Connect with us

Views

കൊച്ചി മെട്രോ; ഒരു സ്വപ്‌നം യാഥാര്‍ഥ്യമാവുമ്പോള്‍

Published

on

 

ഒന്നര വര്‍ഷം മുമ്പ് കൊച്ചി നഗരത്തിലെ വലിയ പരസ്യ ബോര്‍ഡുകളില്‍ വ്യത്യസ്തമായൊരു പരസ്യം പതിഞ്ഞിരുന്നു. ആദ്യം കയ്ക്കും പിന്നെ മധുരിക്കും എന്ന പഴമ പറച്ചിലിനെ വരച്ചു കാണിച്ചുള്ള കൊച്ചി മെട്രോ റെയില്‍ ലിമിറ്റഡിന്റെ പരസ്യം. ഏതു ബ്ലോക്കില്‍ കിടന്നവനും ആ പരസ്യം കണ്ടപ്പോള്‍ ഒന്ന് ചിരിതൂകി. മെട്രോ കാരണം നഗരത്തില്‍ ഗതാഗത കുരുക്ക് കൂടിയെന്ന് സ്ഥിരം പരാതി പറയുന്നവര്‍ക്കിടയില്‍ തന്നെ ആ പരസ്യം ഹിറ്റായി മാറി. നഗരഗതാഗതത്തിലെ എല്ലാ കുരുക്കുകളിലും യാത്ര ദുരിതങ്ങളിലും നമ്മള്‍ കണ്ടൊരു സ്വപ്‌നം കൊച്ചിയില്‍ യാഥാര്‍ഥ്യമാവുകയാണ്. 2003 മുതല്‍ കേരള ജനത സ്വപ്‌നം കണ്ട കൊച്ചി മെട്രോ റെയില്‍ ആകാശ പാതയിലൂടെ കുതിച്ചു പായാന്‍ തയ്യാറെടുത്തിരിക്കുന്നു. ദിവസങ്ങള്‍ക്കകം ആലുവ മുതല്‍ പാലാരിവട്ടം വരെയുള്ള സ്റ്റേഷനുകളില്‍ യാത്രക്കാരുമായി മെട്രോ കുതിച്ചുപായും. ട്രയല്‍ സര്‍വീസ് അടക്കമുള്ള അവസാന വട്ട ഒരുക്കങ്ങള്‍ പുരോഗമിക്കുന്നു. മെട്രോ സംവിധാനത്തിലെ നിസാരമെന്ന് തോന്നുന്ന ഏറ്റവും ചെറിയ കാര്യങ്ങള്‍ പോലും പലതവണ പരിശോധിച്ച് പരീക്ഷിച്ച് കുറ്റമറ്റതാണെന്ന് ഉറപ്പിച്ചു കഴിഞ്ഞു. ഉദ്ഘാടന തീയതിക്കും ഉദ്ഘാടകനും വേണ്ടി മാത്രമാണ് ഇനി കാത്തിരിപ്പ്.
ഒരു ചെറിയ പാലം പൂര്‍ത്തിയാക്കാന്‍ പോലും വര്‍ഷങ്ങളെണ്ണി കാത്തിരിക്കേണ്ടിവരുന്ന നാടിന് നാലു വര്‍ഷം കൊണ്ട് ആദ്യഘട്ടം പൂര്‍ത്തിയാക്കിയ കൊച്ചി മെട്രോ ഒരു അത്ഭുതം തന്നെയാണ്. 5182 കോടി രൂപ ചെലവില്‍ സംസ്ഥാനത്തെ തന്നെ ഏറ്റവും ബൃഹത്തായ അടിസ്ഥാന സൗകര്യ വികസന പദ്ധതികളിലൊന്ന് സാക്ഷാത്കരിക്കപ്പെടുമ്പോള്‍ ഒരു ഭരണകൂടത്തിന്റെ ഇച്ഛാശക്തിയാണ് അംഗീകരിക്കപ്പെടുന്നതും അഭിനന്ദിക്കപ്പെടുന്നതും. പലവട്ടം ചുവപ്പുനാടയില്‍ കുരുങ്ങിയ പദ്ധതിയുടെ മുന്നോട്ടുള്ള പ്രയാണത്തിന് കഴിഞ്ഞ കാലത്തെ യു.ഡി.എഫ് സര്‍ക്കാര്‍ നല്‍കിയ പിന്തുണ ചെറുതൊന്നുമല്ല. 2001 ജൂണ്‍ 21ന് കൊച്ചിക്ക് അനുയോജ്യമായ ഗതാഗത സംവിധാനം മെട്രോ റെയിലാണെന്ന് ഇ.ശ്രീധരന്‍ പറഞ്ഞതാണ് പദ്ധതിക്ക് ആധാരമായത്. 2004 ഡിസംബര്‍ 22ന് കൊച്ചിയില്‍ മെട്രോ നടപ്പാക്കാന്‍ ഉമ്മന്‍ചാണ്ടിയുടെ നേതൃത്വത്തിലുള്ള മന്ത്രിസഭ തീരുമാനിച്ചു. 2005 ഒക്‌ടോബറില്‍ പദ്ധതി കണ്‍സള്‍ട്ടന്റായി ഡല്‍ഹി മെട്രോ റെയില്‍ കോര്‍പറേഷനെ സര്‍ക്കാര്‍ നിയമിച്ചു. 2006 ജനുവരിയില്‍ നിര്‍മാണത്തിന്അന്തര്‍ദേശീയ ടെന്‍ഡറും ക്ഷണിച്ചു. തുടര്‍ന്ന് വി.