Connect with us

Video Stories

വിഭജനത്തിന്റെ ഇടതു മതില്‍

Published

on

 

പി.ഇസ്മായില്‍ വയനാട്

കേരളീയ നവോത്ഥാനത്തിന്റെ പിതൃത്വം സ്വന്തമാക്കാനുള്ള മത്സരമാണിപ്പോള്‍ പിണറായി സര്‍ക്കാരും വിശിഷ്യാ സി പി എം പ്രസ്ഥാനവും അടിക്കടി നടത്തി കൊണ്ടിരിക്കുന്നത്. ഭാഷ.ഭക്ഷണം. വേഷം. തുടങ്ങിയ ജീവിതത്തിന്റെ എല്ലാ വ്യവഹാരങ്ങളിലും കഴിഞ്ഞ നൂറ്റാണ്ടില്‍ ഇവിടം ജാതീയത കൊടികുത്തി വാഴുകയുണ്ടായി. തൊട്ടുകൂടായ്മയുടെയും തീണ്ടി കൂടായ്മയുടെയും പേരില്‍ ജാതീയതയുടെ കണ്ണുനീര്‍ കുടിക്കേണ്ടി വന്ന ഹതഭാഗ്യരെ കണ്ടപ്പോഴാണ് സ്വാമി വിവേകാനന്ദന്‍ കേരളത്തെ ഭ്രാന്താലയമെന്ന് വിശേഷിപ്പിച്ചത്. ആരാധനാ സ്വാതന്ത്ര്യം. സഞ്ചാരസ്വാതന്ത്ര്യം. വിദ്യാഭ്യാസ അവകാശം. സ്വത്തവകാശം എന്നിവയെല്ലാം കീഴാള വിഭാഗത്തെ സംബന്ധിച്ചടുത്തോളം അന്ന് കിട്ടാക്കനികളായിരുന്നു.പുതിയ മനുഷ്യനെയും സമൂഹത്തെയും സൃഷ്ടിച്ചെടുക്കുന്നതിനായി മാറ്റാനും മാറാനും ആഹ്വാനം ചെയ്തുകൊണ്ടാണ് നിരവധി നവോത്ഥാന പ്രസ്ഥാനങ്ങള്‍ അക്കാലത്ത് ഉടലെടുത്തത്. ജാതീയതയുടെ നാരായവേരുകള്‍ പിഴുതെറിയും വിധം ശ്രീ നാരായണ ഗുരുവിന്റെ കാര്‍മികത്വത്തില്‍ നടമാടിയ അരവിപ്പുറം ഈഴവശിവ പ്രതിഷ്ഠ. അയിത്തജാതിക്കാര്‍ക്ക് സ്‌കൂളില്‍ പ്രവേശനമില്ലങ്കില്‍ പാടങ്ങളില്‍ പുല്ലു കിളിര്‍ക്കാതെ വരുമെന്ന് പ്രഖ്യാപിച്ചു കൊണ്ടുള്ള അയ്യന്‍കാളിയുടെ കാര്‍ഷിക വിദ്യാഭ്യാസ വിപ്ലവം. സഞ്ചാരസ്വാതന്ത്ര്യത്തിനായി അയ്യന്‍കാളി തന്നെ നടത്തിയ വില്ലുവണ്ടി സമരം. സഹോദരന്‍ അയ്യപ്പന്റെ മിശ്രഭോജനം. മന്നത്ത് പത്മനാഭന്‍ നടത്തിയ പന്തിഭോജനം.കുമാരനാശാന്റെയും പണ്ഡിറ്റ് കറുപ്പന്റെയും അക്ഷരവിപ്ലവം. ഗുരുവായൂര്‍ സത്യാഗ്രഹം.വൈക്കം സത്യാഗ്രഹം.അങ്ങിനെയുള്ള ചെറുതും വലുതുമായ ഒട്ടനവധി ചെറുത്ത് നില്‍പിലൂടെയാണ് ഭ്രാന്താലയത്തെ സ്‌നേഹാ ലയമാക്കി തീര്‍ത്തത്.
കേരളത്തെ മാറ്റിപ്പണിത നവോത്ഥാന മുന്നേറ്റത്തില്‍ ഇടതുപക്ഷ പ്രസ്ഥാനങ്ങള്‍ക്ക് കാഴ്ചക്കാരുടെ റോള്‍ പോലുമുണ്ടായിട്ടില്ല.അവരാണിപ്പോള്‍ ഒന്ന് വീതം മുന്ന് നേരം നവോത്ഥാനത്തെ കുറിച്ച് വാചാലരാവുന്നത്.ക്ഷേത്രത്തില്‍ പ്രവേശിച്ചതിന്റെയും ദൈവനാമത്തില്‍ സത്യപ്രതിജ്ഞ ചെയ്തതിന്റെയും പേരില്‍ പാര്‍ട്ടി അംഗങ്ങളോട് വിശദീകരണം ആരാഞ്ഞവര്‍ തന്നെയാണ് ഏതാനും വാരങ്ങള്‍ക്കപ്പുറം ക്ഷേത്ര പ്രവേശന വിളംബരം കൊണ്ടാടിയത്. ഭരണഘടനാ ദിനത്തില്‍ സ്‌കൂളുകളില്‍ നവോത്ഥാന പാഠശാലയും സംഘടിപ്പിക്കുകയുണ്ടായി.കേരളം ഭ്രാന്താലയമാക്കരുത് എന്ന ശീര്‍ഷകത്തില്‍ ഏറ്റവും ഒടുവിലായി വനിതാ മതില്‍ എന്ന പ്രഖ്യാപനവും കൂടി പിണറായി സര്‍ക്കാര്‍ നടത്തിയിരിക്കുകയാണ്.