൂരിപക്ഷത്തിനോടും ന്യൂനപക്ഷത്തിനോടും തുല്യനിലയില്‍ സഹവര്‍ത്തിക്കുന്ന രാഷ്ട്രീയ ചിന്തയാണ്. മറ്റുള്ള ചിന്തകള്‍ കേവലം ഹ്രസ്വലാഭങ്ങള്‍ നല്‍കുമെങ്കിലും ദീര്‍ഘകാലം ഈടോടെ നിലനില്‍ക്കുന്നത് മതേതരചിന്ത തന്നെയാവും. അഥവാ പക്ഷപാതമില്ലാത്ത ആശയങ്ങള്‍.

Continue Reading

columns

ധൂര്‍ത്തിന്റെ വഴിയില്‍ ഇനിയെന്ത്

ഖജനാവില്‍ പണം ഇല്ലന്നും പെന്‍ഷന്‍ നല്‍കാന്‍ പോലും വഴിയില്ലന്നും പറയുന്ന സര്‍ക്കാര്‍ ധൂര്‍ത്തിന്റെ കാര്യത്തില്‍ ഒരു വിട്ടുവീഴ്ച്ചക്കും തയാറാവുന്നില്ല.

Published

on

ശംസുദ്ദീന്‍ വാത്യേടത്ത്

കെ റെയിലിനും താഴിട്ടു. ഇനി ഏത് പദ്ധതിയുടെ പേരിലാണ് കേരള സര്‍ക്കാര്‍ ധൂര്‍ത്തിന് ഒരുങ്ങുന്നതെന്ന് അറിയില്ല. വികസന പദ്ധതികള്‍ നടപ്പാക്കാന്‍ പഠനത്തിനായി വിദേശ രാജ്യങ്ങള്‍, മുഖ്യമന്ത്രിയും മന്ത്രിമാരും കുടുംബവുമായി സന്ദര്‍ശിച്ച് ലക്ഷങ്ങള്‍ ചെലവഴിച്ചത് ആരോപണങ്ങള്‍ക്കിടയാക്കിയിരുന്നു. കെ റെയില്‍ പദ്ധതി എന്ന ആശയവുമായി വന്ന സമയത്ത് തന്നെ ഇത് കേരളത്തിന്ന് ആവശ്യമില്ലാത്ത ഒന്നാണെന്ന് മുന്നറിയിപ്പുണ്ടായിട്ടും മുന്‍കൂട്ടി ഉണ്ടാക്കിയ ഗുഢാലോചന അനുസരിച്ച് മുന്നോട്ട് പോയി. എന്ത് തടസം ഉണ്ടായാലും പുറകോട്ടില്ലന്ന പഖ്യാപനവുമായി സര്‍ക്കാര്‍ രംഗത്ത് വന്നെങ്കിലും സര്‍ക്കാറിന്റെ കമ്മീഷന്‍ തട്ടല്‍ ലക്ഷ്യം സാക്ഷാല്‍ക്കരിക്കാന്‍ കഴിയാതെ ഇപ്പോള്‍ കെ റെയിലിന് താഴിടേണ്ടി വന്നു.