എസിന്റെ നേതൃത്വത്തില്‍ അധികാരത്തിലേറിയ എല്‍.ഡി.എഫ് സര്‍ക്കാര്‍ പദ്ധതിയെ മരവിപ്പിക്കുന്ന നിലാപാടായിരുന്നു സ്വീകരിച്ചത്. ഇക്കാലയളവില്‍ ഒരു മുന്നേറ്റവും പദ്ധതിക്കുണ്ടായില്ലെന്ന് മാത്രമല്ല, പദ്ധതി ഉപേക്ഷിക്കപ്പെടുകയാണെന്ന ആശങ്കയും കേരള ജനതയിലുണ്ടാക്കി. 2011 മെയ് മാസത്തില്‍ ഉമ്മന്‍ചാണ്ടിയുടെ നേതൃത്വത്തിലുള്ള യു.ഡി.എഫ് സര്‍ക്കാര്‍ വീണ്ടും അധികാരത്തിലെത്തിയതോടെയാണ് സ്വപ്‌ന പദ്ധതിക്ക് വീണ്ടും ജീവന്‍ വച്ചത്. 2011ല്‍ മെട്രോ നിര്‍മാണത്തിന് മേല്‍നോട്ടം വഹിക്കാന്‍ കെ.എം.ആര്‍.എല്‍ രൂപീകരിക്കുകയും തൊട്ടടുത്ത വര്‍ഷം ജൂലൈയില്‍ മെട്രോ പദ്ധതിക്ക് കേന്ദ്രാനുമതി ലഭിക്കുകയും ചെയ്തു. 2012 സെപ്തംബര്‍ 13ന് അന്നത്തെ പ്രധാനമന്ത്രിയായിരുന്ന ഡോ.മന്‍മോഹന്‍ സിംഗ് മെട്രോക്ക് തറക്കല്ലിട്ടു. പിന്നീടങ്ങോട്ട് വികസന വഴിയില്‍ പുതിയ അധ്യായം രചിച്ചുള്ള പ്രയാണമായിരുന്നു കൊച്ചി മെട്രോയുടേത്.
2013 ജൂണ്‍ ഏഴിനായിരുന്നു ആലുവ മുതല്‍ പേട്ട വരെ 25.612 കി.മീറ്ററില്‍ മെട്രോയുടെ നിര്‍മാണ പ്രവര്‍ത്തനങ്ങളുടെ തുടക്കം. വിവാദങ്ങളും ആശങ്കകളും കാറ്റില്‍ പറത്തി കേരളം ഒരേ മനസോടെ അണിചേര്‍ന്ന ചടങ്ങില്‍ അന്നത്തെ മുഖ്യമന്ത്രിയായിരുന്ന ഉമ്മന്‍ചാണ്ടി പൈല്‍ ഉറപ്പിച്ച് പറഞ്ഞതിങ്ങനെ; ‘കൊച്ചി മെട്രോയിലേക്ക് ഇനി 1095 ദിനങ്ങള്‍. ഇ.ശ്രീധരന്‍ എന്ന മെട്രോമാന്റെ പിന്‍ബലമുള്ള വാക്കുകള്‍ കേരളം നെഞ്ചേറ്റി. പ്രഖ്യാപനത്തില്‍ നിന്ന് വ്യത്യസ്തമായി മെട്രോയുടെ അഴകളവുകള്‍ ചുരുങ്ങിയെങ്കിലും ആദ്യഘട്ടം പൂര്‍ത്തിയാക്കാനായതിന്റെ മുഴുവന്‍ ക്രെഡിറ്റും യു.ഡി.എഫ് സര്‍ക്കാരിന് തന്നെയാണെന്നതില്‍ തര്‍ക്കമില്ല. 2016 ജനുവരി 23ന് മുട്ടം യാര്‍ഡില്‍ പ്രത്യേകം ഒരുക്കിയ ട്രാക്കില്‍ മെട്രോയുടെ ടെസ്റ്റ് റണ്ണിന് പച്ചക്കൊടി കാട്ടിയതും ഉമ്മന്‍ചാണ്ടിയായിരുന്നു. സമയത്തിന് സ്ഥലം ഏറ്റെടുത്ത് നല്‍കുന്നത് ഉള്‍പ്പെടെയുള്ള ഒട്ടേറെ തടസങ്ങളാണ് നിര്‍മാണത്തിന്റെ തുടക്കം മുതല്‍ നിര്‍മാണ പ്രവര്‍ത്തനങ്ങള്‍ക്ക് ചുക്കാന്‍ പിടിച്ച ഡി.എം.ആര്‍.സി നേരിട്ടത്. ജല അതോറിറ്റിയുടെ പൈപ്പുകള്‍ മാറ്റുന്നതിലുള്‍പ്പെടെ വന്ന കാലതാമസം നിര്‍മാണത്തെ സാരമായി ബാധിച്ചു. 25.612 കി.മീറ്ററിലായിരുന്നു പദ്ധതി വിഭാവനം ചെയ്തത്. എന്നാല്‍ ആലുവ മുതല്‍ മഹാരാജാസ് വരെയുള്ള 18 കി.മീറ്ററില്‍ മാത്രമാണ് നിര്‍മാണം തുടങ്ങാനായാത്. ഈ പ്രതിസന്ധി സമയത്തെല്ലാം യു.ഡി.എഫ് സര്‍ക്കാരിന്റെ കൃത്യമായ ഇടപെടല്‍ ഡി.എം.ആര്‍.സിക്ക് തുണയായി. അല്ലെങ്കില്‍ പദ്ധതി ഇനിയും വൈകുമായിരുന്നു.