സ്ത്രീ സമത്വവും നവോത്ഥാന മൂല്യങ്ങളുടെ സംരക്ഷണവുമാണ് വനിതാ മതിലിന്റെ മുഖ്യ ലക്ഷ്യമായി പറയപ്പെടുന്നത്. ശബരിമല വിഷയത്തില്‍ സുപ്രിം കോടതി വിധി നടപ്പിലാക്കാന്‍ ധ്യതി കൂട്ടിയ സര്‍ക്കാരിനെതിരായി ലക്ഷകണക്കിന് സ്ത്രീകളാണ് നാമജപയാത്രയില്‍ പങ്കാളികളായത്. വിശ്വാസിനികളുടെ മനസ്സില്‍ തളം കെട്ടി നില്‍ക്കുന്ന സര്‍ക്കാര്‍ വിരോധം മറികടക്കാനായിട്ടാണ് വനിതാ മതിലെന്ന ആശയവുമായി ഇടതുപക്ഷം രംഗത്തെത്തിയിട്ടുള്ളത്. എറണാകുളം ജില്ലയില്‍ ചൂണ്ടി ഭജനമഠം ക്ഷേത്രത്തിന് മുന്നില്‍ ദളിതുകള്‍ക്ക് നേരെ അയിത്തത്തിന്റെ ഭാഗമായി ഉയര്‍ന്നു വന്ന ജാതിയ മതിലിനു ഭരണത്തിന്റെ തണലില്‍ സംരക്ഷണം നല്‍കിയവരും അത് പൊളിച്ചതിന്റെ പേരില്‍ സ്ത്രീകളടക്കം നിരവധി ദളിതുകളുടെ പേരില്‍ കേസ്സെടുക്കുകയും ചെയ്തവരാണിപ്പോള്‍ നവോത്ഥാന മതില്‍ നിര്‍മാണത്തിനായി കല്ലുകള്‍ പൊട്ടിക്കുന്നതും കട്ടയേന്തുന്നതും. സ്ത്രീ സമത്വത്തിന്റെ വിളംബരമായി കൊട്ടിഘോഷിക്കുന്ന വനിതാ മതിലിന്റെ കൂടിയാലോചനായോഗത്തില്‍ ഒരു വനിതയും പങ്കെടുത്തതായി അറിവില്ല.650 കിലോ മിറ്റര്‍ ദൂരത്തില്‍ സ്യഷ്ടിക്കപ്പെടുമെന്ന് പറയുന്ന വനിതാമതിലിന്റെ സംഘാടക സമിതി ചെയര്‍മാനും കണ്‍വീനറടക്കമുള്ള എല്ലാ പദവികളിലും പുരുഷ കേസരിമാര്‍ മാത്രമാണുള്ളത്.
വനിതാ മതിലിന്റെ മേല്‍നോട്ടക്കാരായി മാര്‍ക്ക്‌സിസ്റ്റ് സര്‍ക്കാര്‍ നിയോഗിച്ച വെള്ളാപ്പള്ളി നടേശനും സി. പി സുഗതനും മലയാളികളുടെ സ്‌നേഹ പൊയ്കയില്‍ പല ഘട്ടങ്ങളിലായി വര്‍ഗ്ഗീയ വിഷം ചീറ്റിയവരാണ്. കോഴിക്കോട് നഗരത്തിലെ മാന്‍ഹോളില്‍ കുടുങ്ങിയ അയല്‍ സംസ്ഥാന തൊഴിലാളികളുടെ ജീവന്‍ രക്ഷിക്കുന്നതിനിടയില്‍ മരണപ്പെട്ട ഓട്ടോ ഡ്രൈവര്‍ നൗഷാദിന്റെ നിര്‍ധന കുടുംബത്തിന് അന്നത്തെ ഉമ്മന്‍ ചാണ്ടി സര്‍ക്കാര്‍ സാമ്പത്തിക സഹായം പ്രഖ്യാപിക്കുകയുണ്ടായി. ജാതി ചോദിക്കരുതെന്ന് ആഹ്വാനം ചെയ്ത ശ്രീനാരായണ ഗുരുവിന്റെ പിന്‍മുറക്കാരനായ വെള്ളാപ്പള്ളി നാടുനീളെ നൗഷാദിന് ജന്മം നല്‍കിയ മതത്തെ കുറിച്ചായിരുന്നു സംസാരിച്ചത്. പിണറായി സര്‍ക്കാര്‍ പാര്‍ട്ടിക്കാര്‍ക്ക് ഖജനാവില്‍ നിന്ന് ലക്ഷങ്ങള്‍ കൈമാറിയപ്പോഴും പച്ചയായി സ്വജനപക്ഷപാതം കാട്ടിയപ്പോഴും ഒരക്ഷരം മറുത്ത് പറയാന്‍ വെള്ളാപ്പള്ളി തയാറായിട്ടുമില്ല. അച്ചന്റെ കാല്‍ മാര്‍ക്‌സിസ്റ്റ് വഞ്ചിയിലാണെങ്കില്‍ മകന്‍ തുഷാര്‍ വെള്ളാപ്പള്ളിയുടെ കാലുള്ളത് ബി ജെ പിയുടെ വഞ്ചിയിലാണ്.സി പി എമ്മിനുംആര്‍ എസ്സ് എസ്സിനുമിടയില്‍ വര്‍ഷങ്ങളോളമായി പാലമായി വര്‍ത്തിക്കുന്നത് വത്സന്‍ തില്ലങ്കേരിയാണെങ്കില്‍ അവിഹിത ബന്ധത്തിന്റെ പുതിയ ഇടമായിട്ടാണ് വെള്ളാപ്പളിയുടെ ഇപ്പോഴത്തെ സ്ഥാനാരോഹണത്തെ കണക്കാക്കേണ്ടത്. ബാബരി മസ്ജിദ് തകര്‍ക്കാനായി കര്‍സേവയില്‍ പങ്കെടുത്ത ഹിന്ദു പാര്‍ലമെന്റിന്റെ നേതാവ് സി.