ഒരു നാടിന്റെ വികസന പ്രവര്‍ത്തനങ്ങളിലെ പ്രധാന ഘടകമാണ് ഗതാഗത സൗകര്യം. കടലും പുഴയും കായലുകളും കാടും മലയും കൊണ്ടല്ലാം സമ്പുഷ്ടമായ കേരളത്തിലെ വിഭവങ്ങള്‍ ഉപയോഗപ്പെടുത്തിയും പ്രകൃതിയാല്‍ കനിഞ്ഞവ നശിപ്പിക്കാതെയും ഗതാഗത സൗകര്യവും വികസന പ്രവര്‍ത്തനങ്ങളും നടത്താം എന്നിരിക്കെ എന്തിനാണ് 63940 കോടി രൂപ ചിലവഴിച്ച് മണിക്കുറുകളുടെ വ്യത്യാസം പറഞ്ഞ് കെ റെയില്‍ എന്ന സെമി ഹൈസ്പീഡ് റെയില്‍ കൊണ്ട് വരുന്നത് എന്ന ചോദ്യം മുമ്പേ ഉയര്‍ന്നതാണ്. തിരുവനന്തപുരത്ത് നിന്ന് കാസര്‍കോട്ടേക്ക് 12 മണിക്കൂര്‍ എന്നത് 4 മണിക്കൂര്‍ ആക്കി ചുരുക്കുക എന്നതും വലിയ പദ്ധതി വരുമ്പോള്‍ വ്യവസായികള്‍ കൂടുതല്‍ കേരളത്തില്‍ നിക്ഷേപിക്കും എന്ന ലക്ഷ്യവുമാണ് സെമി ഹൈസ്പീഡ് റെയില്‍വേയുടെ പിന്നിലുള്ളതെന്ന് സര്‍ക്കാര്‍ വിശദീകരിക്കുന്നുണ്ടായിരുന്നെങ്കിലും ഇത്തരം ഒരു പദ്ധതി കേരളത്തിന് ആവശ്യമില്ലെന്ന് ഇടതു പക്ഷത്തുനിന്ന് തന്നെ ആവശ്യം ഉയര്‍ന്നിരുന്നു.
കെ റെയിലിന്റെ കടം തീര്‍ക്കാന്‍ ഒരു നൂറ്റാണ്ട് കൊണ്ട് കഴിയുമോ. അത്രയും യാത്രക്കാര്‍ കേരളത്തിലുണ്ടോ. അതിനു മാത്രം ടൂറിസ്റ്റുകള്‍ കേരളത്തില്‍ വരുമോ എന്നൊക്കെ ചിന്തിക്കാതെ ഏതെങ്കിലും കമ്പനി പറയുന്നതിന്ന് അനുസരിച്ച് തുള്ളാനുള്ളതാണോ കേരള ഭരണാധികാരികള്‍. ഗതാഗതത്തിന് തമിഴ്‌നാട്ടിലെ കന്യാകുമാരിയില്‍ നിന്നും കേരളത്തിന്റെ തീരദേശത്ത് കൂടി കടന്ന് പോകുന്ന പഴയ എന്‍.എച്ച് 17 ഇപ്പോഴത്തെ 66 മഹാരാഷ്ട്രയിലെ പനവേലി വരെയാണ്. 1622 കിലോമീറ്ററുള്ള ഈ 66 ഹൈവേ അടക്കം നിരവധി ഹൈവേകള്‍ കേരളത്തിലുണ്ട്. ഈ ഹൈവേയുടെ പോരായ്മകള്‍ നികത്തി ഇന്റര്‍നാഷണല്‍ സ്റ്റാന്റേഡ് ആക്കിയാല്‍ തന്നെ ഗതാഗതത്തിന്ന് വലിയ സൗകാര്യമാണ്. ഒപ്പം റയില്‍ ഗതാഗതം തിരുവനന്തപുരത്ത് നിന്ന് കാസര്‍കോടേക്ക് പോകുന്ന പാതകളായ ബ്രോഡ് ഗേജ് ഇരട്ടിപ്പിക്കുക, സിഗ്‌നല്‍ സംവിധാനം പുതിയ ടെക്‌നോളജിയില്‍ ചെയ്യുക തുടങ്ങിയ കാര്യങ്ങള്‍ ചെയ്താല്‍ ഇവിടത്തെ വലിയ പ്രശ്‌നങ്ങള്‍ തീരും. മറ്റ് സംസ്ഥാനങ്ങളിലെ സ്പീഡ് കേരളത്തില്‍ എത്തുമ്പോള്‍ ഒരു ട്രെയിനിനും എടുക്കാന്‍ കഴിയുന്നില്ല. റെയിലിന്റെ പ്രധാന പ്രശ്‌നങ്ങള്‍ പരിഹരിച്ചാല്‍ 12 മണിക്കൂര്‍ എന്നത് 6 മണിക്കൂര്‍ കൊണ്ട് തിരുവനന്തപുരത്ത് നിന്നും കാസര്‍കോട് എത്തുന്ന ട്രെയിനുകള്‍ നിലവിലുള്ള ഈ പാതയിലൂടെ ഓടിക്കാന്‍ കഴിയും. മാത്രമല്ല