സവിശേഷതകള്‍ ഏറെയുണ്ട് കൊച്ചി മെട്രോക്ക്. കമ്മ്യൂണിക്കേഷന്‍ ബേസ്ഡ് ട്രെയിന്‍ കണ്‍ട്രോള്‍ സംവിധാനം (സി.ബി.ടി.സി) ഉപയോഗിച്ചാണ് കൊച്ചി മെട്രോ പ്രവര്‍ത്തിക്കുന്നത്. രാജ്യത്ത് ഈ സംവിധാനം ഉപയോഗിക്കുന്ന ആദ്യ മെട്രോയെന്ന ഖ്യാതി കൊച്ചിക്ക് സ്വന്തമാണ്. മാത്രമല്ല, ഏറ്റവും കുറഞ്ഞ സമയത്ത് കൂടുതല്‍ ദൂരം ഉദ്ഘാടന സര്‍വീസ് നടത്തുന്ന മെട്രോയെന്ന സവിശേഷതയും കൊച്ചിയുടെ പേരിലാവും. ആലുവ മുതല്‍ പാലാരിവട്ടം വരെയുള്ള 13 കിലോമീറ്റര്‍ ദൂരത്തില്‍ 11 സ്റ്റേഷനുകള്‍ക്കിടയിലാണ് മെട്രോയുടെ ആദ്യഘട്ട സര്‍വീസ്. കേരളത്തിന്റെ സംസ്‌കാരവും ചരിത്രവും പാരമ്പര്യവും അടിസ്ഥാനമാക്കിയാണ് കൊച്ചി മെട്രോ സ്‌റ്റേഷനുകളുടെ ഒരുക്കം. ഹരിത ഭരിതവും പരിസ്ഥിതി സൗഹൃദവുമാണ് എല്ലാ സ്റ്റേഷനുകളും. പശ്ചിമഘട്ടമാണ് പ്രധാന തീം. ഇന്ത്യയിലെ ഒരു മെട്രോയും അവലംബിക്കാത്ത ഈ രൂപരേഖ തന്നെയായിരിക്കും കൊച്ചി മെട്രോ സ്‌റ്റേഷനുകളെ വേറിട്ടതാക്കുക. പത്തു രൂപയാണ് മിനിമം യാത്രകൂലി. രണ്ടു കിലോമീറ്റര്‍ വരെ 10 രൂപ ടിക്കറ്റില്‍ യാത്ര ചെയ്യാം. കെഎംആര്‍എല്‍ ആവിഷ്‌കരിക്കുന്ന കൊച്ചി വണ്‍ മൊബൈല്‍ ആപ്ലിക്കേഷന്‍ ഉപയോഗിച്ചു യാത്ര ചെയ്യുന്നവര്‍ക്ക് നിരക്കുകളില്‍ ഇളവ് നല്‍കും. യാത്രക്കാര്‍ക്കായി ഒട്ടേറെ സൗകര്യങ്ങള്‍ ഉള്‍പ്പെടുത്തിയാണ് മെട്രോ ട്രെയിനുകള്‍ ഒരുക്കിയിട്ടുള്ളത്. ശാരീരികമായ പരിമിതികള്‍ ഉള്ളവരെ കൂടി പരിഗണിച്ചാണ് കോച്ചുകളുടെ രൂപകല്‍പ്പന. എല്ലാ ട്രെയിനിലും വീല്‍ചെയര്‍ കയറ്റിയിറക്കാനുള്ള സൗകര്യം ഏര്‍പ്പെടുത്തിയിട്ടുണ്ട്. ഇതര പൊതു ഗതാഗത സംവിധാനങ്ങളില്‍ നിന്ന് കൊച്ചി മെട്രോയെ വ്യത്യസ്തമാക്കുന്നതില്‍ സാങ്കേതികവിദ്യക്കും ഗണ്യമായ സ്ഥാനമുണ്ടാവും. ബ്രേക്കിട്ടാല്‍ വൈദ്യുതി ഉല്‍പ്പാദിപ്പിക്കുന്ന സാങ്കേതികവിദ്യ ഇതിനുദാഹരണമാണ്.
കൊച്ചിയിലെ അതിരൂക്ഷമായ ഗതാഗത കുരുക്കിനുള്ള പരിഹാരമാണ് മെട്രോ വിഭാവനം ചെയ്യുന്ന പ്രഥമ ലക്ഷ്യങ്ങളിലൊന്ന്. വിദേശ നഗരങ്ങളോട് കിടപിടിക്കുന്ന അനുബന്ധ ഗതാഗത സംവിധാനം, ജലമെട്രോ, മെട്രോ സിറ്റി, സൈക്കിള്‍ ട്രാക്ക്, അത്യാധുനിക നടപ്പാതകള്‍ തുടങ്ങിയവയെല്ലാം മെട്രോക്കൊപ്പം കൊച്ചിയിലെത്താന്‍ കാത്തിരിക്കുന്നുണ്ട്. പാലാരിവട്ടം മുതല്‍ മഹാരാജാസ് ഗ്രൗണ്ട് വരെയാണ് മെട്രോയുടെ രണ്ടാംഘട്ടം. ഇതിന് അധികം കാത്തിരിക്കേണ്ടിവരില്ലെന്ന് അതിവേഗം പുരോഗമിക്കുന്ന നിര്‍മാണ പ്രവര്‍ത്തനങ്ങള്‍ സാക്ഷ്യപ്പെടുത്തുന്നു. പേട്ടയും തൃപ്പൂണിത്തുറയും കാക്കനാടും അങ്കമാലിയും വിദൂര ലക്ഷ്യമാവില്ലെന്ന് തന്നെ പ്രത്യാശിക്കാം.