പി സുഗതനെയാണിപ്പോള്‍ സി പി എമ്മുകാര്‍ നവോത്ഥാനത്തിന്റെ അവതാര പുരുഷനായി എഴുന്നള്ളിപ്പിച്ചിട്ടുള്ളത്. കര്‍സേവയില്‍ പങ്കെടുത്തത് പക്വത വരാത്ത പ്രായത്തിലാണെന്നാണ് പിണറായിക്കായി നടത്തിയ കുമ്പസാര നാടകത്തില്‍ സുഗതന്‍ ഏറ്റു പറിച്ചല്‍ നടത്തിയത്. ഹാദിയയുടെ അച്ചന്റെ സ്ഥാനത്ത് താനായിരുന്നെങ്കില്‍ അവളെ കൊന്ന് ജയിലില്‍ പോകുമെന്നും അവളെ പരസ്യമായി ഭോഗിക്കണമെന്നുമുള്ള സുഗതന്റെ വാ മൊഴിയും വരമൊഴിയും ഏത് നവോത്ഥാനത്തിന്റെ കണക്ക് പുസ്തകത്തിലാണ് പിണറായിയും കൂട്ടരും വരവു വെച്ചിട്ടുള്ളതെന്ന് ഇനിയെങ്കിലും വിശദീകരിക്കേണ്ടതുണ്ട്. നൂറ്റാണ്ട് സാക്ഷ്യം വഹിച്ച പ്രളയക്കെടുതികള്‍ മണിക്കൂറുകളോളം ലോകത്തിന് മുന്നില്‍ അറിയിക്കുകയും മുഖ്യമന്ത്രിയുടെ ദുരിതാശ്വാസ നിധിയിലേക്ക് 10 കോടി സമാഹരിക്കാന്‍ മുന്നിട്ടിറങ്ങുകയും ചെയ്ത എന്‍.ടി.ടിവിയുടെ റിപ്പോര്‍ട്ടര്‍ സ്‌നേഹ മേരി കോശിക്കെതിരായി ശബരിമലയില്‍ വെച്ച് ഭരണിപ്പാട്ട് നടത്തിയ സുഗതനെയാണിപ്പോള്‍ വനിതാ മതിലില്‍ സ്ത്രീകള്‍ക്ക് സാരോപദേശം നല്‍കാന്‍ സര്‍ക്കാര്‍ നാടുനീളെ ചുമതലപ്പെടുത്തിയിട്ടുള്ളത്.
എന്‍ എസ്സ് എസ്സ്.ക്ഷത്രീയ ക്ഷേമസഭ. യോഗക്ഷേമസഭ തുടങ്ങിയ പ്രസ്ഥാനങ്ങള്‍ മുഖ്യമന്ത്രി വിളിച്ചു ചേര്‍ത്ത യോഗത്തില്‍ നിന്ന് വിട്ടു നില്‍ക്കുകയുണ്ടായി. അന്നത്തെ യോഗത്തില്‍ പങ്കെടുത്ത അന്‍പതില്‍പരം സംഘടനകള്‍ വനിതാ മതിലിന്റെ നടത്തിപ്പില്‍ നിന്ന് പിന്‍മാറിയിരിക്കുകയാണ്. ശ്രീ നാരായണ ധര്‍മവേദിയെ പ്രതിനിധീകരിച്ച് സി.കെ വിദ്യാസാഗറിനെ സംഘാടക സമിതിയില്‍ ഉള്‍പ്പെടുത്തിയതിനെ ചോദ്യം ചെയ്ത് ധര്‍മവേദി ജനറല്‍ സെക്രട്ടറി ബിജു രമേശ് മുഖ്യമന്ത്രിക്ക് നേരിട്ട് പരാതി നല്‍കുകയും ചെയ്യുകയുണ്ടായി. നവോത്ഥാന മൂല്യങ്ങള്‍ സംരക്ഷിക്കാനെന്ന പേരില്‍ മുഖ്യമന്ത്രി ജാതീയ സംഘടനകളുടെ മാത്രം യോഗം വിളിച്ചു ചേര്‍ത്തതിനെതിരായി കടുത്ത പ്രതിഷേധമാണ് ഉയര്‍ന്നിട്ടുള്ളത്. വിമര്‍ശന മതിലിന് ആദ്യമായി ശില പാകിയത് മറ്റാരുമല്ല സാക്ഷാല്‍ വി.എസ് അച്ചുതാനന്ദനാണ്. ജാതി സംഘടനകളെ വിളിച്ചു ചേര്‍ത്തത് മാര്‍ക്‌സിസ്റ്റ് മുഖ്യമന്ത്രിക്ക് ചേര്‍ന്ന ശൈലിയല്ലെന്നാണ് അദ്ദേഹം തുറന്നടിച്ചത്. കേരളീയ നവോത്ഥാനത്തിന് ഹൈന്ദവതയുടെ നിറം ചാര്‍ത്തി കൊടുക്കാനാണ് മാര്‍ക്‌സിസ്റ്റ് സര്‍ക്കാരിന്റെ ശ്രമം. പള്ളികളോടൊപ്പം പള്ളിക്കൂടമെന്ന ആശയവും സാധാരണ കുട്ടികള്‍ക്കായി പിടിയരി സംരംഭവും നാനാ ജാതി മതസ്ഥരെ ഒരേ ക്ലാസ്സിലിരുത്തി വിദ്യാഭ്യാസ നവോത്ഥാനത്തിന് തുടക്കം കുറിച്ച ചാവറയച്ചന്റെ സംഭാവനകള്‍ അവിസ്മരണീയമാണ്. ഭയ കൗടില്യ ലോപങ്ങള്‍ വളര്‍ത്തില്ലൊരു നാടിനെ എന്ന ആപ്ത വാക്യത്തോടെ ആരംഭിച്ച വക്കം അബ്ദുള്‍ ഖാദര്‍ മൗലവിയുടെ സ്വദേശാഭിമാനി പത്രവും കേരളത്തിന്റെ ഇരുണ്ട കാലം മാറ്റി മറിക്കുന്നതില്‍ നിസ്തുലമായ പങ്കാണ് വഹിച്ചിട്ടുള്ളത്. ക്രൈസ്തവ മിഷണറിമാരും മുസ്‌ലിം നവോത്ഥാന നായകരുടെയുമെല്ലാം സ്ഥാനം പിണറായിയുടെ മതിലിനു പുറത്താണ്.
