കൊച്ചി: ഇന്ത്യന്‍ ഫുട്ബാള്‍ ആരാധകര്‍ ആവേശത്തോടെ കാത്തിരുന്ന ഐ.എസ്.എല്ലിന്റെ പത്താം സീസണ് ഇന്ന് കൊച്ചി ജവഹര്‍ലാല്‍ നെഹ്‌റു സ്‌റ്റേഡിയത്തില്‍ തുടക്കം. മലയാളികളുടെ സ്വന്തം ടീം കേരള ബ്ലാസ്‌റ്റേഴ്‌സും ബംഗളൂരു എഫ്.സിയും തമ്മിലുള്ള ഉദ്ഘാടന മത്സരത്തിന്റെ കിക്കോഫ് രാത്രി 8ന്.

കഴിഞ്ഞ പ്ലേ ഓഫിലേറ്റ മുറിവിന്റെ കണക്ക് ഇന്ന് തീര്‍ക്കാനുറച്ചാണ് ബ്ലാസ്‌റ്റേഴ്‌സ് ബംഗളൂരുവിനെതിരെ ഇന്ന് ബൂട്ട് കെട്ടുന്നത്. കിരീടം മാത്രം ലക്ഷ്യമിട്ട് ഒരുപിടി മാറ്റങ്ങളോടെ പുതുമന്ത്രവും തന്ത്രവുമായാണ് അഡ്രിയന്‍ ലൂണയുടെ നേതൃത്വത്തില്‍ ബ്ലാസ്‌റ്റേഴ്‌സ് വരുന്നത്. തോല്‍വിയെപ്പറ്റി ചിന്തിക്കാന്‍ പോലുമാകാത്ത മുന്‍ചാമ്പ്യന്മാരായ ബംഗളൂരു എഫ്.സിയും വിജയത്തുടക്കമാണ് ലക്ഷ്യം വച്ചിരിക്കുന്നത്. സ്‌പോര്‍ട്‌സ് 18ലും സൂര്യ ടിവിയിലും തത്സമയം കാണാം.

കണ്ണൂര്‍: കാല്‍പന്ത് കളിയില്‍ തീരദേശ നാട്ടില്‍ അഭിമാന താരമായി വീണ്ടും സിനാന്‍. ഇത്തവണയും മെെതാനത്തിറങ്ങും ജില്ലയ്ക്ക് വേണ്ടി സീനിയര്‍ സ്കൂള്‍ ടീം താരമായി.
അടുത്ത മാസം തിരുവനന്തപുരത്ത് നടക്കുന്ന സ്കൂള്‍ തല അണ്ടര്‍-19 ടൂര്‍ണമെന്റിലേക്കാണ് ജില്ലയ്ക്ക് വേണ്ടി കളിക്കാന്‍ പുതിയങ്ങാടി സ്വദേശി കെ.വി സിനാന് അവസരം ലഭിച്ചിരിക്കുന്നത്.

പുതിയങ്ങാടി ജമാഅത്ത് ഹയര്‍സെക്കന്ററി സ്കൂളില്‍ പ്ലസ് ടു വിദ്യാര്‍ഥിയാണ് സിനാന്‍. സ്കൂള്‍ ടീമിനെ ഉപജില്ലാ തലത്തില്‍ കിരീടമണിയിക്കുന്നതില്‍ നിര്‍ണായക പങ്കുവഹിച്ച താരമാണ് ഈ മിടുക്കന്‍.

രണ്ടാം തവണയാണ് സ്കൂള്‍ ടീമിലൂടെ ജില്ലാ ടീമില്‍ കളിക്കാന്‍ യോഗ്യത നേടുന്നത്. കഴിഞ്ഞ വര്‍ഷം പാലക്കാട് നടന്ന അണ്ടര്‍-19 ഫുട്ബോള്‍ ടൂര്‍ണമെന്റിലും സീനിയര്‍ സ്കൂള്‍ ടീമില്‍ ജില്ലയ്ക്ക് വേണ്ടി കളിച്ചിരുന്നു. പഠനത്തിനൊപ്പം കായിക മേഖലയിലും പ്രോത്സാഹനം നല്‍കുന്ന പുതിയങ്ങാടി ജമാഅത്ത് ഹെെസ്കൂളില്‍ നിന്നും ഫുട്ബോളില്‍ മികവ് തെളിയിക്കുന്ന സിനാനില്‍ സ്കൂളിനും മാനേജ്മെന്റിനുമൊപ്പം നാടിനും പ്രതീക്ഷയേറെയാണ്.