Continue Reading
Advertisement
Click to comment

Leave a Reply

Your email address will not be published. Required fields are marked *

columns

നൈതികതയുടെ കാവല്‍ക്കാരന്‍

ക്രമത്തിലധിഷ്ഠിതമായ ദൈവിക വഴിയും ക്രമരാഹിത്യത്തില്‍ അധിഷ്ഠിതമായ പൈശാചിക വഴിയും. ഇവയില്‍ ദൈവിക വഴിയെ തിരഞ്ഞെടുക്കാന്‍ വേണ്ട പ്രചോദനവും ദൃഷ്ടാന്തങ്ങളും നല്‍കി മനുഷ്യനെ സഹായിക്കാന്‍ നിയുക്തരായ സ്രഷ്ടാവിന്റെ ദൂതന്‍മാരാണ് പ്രവാചക ന്മാര്‍. ക്രമവും നീതിയും തകരുന്നിടത്ത് അത് സംരക്ഷിക്കാനും മനുഷ്യനെ ശരിയായ താളക്രമങ്ങളില്‍ എത്തിക്കാനും അതില്‍ നിലനിറുത്താനും വേണ്ട കാര്യങ്ങളാണ് അവര്‍ ചെയ്യുന്നതെല്ലാം.

Published

on

ടി.എച്ച് ദാരിമി

പ്രപഞ്ചത്തിനും പ്രപഞ്ചത്തിലെ എല്ലാ ഘടകങ്ങള്‍ക്കും അവയുടെ ചലനനിശ്ചലനങ്ങള്‍ രൂപഭാവങ്ങള്‍ എന്നിവക്കുമെല്ലാം സ്രഷ്ടാവ് ഒരു ഘടന നിശ്ചയിച്ചിട്ടും കല്‍പ്പിച്ചിട്ടുമുണ്ട്. അതിന് വിധേയമാവുകയും പാലിക്കപ്പെടുകയും ചെയ്യുമ്പോഴാണ് ഏതു കാര്യവും ശരിയും കൃത്യവും താളനിബദ്ധവുമെല്ലാമായിത്തീരുന്നത്. അതിനെ പൊതു ഭാഷാവ്യവഹാരം ക്രമം എന്ന് വിളിക്കുന്നു. ക്രമം സ്രഷ്ടാവിന്റെ മഹത്തായ നീതിയാണ്. പക്ഷേ, ക്രമം പാലിക്കാനെന്നപോലെ നിരാകരിക്കാനും മനുഷ്യന് പരിമിതമായ സ്വാതന്ത്ര്യം നല്‍കപ്പെട്ടിട്ടുണ്ട്. അതോടെ മനുഷ്യന്റെ മുമ്പില്‍ രണ്ടു വഴികള്‍ തുറക്കപ്പെടുകയാണ്. ക്രമത്തിലധിഷ്ഠിതമായ ദൈവിക വഴിയും ക്രമരാഹിത്യത്തില്‍ അധിഷ്ഠിതമായ പൈശാചിക വഴിയും. ഇവയില്‍ ദൈവിക വഴിയെ തിരഞ്ഞെടുക്കാന്‍ വേണ്ട പ്രചോദനവും ദൃഷ്ടാന്തങ്ങളും നല്‍കി മനുഷ്യനെ സഹായിക്കാന്‍ നിയുക്തരായ സ്രഷ്ടാവിന്റെ ദൂതന്‍മാരാണ് പ്രവാചക ന്മാര്‍. ക്രമവും നീതിയും തകരുന്നിടത്ത് അത് സംരക്ഷിക്കാനും മനുഷ്യനെ ശരിയായ താളക്രമങ്ങളില്‍ എത്തിക്കാനും അതില്‍ നിലനിറുത്താനും വേണ്ട കാര്യങ്ങളാണ് അവര്‍ ചെയ്യുന്നതെല്ലാം. അതിനാല്‍ ഏതൊരു പ്രവാചകന്റെയും ദൗത്യം മൊത്തത്തില്‍ നീതി നടപ്പാക്കുക എന്നതാണ്. പൊതുവെ നീതി എന്ന വാക്കും പ്രയോഗവും രണ്ട് പേര്‍ക്കിടയിലുള്ള തര്‍ക്ക വ്യവഹാരത്തിന്റെ പരിധിയില്‍ മാത്രം ഉപയോഗിക്കുന്നതും ഉപയോഗിക്കേണ്ടതുമാണ് എന്നാണ് പ്രഥമദൃഷ്ട്യാ തോന്നുക. പക്ഷേ, അതങ്ങനെയല്ല പ്രബോധനത്തിന്റെ പരിധിയില്‍വരുന്ന എല്ലാ കാര്യങ്ങളും ഈ പരിധിയില്‍ വരുന്ന കാര്യങ്ങള്‍ തന്നെയാണ്. ഉദാഹരണമായി സത്യവിശ്വാസത്തെയെടുക്കാം. ഒരു മനുഷ്യന് ലഭിച്ച ജീവിതം, അല്‍ഭുതകരമായ ശരീരം, ശാരീര പ്രവര്‍ത്തനങ്ങള്‍, കഴിവുകള്‍, ശേഷികള്‍, ജീവിതസന്ധാരണ മാര്‍ഗങ്ങള്‍ തുടങ്ങിയ മറ്റൊരാള്‍ക്കും ചെയ്തുതരാന്‍ കഴിയാത്ത കാര്യങ്ങള്‍ എന്നിവയുടെയെല്ലാം ശരിയായ മൂല്യങ്ങള്‍ തിരിച്ചറിയുന്ന ഏതൊരു മനുഷ്യനും ചെയ്യേണ്ട നീതിയും ക്രമവുമാണ് ഇതെല്ലാം തന്നവനെ ദൈവമായി വിശ്വസിച്ച് അംഗീകരിക്കുക എന്നത്. അപ്പോള്‍ സത്യവിശ്വാസം നീതിയും ക്രമവുമായിത്തീരുന്നു. അവിശ്വാസമാവട്ടെ, മനുഷ്യന്‍ തന്റെ സ്രഷ്ടാവിനോട് കാണിക്കുന്ന അനീതിയും ആക്രമവുമാകുന്നു. നോമ്പും സകാത്തും തുടങ്ങി എല്ലാ കാര്യങ്ങളും ഇവ്വിധംതന്നെയാണ്. ജനങ്ങളുടെ സമാധാന ജീവിതം ഉറപ്പുവരുത്താനും സാമൂഹ്യ മര്യാദകള്‍ അവഗണിക്കപ്പെടാതിരിക്കാനും എല്ലാം നടപ്പിലാവേണ്ടത് നീതിയും പുലര്‍ത്തേണ്ടത് ക്രമവുമാണ്. ഇതിന്റെ പരിസരമാണെങ്കിലോ വിശാലമാണ്. അടുക്കളയിലും കിടപ്പറയിലും വീട്ടിനുള്ളിലും അയല്‍പക്കങ്ങളിലും സമുദായത്തിനും സമൂഹത്തിനും ഉള്ളിലും രാഷ്ട്രത്തിലും രാഷ്ട്രീയത്തിലുമെല്ലാം നീതിയും ക്രമവും നിലനില്‍ക്കണം. അതിനാല്‍ പ്രവാചകന്‍മാര്‍ ആ തലങ്ങളിലെല്ലാം ഇടപെടുന്നു. ഇത് ഈ അര്‍ഥത്തില്‍ മനസിലാക്കിയിട്ടില്ലാത്തവരാണ് നബിമാര്‍ പുറത്തിറങ്ങി ഓരോ കാര്യങ്ങളില്‍ ഇടപെടുമ്പോഴും അല്‍ഭുതം കൂറിയിരുന്നത്. വിശുദ്ധ ഖുര്‍ആനില്‍ അല്‍ഫുര്‍ഖാന്‍ അധ്യായത്തില്‍ മുഹമ്മദ് നബി (സ)ക്കെതിരെ മക്കയിലെ അവിശ്വാസികള്‍ നടത്തിയ ചില ആരോപണങ്ങള്‍ പറയുന്നുണ്ട്. അവയില്‍ ഒന്നാമത്തേത്, ഇതെന്തു പ്രവാചകനാണ്? ഇയാള്‍ ആഹാരം കഴിക്കുകയും അങ്ങാടികളില്‍ക്കൂടി നടക്കുകയും ചെയ്യുന്നു. എന്നതായിരുന്നു. മനുഷ്യന്റെ ജീവിതത്തില്‍ മുഴുവനും ക്രമം സംരക്ഷിക്കാന്‍ വന്ന നബി (സ)യുടെ ലോകം സത്യത്തില്‍ മനുഷ്യന്റെ ജീവിത പ്രതലം മുഴുവനും ആണ്, ആവേണ്ടതാണ്.