ആലപ്പുഴയില്‍ സംസ്ഥാന സ്‌കൂള്‍ കലോത്സവത്തിന് തിരശ്ശീല വീഴുമ്പോള്‍ ചിലങ്ക കെട്ടിയവരുടെയും ദഫ്മുട്ടിയവരുടെയും കൈകകളില്‍ കിരീടമോ ട്രോഫി യോ കാണാന്‍ കഴിഞ്ഞിട്ടില്ല. അവിടെ കലോത്സവത്തിനായി പന്തല്‍ കെട്ടിയതും പായസം കാച്ചിയതും ഭക്ഷണം വിളമ്പിയതും സര്‍ക്കാര്‍ ചിലവിലുമായിരുന്നില്ല. സാമ്പത്തിക ക്ലേശത്തിന്റെ പേരില്‍ സംസ്ഥാന സ്‌കൂള്‍ കായികമേളയിലും മെഡലുകളുടെ വിതരണവും നടന്നിരുന്നില്ല. പഞ്ചായത്ത് തലങ്ങളില്‍ കേരളോത്സവവും ഉപേക്ഷിക്കുകയുണ്ടായി. പ്രളയാനന്തര കേരളത്തില്‍ ഒരു വര്‍ഷത്തേക്ക് ആഘോഷങ്ങള്‍ക്ക് സര്‍ക്കാര്‍ താല്‍ക്കാലിക അവധി പ്രഖ്യാപിച്ചിരുന്നു. തീരുമാനത്തില്‍ നിന്നും സര്‍ക്കാര്‍ തന്നെയാണ് ഒളിച്ചോട്ടം നടത്തുന്നത്. സാമ്പത്തിക പരാധീനതയുടെ പേരില്‍ സ്‌കൂള്‍ കലോത്സവത്തിന് പോലും പണം നിഷേധിച്ചവരാണിപ്പോള്‍ വനിതാ മതിലിനായി കോടികള്‍ തുലക്കുന്നത്. വിദ്യാര്‍ത്ഥിനികള്‍. ആശ അങ്കണ്‍വാടി വര്‍ക്കേഴ്‌സ് .കുടുംബശ്രീ പ്രവര്‍ത്തകര്‍.വനിതാ ഉദ്യോഗസ്ഥര്‍. തുടങ്ങിയ എല്ലാവരെയും പങ്കാളിത്തം ഉറപ്പുവരുത്താന്‍ സര്‍ക്കാര്‍ സംവിധാനങ്ങളെപ്പോലും ഭരണകൂടം ദുരുപയോഗം ചെയ്യുകയാണ്. സ്ത്രീ സംരക്ഷണത്തിനായി ശബ്ദിക്കുന്ന സി പി എമ്മുകാര്‍ തന്നെയാണ് പലപ്പോഴും സ്ത്രീ പീഡന വിഷയങ്ങളില്‍ പാര്‍ട്ടി ഓഫീസുകള്‍ കോടതിയായും സെക്രട്ടറിമാരെ ജഡ്ജിമാരുമായും പോളിറ്റ് ബ്യുറോ മെമ്പര്‍മാരെ അന്വേഷണ കമ്മീഷന്‍മാരുമായി പ്രഖ്യാപിക്കാറുള്ളത്- സ്വന്തം താല്‍പര്യ സംരക്ഷണത്തിനായി സി പി എമ്മുകാര്‍ വനിതാ കമ്മീഷനെ പോലും നോക്കി കുത്തിയാക്കിയ എത്രയോ സംഭവങ്ങള്‍ക്കാണ് ഇയ്യിടെ കേരളം സാക്ഷിയായിട്ടുള്ളത്.പാര്‍ട്ടിയുടെ ഔദ്യോഗിക പദവികളില്‍ നിന്ന് തീണ്ടാപ്പാടകലെ സ്ത്രികളെ മാറ്റിനിര്‍ത്തിയ വര്‍ വിഭാഗീയതയുടെയും വര്‍ഗ്ഗീയതയുടെയും മതിലുകളാണ് കെട്ടിപ്പൊക്കുന്നതെന്ന് ഉറക്കെ പറയാന്‍ സാംസ്‌കാരിക കേരളത്തിനാവണം. ദുരാചാരത്തിന്റെ പേരില്‍ മതാചാരങ്ങളെ സര്‍ക്കാര്‍ ചിലവില്‍ തെരുവോരങ്ങളില്‍ പരിഹസിക്കപ്പെടാനുള്ള നീക്കങ്ങള്‍ ഒട്ടും ഭൂഷണമല്ല.
വിശ്വാസികള്‍ക്കിടയിലെ പോരായ്മകള്‍ തിരുത്തേണ്ടതിന്റെ ഉത്തരവാദിത്വം വിശ്വാസികളുടേതാണ്. നിരീശ്വരവാദികളും അവിശ്വാസികളും അതിന് തുനിയുന്നത് തിരിച്ചടിയാകും.കോഴിമുട്ട അകത്ത് നിന്ന് സ്വയം പൊട്ടുമ്പോള്‍ കുഞ്ഞായി തീരുകയും പുറത്ത് നിന്ന് പൊട്ടിക്കുമ്പോള്‍ അതിന് ജീവന്‍ നഷ്ടപ്പെടുമെന്നത് തീര്‍ച്ചയാണ്.ഈ യാഥാര്‍ത്ഥ്യം മതനവീകരണത്തിനായി ഇറങ്ങി തിരിച്ച ഭൗതീകതയുടെ വക്താക്കളായ പിണറായിയും ഭരണകൂടവും തിരിച്ചറിയേണ്ടതുണ്ട്. പ്രളയത്തില്‍ സര്‍വവും നഷ്ടപ്പെട്ടവരുടെ നഷ്ടപരിഹാരം നാളിതുവരെയായിട്ടും വിതരണം ചെയ്യാതെയും റോഡും പാലവും പുനര്‍നിര്‍മിക്കാതെയുമുള്ള ധൂര്‍ത്തു പുത്രന്‍മാരുടെ ചെയ്തികള്‍ തുറന്നു കാട്ടാനും പ്രതിപക്ഷത്തിനും കഴിയണം.