കായികാധ്യാപകന്‍ ഷംജിത്തിന് കീഴിലാണ് ഫുട്ബോളില്‍ സിനാന്‍ പരിശീലനം നേടുന്നത്. എരിപുരത്ത് പഴയ ജെടിസിക്ക് സമീപം പുതിയങ്ങാടി സ്വദേശിനി കെ.വി സബീദയുടെയും പി.എം ശരീഫിന്റെയും മകനാണ് സിനാന്‍.

ഇന്ത്യന്‍ സൂപ്പര്‍ ലീഗിന്റെ പത്താം സീസണ് നാളെ കിക്ക് ഓഫ്. പുതിയ സീസണില്‍ ബ്ലാസ്‌റ്റേഴ്‌സ് ആരാധകര്‍ക്കായി കിരീടം നേടുക എന്ന ഒറ്റ ലക്ഷ്യമെന്ന് ബ്ലാസ്‌റ്റേഴ്‌സ് പ്രതിരോധനിര താരം പ്രീതം കോട്ടാല്‍  പറഞ്ഞു. ഒരു ടീം എന്ന നിലയില്‍ ബ്ലാസ്‌റ്റേഴ്‌സ് മികച്ച സംഘമാണ് . കൊച്ചിയിലെ ആരാധകര്‍ക്ക് വേണ്ടി കളിക്കാന്‍ കാത്തിരിക്കുകയാണ് എന്നും പ്രീതം കോട്ടാല്‍ പറഞ്ഞു

പുതിയ സീസണ്‍ നന്നായി തുടങ്ങാനാകുമെന്നാണ് പ്രതീക്ഷിക്കുന്നത്. അതിനു വേണ്ടി ഒരുങ്ങി കഴിഞ്ഞു. ഞാന്‍ എപ്പോഴും വെല്ലുവിളികള്‍ ഏറ്റെടുക്കാന്‍ ആഗ്രഹിക്കുന്ന ഒരാളാണ്. ബ്ലാസ്‌റ്റേഴ്‌സില്‍ എത്തിയതും അത്തരം ഒരു തീരുമാനത്തിന്റെ ഭാഗമാണ്. എനിക്കറിയാം എന്റെ ജീവിതത്തിലെ ഏറ്റവും കടുത്ത വെല്ലുവിളിയാണ് ഇത്.ചിലപ്പോഴൊക്കെ നമ്മള്‍ പുതിയ വെല്ലുവിളികള്‍ ഏറ്റെടുക്കണം.പ്രീതം പറഞ്ഞു.

”സന്തുലിതമായ ടീമാണ് സീസണില്‍ ബ്ലാസ്‌റ്റേഴ്‌സിനുള്ളത്. പരിചയസമ്പത്തുള്ളവരും യുവതാരങ്ങളും നല്ല വിദേശ കളിക്കാരും ഈ സീസണില്‍ ടീമിലുണ്ട്.കിരീടത്തിനായി മത്സരിക്കാന്‍ ഒരുങ്ങിക്കഴിഞ്ഞു. കഴിഞ്ഞ 10 വര്‍ഷമായി ആരാധകര്‍ ഞങ്ങളെ സ്‌നേഹിക്കുന്നു. അവര്‍ക്കായി ഞങ്ങള്‍ മികച്ച പ്രകടനം തന്നെ പുറത്തെടുക്കും.തീര്‍ച്ചയായും നിങ്ങള്‍ സ്‌റ്റേഡിയത്തിലേക്ക് വരണം.. അവിടെ ഞങ്ങള്‍ നിങ്ങള്‍ക്കായി പോരാടും” പ്രീതം കൂട്ടിച്ചേര്‍ത്തു.