ഇക്കാര്യത്തില്‍ ഏറ്റവും വ്യക്തത കൈവരിച്ച ജീവിതമായിരുന്നു നബി(സ)യുടേത്. നീതിയുടെയും ക്രമപാലനത്തിന്റെയും ഓരോ രംഗത്തെയും മാതൃകകള്‍ പെറുക്കിയെടുക്കാന്‍ മാത്രം വ്യക്തമായിരുന്നു ആ ജീവിതം. ഉദാഹരണങ്ങള്‍ തേടിയുള്ള സഞ്ചാരം അവരുടെ വീടകത്തില്‍ നിന്നുതന്നെ തുടങ്ങാം. വീട് ഒരു കുടുംബത്തിന്റെ മൊത്തത്തിലുള്ള സമാധാനത്തിന്റെ സ്ഥാനമാണ്. അവിടെ വസിക്കുന്ന ഓരോരുത്തര്‍ക്കും സമാധാനം ഉണ്ടാവണം. അതിന് ഏറ്റവും ആദ്യമായി വേണ്ടത് ഒരോരുത്തരിലും മ്യൂല്യമുള്ള സ്വഭാവമാണ്. ആ സ്വഭാവത്തിന്റെ ബലത്തില്‍ അംഗങ്ങളുടെ മനസ്സുകള്‍ പരസ്പരം കൂട്ടിക്കെട്ടണം. ഒരംഗത്തിനും വെറുക്കാനോ അനിഷ്ടം പ്രകടിപ്പിക്കാനോ ഉള്ള വഴി വെച്ചുകൊടുക്കരുത്. ഇതിന് ഓരോ ചലനത്തിലും തികഞ്ഞ ശ്രദ്ധ വേണം. നബി (സ) അത് തീര്‍ത്തും പുലര്‍ത്തിയിരുന്നു. ഓരോ അംഗത്തിന്റെയും മനസ്സും കരളും കുളിരണിയുന്ന അത്ര സരളവും വിനയാന്വിതനുമായിരുന്നു വീട്ടിലെ അവരുടെ സ്വഭാവം. അനസ്(റ) പറയുന്നു: ഞാന്‍ ആഇശാ ബീവിയോട് ഒരിക്കല്‍ ചോദിച്ചു, നബി തങ്ങള്‍ വീട്ടില്‍ വന്നാല്‍ എന്താണ് ചെയ്യാറുള്ളത് എന്ന്. അപ്പോള്‍ മഹതി പറഞ്ഞു. നബി(സ) ഭാര്യമാരെ സഹായിക്കും. നമസ്‌കാര സമയമായാല്‍ നമസ്‌കാരത്തില്‍ പ്രവേശിക്കും. അനസ് (റ) പറഞ്ഞു: നബി തങ്ങള്‍ വസ്ത്രം സ്വയം തുന്നുകയും ചെരിപ്പ് തുന്നിക്കൂട്ടുകയും സാധാരണ പുരുഷന്‍മാര്‍ വീട്ടില്‍ ചെയ്യാറുള്ള ജോലിയില്‍ വ്യാപൃതരാവുകയും ചെയ്യാറുണ്ടായിരുന്നു. ഈ വിനയം ഭക്ഷണത്തിന്റെ കാര്യത്തിലും നബി (സ) പുലര്‍ത്തിയിരുന്നു. ലഭ്യമായത് കഴിക്കും, ഇല്ലാത്തതിന് വേണ്ടി ‘വാശി’ കാണിക്കുകയില്ല, അത് വരുത്തിച്ചു കഴിക്കുന്ന പതിവില്ല. ഭക്ഷണം മുന്നിലെത്തിയാല്‍ വേണ്ടെന്ന് പറയില്ല. ഒരു ഭക്ഷണവസ്തുവെയും തരംതാഴ്ത്തിയില്ല, കൗതുകം തോന്നിയാല്‍ എടുത്തു കഴിക്കും, അല്ലെങ്കില്‍ അത് മാറ്റിവെക്കും. ഒന്നും ലഭിച്ചില്ലെങ്കില്‍ വിശപ്പ് സഹിക്കും. വയറിന്മേല്‍ കല്ല്‌കെട്ടി നടുനിവര്‍ത്തിയ അനുഭവങ്ങള്‍ ഉണ്ടായിട്ടുണ്ട്. നിങ്ങളുടെ കയ്യില്‍ ഭക്ഷണം വല്ലതുമുണ്ടോ എന്നു ചോദിച്ച് അടുക്കളയിലേക്ക് തലയിടുകയും ഇല്ലെന്ന് നിരാശയോടെ മറുപടി ലഭിക്കുമ്പോള്‍ ശബ്ദത്തിന് ഒരു ഇടര്‍ച്ചയും പറ്റാതെ എന്നാല്‍ എനിക്ക് സുന്നത്തു നോമ്പാണ് എന്ന് പറയുന്ന ധാരാളം രംഗങ്ങള്‍ ഹദീസില്‍ കാണാം. ആഡംബരത്തെയും തദ്വാരാ ഉണ്ടാകുന്ന അഹങ്കാരത്തെയും അവര്‍ തന്റെ ഭക്ഷണത്തളികയിലേക്ക് അടുപ്പിക്കുകയുണ്ടായില്ല. ഒരിക്കല്‍ ഒരു പാത്രത്തില്‍ പാലും തേനും കൊണ്ടുവന്നപ്പോള്‍ അത് നബി (സ) പ്രോത്സാഹിപ്പിച്ചില്ല. ഒരേ പാത്രത്തില്‍ രണ്ട് കറികളോ! എന്നായിരുന്നു അവരുടെ ആശ്ചര്യപ്രകടനം. ഞാന്‍ കഴിക്കുന്നില്ല, നിങ്ങളോട് കഴിക്കരുതെന്ന് വിലക്കുന്നുമില്ല എന്നും എന്നാല്‍, ഇത്തരം ഗര്‍വ് എനിക്കിഷ്ടമില്ല എന്നും തുറന്നുപറഞ്ഞു നബി (സ).