kerala

ബജറ്റിന് പിന്നാലെ സ്വര്‍ണവിലയില്‍ വന്‍ കുതിച്ചുചാട്ടം; കൂടിയത് 400 രൂപ

ഇന്ന് മാത്രം രണ്ട് തവണയാണ് വില കൂടിയത്

Published

on

കൊച്ചി: ധനമന്ത്രിയുടെ കേന്ദ്രബജറ്റ് അവതരണത്തിന് പിന്നാലെ സംസ്ഥാനത്ത് സ്വര്‍ണവില വീണ്ടും ഉയര്‍ന്നു. 400 രൂപയാണ് ഇന്ന് പവന് കൂടിയത്. ഇന്ന് മാത്രം രണ്ട് തവണയാണ് വില കൂടിയത്. രാവിലെ 200 രൂപ കൂടി 42200 രൂപയും ഉച്ചക്ക് വീണ്ടും 200 രൂപ കൂടി 42,400 രൂപയുമായി.

ഗ്രാമിന് രാവിലെ 25 രൂപ വര്‍ധിച്ച് 5275 രൂപയും ഉച്ചക്ക് 25 രൂപകൂടി 5300 രൂപയുമായി. ബജറ്റില്‍ ഇറക്കുമതി ചെയ്യുന്ന സ്വര്‍ണാഭരണങ്ങള്‍ക്ക് മൂന്ന് ശതമാനം നികുതിയും വര്‍ധിപ്പിച്ചിട്ടുണ്ട്. നേരത്തെ 22% ഉണ്ടായിരുന്ന ഇറക്കുമതി നികുതി 25% ആയാണ് ഉയര്‍ത്തിയത്.