ഇതോടൊപ്പം സെമി ഹൈസ്പീഡ് വേണ്ട ഹൈസ്പീഡ് ട്രെയിന്‍ തന്നെ നമ്മുടെ നിലവിലുള്ള റയില്‍പാതയോട് ചേര്‍ന്ന് നിര്‍മിക്കാവുന്നതാണ്. എങ്കില്‍ ഇപ്പോള്‍ പ്ലാന്‍ ചെയ്തതിന്റെ 25 ശതമാനം മാത്രമേ ചിലവ് വരുകയുള്ളുവെന്നാണ് പറയുന്നത്. എറണാകുളം ഇടപ്പള്ളിയില്‍ നിന്നും പറവൂര്‍ കൊടുങ്ങല്ലൂര്‍, ചാവക്കാട്, തിരൂര്‍ തീരദേശ റെയില്‍ എന്നത് ഒരു നൂറ്റാണ്ടിനപ്പുറമുള്ള ആവശ്യമാണ്.തിരുവനന്തപുരം കൊല്ലം ആലപ്പുഴ എറണാകുളം കൊടുങ്ങല്ലൂര്‍ ചാവക്കാട് തിരൂര്‍ കോഴിക്കോട് കാസര്‍ക്കോട് എത്തുന്ന ഒരു തീരദേശ റെയില്‍ നടപ്പായാല്‍ ഉണ്ടാവുന്ന വികസന നേട്ടങ്ങള്‍ വളരെ വലുതായിരിക്കും. ഈ പാത വന്നാല്‍ ഏകദേശം 50 കിമീറ്ററോളം കുറവായിരിക്കും നിലവിലുള്ള പാത വിട്ട്. മറ്റൊന്ന് ജലഗതാഗതമാണ്. തിരുവനന്തപുരം കോവളം മുതല്‍ കാസര്‍കോട് ഹോസ്ദൂര്‍ഗ് വരെ ജലഗതാഗതം നടപ്പാക്കാന്‍ ആലോചന ഉണ്ടായിരുന്നു. 450 കിലോമീറ്റര്‍ ദൈര്‍ഘ്യം വരുന്ന ഈ പാത നടപ്പായാല്‍ നിലവിലെ പല യാത്രാപ്രശ്‌നങ്ങള്‍ക്കും പരിഹാരമാവും എന്ന് മാത്രമല്ല ടൂറിസ്റ്റുകള്‍ക്ക് കേരളത്തിലേക്ക് വരാന്‍ വലിയ താല്‍പര്യം ഉണ്ടാവുകയും ചെയ്യും. 70 മീറ്റര്‍ വീതിയും 20 മീറ്റര്‍ ആഴവും ഉള്ള പദ്ധതിയാണ് ഉദേശിക്കുന്നത്. 450 കിലോമീറ്ററില്‍ 200 കിലോമീറ്ററോളം ജലപാത കേരളത്തിലുണ്ട്. അതില്‍ പ്രധാനം കൊല്ലം കൊടുങ്ങല്ലൂര്‍ കോട്ടപ്പുറം ദേശീയ ജലപാത. ബാക്കിയുള്ള പല പ്രദേശങ്ങളിലും വീതി കൂട്ടിയും ആഴം ഉണ്ടാക്കിയും ഈ ജലപാത നടപ്പാക്കിയാല്‍ ഉണ്ടാവുന്ന യാത്രാ സൗകര്യവും ടൂറിസ്റ്റുകളെ ആകര്‍ഷിക്കലും 64 ആയിരം കോടിയി ചിലവ് ചെയ്ത് നിര്‍മ്മിക്കുന്ന സെമി ഹൈസ്പീഡ് െ്രെടനിനുണ്ടാവുകയില്ല എന്നത് തീര്‍ച്ചയാണ്. എന്നിട്ടും കെ റെയില്‍ കൊണ്ടുവന്നേ അടങ്ങൂ എന്ന പിടിവാശിയിലായിരുന്നു സര്‍ക്കാര്‍.

ജനോപകാരമുള്ള പല പദ്ധതികളും വേണ്ടന്നു വെച്ചും വെട്ടി കുറച്ചുമാണ് സര്‍ക്കാര്‍ ഇപ്പോള്‍ മുന്നോട്ട് പോകുന്നത്. ദുരന്തങ്ങള്‍ അഴിമതിക്ക് മറയാക്കരുത് എന്ന് കഴിഞ്ഞ ദിവസം കേരള ഹൈക്കോടതി തന്നെ പറഞ്ഞിരിക്കുന്നു. പ്രളയകാലത്തെ ദുരിദാശ്വാസ ഫണ്ടും കോവിഡ് കാലത്തെ പി.പി.ഇ കിറ്റ് അഴിമതിയും പിന്‍ വാതില്‍ നിയമനവും എല്ലാം സര്‍ക്കാറിന്റെ അഴിമതി മുഖമാണെങ്കിലും അതിനെയല്ലാം മറച്ച് വെക്കുന്ന സര്‍ക്കാര്‍ തന്ത്രം പലപ്പോഴും പൊളിഞ്ഞിട്ടുണ്ട് എന്നതും നാം മറക്കരുത്. ഖജനാവില്‍ പണം ഇല്ലന്നും പെന്‍ഷന്‍ നല്‍കാന്‍ പോലും വഴിയില്ലന്നും പറയുന്ന സര്‍ക്കാര്‍ ധൂര്‍ത്തിന്റെ കാര്യത്തില്‍ ഒരു വിട്ടുവീഴ്ച്ചക്കും തയാറാവുന്നില്ല.

Continue Reading

Trending