തിരക്കുപിടിച്ച ജീവിതത്തില്‍ കുടുംബത്തോടൊപ്പവും മക്കളോടൊപ്പവും സമയം ചെലവഴിക്കാന്‍ നേരം കണ്ടെത്തുന്ന നീതിമാനായ കുടുംബനാഥനായിരുന്നു മഹാനവര്‍കള്‍. ഭാര്യമാരുടെയും മക്കളുടെയും ജീവിതം വലംവെക്കുന്നത് കുടുംബനാഥന്റെ ജീവിതത്തെയാണ്. അതിനാല്‍ അവരെ പരിഗണിക്കാതിരിക്കുന്നതും എന്തിന്റെ പേരിലാണെങ്കിലും നീതീകരിക്കാനാവില്ല. അത് അനീതിയാണ്. അനിവാര്യമായ സാഹചര്യങ്ങളിലല്ലാതെ നബി (സ) യുടെ സഹവാസം വീട്ടുകാര്‍ക്ക് നഷ്ടപ്പെടില്ലായിരുന്നു. യുദ്ധത്തിന് പോകുമ്പോള്‍ പോലും ഏതെങ്കിലും ഒരു ഭാര്യയെ നബി ഒപ്പം കൂട്ടും. അവിടെയും നീതി പാലിക്കാന്‍ പലപ്പോഴും നറുക്കെടുപ്പിലൂടെയാണ് ആ ഭാഗ്യവതിയെ കണ്ടെത്തല്‍. വീട്ടുകാരോടുള്ള വര്‍ത്തമാനത്തില്‍ പോലും സ്‌നേഹം കിനിയുമായിരുന്നു. ആയിശ(റ) തന്നെ പറയുന്നുണ്ട്: ഒരു ദിവസം നബി (സ) ആയിശാ ഇതാ ജിബ്‌രീല്‍ നിന്നോട് സലാം പറയുന്നു എന്ന് പറഞ്ഞു. അപ്പോള്‍ ആയിശ എന്നതിന് പകരം നബി ആയിഷ് എന്നാണ് വിളിച്ചത്. ഇത് സ്‌നേഹപ്രകടനമാണ്. മറ്റൊരിക്കല്‍ എത്യോപ്യയില്‍ നിന്നുള്ള സംഘം പള്ളിയില്‍ ആയുധ പരിശീലനത്തിന്റെ ഭാഗമായി അഭ്യാസപ്രകടനം നടത്തിയപ്പോള്‍ നബി (സ) അവരെ സ്‌നേഹപൂര്‍വം വിളിച്ചു. യാ ഹുമൈറാ! നിനക്ക് കാണണോ? (ചുവപ്പ് കലര്‍ന്ന വെളുപ്പു നിറമുള്ള ചെറിയവള്‍ എന്നര്‍ഥം) ഇങ്ങനെ സന്തോഷം തുടിച്ചുനില്‍ക്കുന്നവയായിരുന്നു തിരുനബിയുടെ വീടകങ്ങള്‍.
മാനസികോല്ലാസമുണ്ടാകുന്ന പ്രവര്‍ത്തികള്‍ ഭാര്യമാരെ സന്തോഷിപ്പിക്കുമെന്നതില്‍ തര്‍ക്കമില്ല. തിരക്കുപിടിച്ച ജോലിക്കിടയിലും നബി (സ) ഓട്ട മത്സരത്തിനുവരെ സമയം കണ്ടെത്തിയതായി ആയിശ (റ) നിവേദനം ചെയ്തിട്ടുണ്ട്. ഒരു യാത്രയില്‍ അനുയായികളോട് മുമ്പില്‍ പോകാന്‍ ആവശ്യപ്പെട്ട് നബി (സ) ആയിശ(റ)യുമായി ഓട്ടമത്സരം നടത്തി. മെലിഞ്ഞ ശരീര പ്രകൃതിയുള്ള ആരോഗ്യവതിയായ ആയിശ (റ) വിജയിച്ചു. പിന്നീട് ശരീരം പുഷ്ടിപ്പെട്ട് തടിച്ച ശേഷം മറ്റൊരു യാത്രയില്‍ ഇതുപോലെ മത്സരം നടത്തിയപ്പോള്‍ നബി (സ) വിജയിച്ചു. ചിരിച്ചുകൊണ്ട് ഇത് അതിനുള്ള പകരമാണെന്ന് നബി (സ) പറഞ്ഞു (അഹ്മദ്). അംറ്(റ) പറയുന്നു: ഞാന്‍ ഒരിക്കല്‍ നബി പത്‌നി ആഇശ(റ)യോടു ചോദിച്ചു. തിരുനബി (സ) ഭാര്യമാര്‍ക്കൊപ്പം ഒറ്റക്കായാല്‍ എങ്ങനെയായിരുന്നു? അവര്‍ പറഞ്ഞു: നിങ്ങളുടെ കൂട്ടത്തിലുള്ള ഒരു ആണിനെപ്പോലെത്തന്നെയായിരുന്നു നബിയും. ഒരു വ്യത്യാസം മാത്രം. തങ്ങള്‍ ജനങ്ങളില്‍ വെച്ചേറ്റവും മാന്യനും സദ്‌സ്വഭാവിയും ചിരിയും പുഞ്ചിരിയും നിറഞ്ഞവരുമായിരുന്നു (ഖുര്‍തുബി). ഭാര്യമാരുടെ മടിയില്‍ തലവെച്ച് കിടക്കുകയും അവരുമായി ഒരുമിച്ചു കുളിക്കുകയും വളരെ മാന്യവും സംശുദ്ധവുമായ ലൈംഗിക ബന്ധം പുലര്‍ത്തുകയും ചെയ്യുമായിരുന്നു പ്രവാചകര്‍ (സ). ആഇശാബീവി(റ) ഒരു രംഗം ഇങ്ങനെ വിവരിക്കുന്നു: എന്റെയും നബി (സ) യുടെയും ഇടയില്‍ ഒരു പാത്രം വെള്ളം വെച്ച് ഞാനും നബിയും ഒരുമിച്ച് കുളിക്കാറുണ്ടായിരുന്നു. നബി (സ) എന്നേക്കാള്‍ വേഗത്തില്‍ വെള്ളം മുക്കി ഒഴിക്കുമായിരുന്നു. മതി, മതി എനിക്കും വേണം എന്ന് ഞാന്‍ പറയുന്നതുവരെ.