Continue Reading

Video Stories

വൈലിത്തറ ; അറിവിന്റെ നിലാവെളിച്ചം

ആലപ്പുഴയിലെ തീരദേശ ഗ്രാമമായ തൃക്കുന്നപ്പുഴയില്‍ 1930ലായിരുന്നു ജനനം. ഈഴവ സമൂഹം തിങ്ങി പാര്‍ത്ത പ്രദേശത്തെ മുസ്ലിം കുടുംബത്തില്‍ ജനിച്ച വൈലിത്തറയുടെ സഹപാഠികളെല്ലാം ഇതര മതവിശ്വാസികളായിരുന്നു. ഇത് പില്‍ക്കാലത്ത് ഇതര മതവിശ്വാസങ്ങളെ ആഴത്തില്‍ പഠിക്കാന്‍ അദ്ദേഹത്തെ സഹായിച്ചു. പിതാവ് വൈലിത്തറ മുഹമ്മദ് കുഞ്ഞ് മുസ്ലിയാര്‍ മകന്‍ അറിവിന്റെ വിഴിയില്‍ സഞ്ചരിക്കണമെന്ന് അഗ്രഹിച്ചു.

Published

on

നസീര്‍ മണ്ണഞ്ചേരി

ആലപ്പുഴ: പുലരുവോളം നീളുന്ന പ്രഭാഷണ പരമ്പരകള്‍, ഖുര്‍ആനിനൊപ്പം ഭഗവത്ഗീതയും ഉപനിഷത്തുകളും ബൈബിളും വേദികളില്‍ നിറഞ്ഞൊഴുകും. ഇലയനക്കത്തിന്റെ ശബ്ദത്തിന് പോലും ഇടം നല്‍കാതെ സദസ്യര്‍ അറിവിന്റെ നിലാമഴയില്‍ ലയിച്ചു കഴിഞ്ഞിരിക്കും ആരാത്രിയില്‍. ഇടയ്ക്ക് ബര്‍ണാട്ഷായുടെ കവിതകള്‍ കൃത്യമായ ഉച്ചാരണ ശുദ്ധിയോടെ ഉദ്ദരിച്ച് ശ്രോതാക്കളെ അത്ഭുതപ്പെടുത്തും. കേരളത്തിന്റെ പ്രഭാഷണ രംഗത്തെ കുലപതിയായി വൈലിത്തറ മുഹമ്മദ് കുഞ്ഞ് മൗലവി വാണിരുന്ന കാലത്തെ ഇങ്ങനെ ചുരുക്കി വിവരിക്കാം.
വൈലിത്തറ നിധി പോലെ സൂക്ഷിച്ചു വെച്ചിരുന്ന തന്റെ പ്രഭാഷണ പരമ്പരയെ കുറിച്ച് 1960-80 കാലഘട്ടത്തില്‍ ചന്ദ്രികയുടെ ഒന്നാം പേജില്‍ പ്രസിദ്ധീകരിച്ച പരസ്യത്തിലുണ്ട് അദ്ദേഹത്തെ ഒരു ജനത എത്രമാത്രമാണ് നെഞ്ചേറ്റിയെന്നതിന്റെ തെളിവ്. ആ പ്രഭാഷണ പരമ്പരകളിലൂടെ ഉയര്‍ന്ന് പൊങ്ങിയ പള്ളിമിനാരങ്ങള്‍ ഇന്നും കേരളത്തിന്റെ വിവിധ ഭാഗങ്ങളില്‍ കാണാന്‍ കഴിയും.
തിരുവിതാംകൂറിന്റെ മലയാളത്തനിമയില്‍ പ്രഗല്‍ഭര്‍ വാണിരുന്ന മലബാറിന്റെ പ്രഭാഷണ വേദികളെ വേറിട്ട ശൈലികൊണ്ട് കീഴടക്കിയ മഹാപ്രതിഭയായിരുന്നു വൈലിത്തറ മുഹമ്മദ് കുഞ്ഞ് മൗലവി. ഇസ്ലാമിക കര്‍മ്മ ശാസ്ത്രത്തിലും മദ്ഹബുകളും അഗാധ ജ്ഞാനമുണ്ടായിരുന്ന അദ്ദേഹം ലളിതമായ ഭാഷയില്‍ കേള്‍വിക്കാര്‍ക്ക് വലിയ അറിവുകള്‍ പകര്‍ന്നു നല്‍കി. കേരളത്തിന് പുറത്ത് ഗള്‍ഫ് രാജ്യങ്ങളിലും തിരക്കുള്ള പ്രഭാഷകനായി അദ്ദേഹം വേഗത്തില്‍ വളര്‍ന്നു. നാട്ടിലേക്ക് ലീവിനെത്തുന്ന പ്രവാസികള്‍ ബന്ധുക്കള്‍ക്ക് സമ്മാനിക്കാനായി കൊണ്ടുവന്നിരുന്നത് വൈലിത്തറയുടെ പ്രഭാഷണ കാസറ്റുകളായിരുന്നു എന്നതിലുണ്ട് നാട്ടിലും ഗല്‍ഫിലും അദ്ദേഹത്തിനുണ്ടായിരുന്ന സ്വീകാര്യത. അറിവായിരുന്നു മുഖമുദ്ര. മരണപ്പെടുന്നതിന് മുമ്പ് വരെ അദ്ദേഹം വായനയ്ക്കായി ജീവിതം മാറ്റിവെച്ചു. വലുപ്പച്ചെറുപ്പമില്ലാതെ ആരില്‍ നിന്നും പുതിയ അറിവുകള്‍ തേടുന്നതിനായി അദ്ദേഹം എന്നും പരിശ്രമിച്ചുകൊണ്ടിരുന്നു. ഓരോ പ്രഭാഷണ പരമ്പരകള്‍ക്ക് പുറപ്പെടുന്നതിന് മുമ്പും ദിവസങ്ങള്‍ നീണ്ട പഠനം നടത്തും. വിഷയത്തില്‍ നിന്നും വഴുതി മാറാതെ ശ്രോതാക്കളെ പിടിച്ചിരുത്തുകയെന്നത് ഏറെ അധ്വാനമുള്ള പ്രവര്‍ത്തിയാണെന്ന് അദ്ദേഹം തന്നെ പറഞ്ഞിട്ടുണ്ട്.
ആലപ്പുഴയിലെ തീരദേശ ഗ്രാമമായ തൃക്കുന്നപ്പുഴയില്‍ 1930ലായിരുന്നു ജനനം. ഈഴവ സമൂഹം തിങ്ങി പാര്‍ത്ത പ്രദേശത്തെ മുസ്ലിം കുടുംബത്തില്‍ ജനിച്ച വൈലിത്തറയുടെ സഹപാഠികളെല്ലാം ഇതര മതവിശ്വാസികളായിരുന്നു. ഇത് പില്‍ക്കാലത്ത് ഇതര മതവിശ്വാസങ്ങളെ ആഴത്തില്‍ പഠിക്കാന്‍ അദ്ദേഹത്തെ സഹായിച്ചു. പിതാവ് വൈലിത്തറ മുഹമ്മദ് കുഞ്ഞ് മുസ്ലിയാര്‍ മകന്‍ അറിവിന്റെ വിഴിയില്‍ സഞ്ചരിക്കണമെന്ന് അഗ്രഹിച്ചു. കളത്തിപ്പറമ്പില്‍ മൊയ്തീന്‍കുഞ്ഞ് മുസ്ലിയാര്‍, വേണാട് ഹൈദ്രോസ് മുസ്ലിയാര്‍, ആലി മുസ്ലിയാര്‍, വടുതല കുഞ്ഞുബാവ മുസ്ലിയാര്‍ എന്നിവരായിരുന്നു ആദ്യകാല ഗുരുക്കന്മാര്‍. കുട്ടനാട് തകഴി കുന്നുമ്മ പള്ളിയിലായിരുന്നു ദറസ് പഠനം ആരംഭിച്ചത്. പാപ്പിനപ്പള്ളി മുഹമ്മദ് മുസ്ലിയാരായിരുന്നു അന്ന് മുദരിസ്. തുടര്‍ന്ന് സൂഫിവര്യനുമായ വാഴക്കാടന്‍ മുഹമ്മദ് മുസ്ലിയാരുടെ ദറസിലും ചേര്‍ന്ന് ദറസ് പഠനം നടത്തി. ദറസ് പഠനകാലത്ത് തന്നെ പ്രഭാഷണ രംഗത്ത് കഴിവ് തെളിച്ച അദ്ദേഹത്തിന് 18-ാം വയസില്‍ ജന്മാനാടായ തൃക്കുന്നപ്പുഴയിലെ ജ്ഞാനോദയം വായനശാലയുടെ വാര്‍ഷികത്തോടനുബന്ധിച്ചുള്ള സാംസ്‌കാരിക സമ്മേളനം ആദ്യ പൊതുപ്രഭാഷണ വേദിയായി. ആത്മവിദ്യാസംഘത്തിന്റെ ആത്മീയ ആചാര്യന്‍ ആര്യഭട്ട സ്വാമിയുടെ അഭിനന്ദനം വേദിയില്‍ വെച്ച് ഏറ്റുവാങ്ങിയത് അഭിമാനത്തോടെ പലപ്പോഴും അദ്ദേഹം പറഞ്ഞിട്ടുണ്ട്. അതൊരു തുടക്കമായിരുന്നു, കേരളത്തിലൂടനീളമുള്ള പ്രഭാഷണ വേദികള്‍ കീഴടക്കിയ വൈലിത്തറ മുഹമ്മദ് കുഞ്ഞ് മൗലവിയെന്ന യുവ പ്രഭാഷകന്റെ പിറവി. തുടര്‍ന്ന് സമീപ പ്രദേശമായ താമല്ലാക്കല്‍ പ്രഭാഷണ പരമ്പര തന്നെ നടത്തി. ഹരിപ്പാടിനും ആലപ്പുഴയുടെയും പുറത്തേക്ക് യുവ പ്രഭാഷകന്റെ ഖ്യാതി പടര്‍ന്നത് വളരെ വേഗത്തിലായിരുന്നു. പിന്നീട് മലബാര്‍ അദ്ദേഹത്തെ ഏറ്റെടുക്കുന്നതാണ് കണ്ടത്. ഏഴ് ദിവസത്തെ പ്രഭാഷണ പരമ്പര എന്ന് പറഞ്ഞ് വീട്ടില്‍ നിന്നും പുറപ്പെടുന്ന വൈലത്തറ ആഴ്ചകള്‍ക്ക് ശേഷവും വീട്ടില്‍ തിരികെ എത്താന്‍ കഴിയാത്ത അവസ്ഥയില്‍ വരെ എത്തി. പരമ്പരയ്ക്ക് അനുവദിച്ച ദിവസം കഴിഞ്ഞിട്ടും പലനാടും അദ്ദേഹത്തെ മടങ്ങാന്‍ അനുവദിക്കാത്ത സഹചര്യം വരെ സംജാതമായി. മലബാറിന്റെ ഹൃദയം കീഴടക്കിയ മുന്നേറിയ അദ്ദേഹം അവിടത്തെ ആത്മീയ രാഷട്രീയ രംഗത്തെ പ്രമുഖരുമായി വേഗത്തില്‍ അടുക്കുകയും ചെയ്തു. പാണക്കാട് പി.എം.എസ്.എ പൂക്കോയ തങ്ങള്‍, സയ്യിദ് അബ്ദുല്‍ റഹ്മാന്‍ ബാഫഖി തങ്ങള്‍, സി.എച്ച് മുഹമ്മദ് കോയ, പാണക്കാട് സയ്യിദ് മുഹമ്മദലി ശിഹാബ് തങ്ങള്‍, പാണക്കാട് സയ്യിദ് ഹൈദരലി ശിഹാബ് തങ്ങള്‍, ഇ. അഹമ്മദ്, ശംസുല്‍ ഉലമ ഇ. കെ അബൂബക്കര്‍ മുസ്ലിയാര്‍, കണ്ണിയത്ത് അഹമ്മദ് മുസ്ലിയാര്‍ തുടങ്ങി കാലയവനികയിലേക്ക് മറഞ്ഞ മഹാരതന്മാരുമായി അടുത്ത ബന്ധമാണ് അദ്ദേഹം പുലര്‍ത്തിയുരുന്നത്. തന്റെ വിശ്വാസ പ്രമാണങ്ങളെ ഉറക്കെ പറയുമ്പോഴും ഇതര മതവിശ്വാസികളെയും അദ്ദേഹം ചേര്‍ത്ത് നിര്‍ത്തി. അതിനാല്‍ തന്നെ പ്രഭാഷണ വേദികളില്‍ അദ്ദേഹത്തെ കേള്‍ക്കാന്‍ ഇതര മതസ്ഥര്‍ ഒഴുകിയെത്തുമായിരുന്നു. തൃക്കുന്നപ്പുഴയിലെ എസ്.എന്‍.ഡി.പി വേദികളിലെ സ്ഥിരം സാന്നിധ്യമായിരുന്ന അദ്ദേഹം പെരുന്നാള്‍ ദിവസം ഇതര മതസ്ഥര്‍ക്കായി വീട്ടില്‍ തന്നെ പ്രത്യേക വിരുന്നും ഒരുക്കിയിരുന്നു.

 

Continue Reading

Video Stories

വയനാട് സ്കൂളിൽ 86 കുട്ടികൾക്ക് ഛർദിയും വയറുവേദനയും: ഭക്ഷ്യവിഷബാധയെന്ന് സംശയം

ഇതില്‍ 12 പേരെ പ്രാഥമിക ചികിത്സ നല്‍കിയ ശേഷം വിട്ടയച്ചു. കുട്ടികളുടെ ആരോഗ്യനില തൃപ്തികരമാണെന്നാണ് റിപ്പോര്‍ട്ടുകള്‍.

Published

on

വയനാട്ടിലെ സ്‌കൂളില്‍ ഭക്ഷ്യവിഷബാധയെന്ന് സംശയം. ലക്കിടി ജവഹര്‍ നവോദയ സ്‌കൂളിലെ 86 കുട്ടികള്‍ക്ക് ശാരീരിക അസ്വസ്ഥ്യം അനുഭവപ്പെട്ടു.
കുട്ടികളെ എല്ലാവരെയും വൈത്തിരി താലൂക്ക് ആശുപത്രിയില്‍ പ്രവേശിപ്പിച്ചു. ഇതില്‍ 12 പേരെ പ്രാഥമിക ചികിത്സ നല്‍കിയ ശേഷം വിട്ടയച്ചു. കുട്ടികളുടെ ആരോഗ്യനില തൃപ്തികരമാണെന്നാണ് റിപ്പോര്‍ട്ടുകള്‍.

സ്‌കൂളില്‍ താമസിച്ച്‌ പഠിക്കുന്ന കുട്ടികള്‍ക്കാണ് ഇന്നലെ രാത്രി മുതല്‍ ദേഹാസ്വാസ്ഥ്യം അനുഭവപ്പെട്ടത്. ഛര്‍ദിയും വയറുവേദനയും അനുഭവപ്പെട്ട 86 കുട്ടികളെ ഉടന്‍ തന്നെ വൈത്തിരി താലൂക്ക് ആശുപത്രിയില്‍ പ്രവേശിപ്പിക്കുകയായിരുന്നു. കുട്ടികള്‍ക്ക് എങ്ങനെയാണ് ദേഹാസ്വാസ്ഥ്യം ഉണ്ടായത് എന്നത് വ്യക്തമല്ല. ആരോഗ്യവിഭാഗം പരിശോധന ആരംഭിച്ചിട്ടുണ്ട്.

Continue Reading

Trending