Continue Reading

columns

സ്‌നേഹത്തിന്റെ പുഴയായ് ഒരാള്‍

അയാള്‍ എതിര്‍ക്കുന്നത് വെറുപ്പിന്റെ രാഷ്ട്രീയം പ്രചരിപ്പിക്കുന്നതിനെയാണ്. ആര്‍.എസ്.എസിന്റെ സ്ത്രീവിരുദ്ധ മുഖം ഭാരത് ജോഡോ യാത്രയിലെ പ്രസംഗങ്ങളില്‍ രാഹുല്‍ഗാന്ധി തുറന്നുകാട്ടി. രാജ്യത്തെ യുവാക്കള്‍ നേരിടുന്ന തൊഴിലില്ലായ്മ പൊതു സമൂഹത്തിന് മുമ്പില്‍ അവതരിപ്പിക്കാന്‍ അത്തരം യുവാക്കളെ തന്നെ യാത്രയില്‍ അണിനിരത്തി. എന്നിട്ടും രാഹുല്‍ ഭാരത് ജോഡോ യാത്രയില്‍ രാഷ്ട്രീയം സംസാരിക്കുന്നില്ലെന്ന പെരുംനുണ പ്രചരിപ്പിച്ചവര്‍ യഥാര്‍ഥത്തില്‍ ചെയ്തത് സംഘ്പരിവാറിന്റെ വിദ്വേഷ രാഷ്ട്രീയത്തെ പരോക്ഷമായി പിന്തുണക്കുക എന്നത് തന്നെയാണ്.

Published

on

റിയാസ് കെ.എം.ആര്‍

രാജ്യം നേരിടുന്ന വെറുപ്പിന്റെയും വിദ്വേഷത്തിന്റെയും വര്‍ത്തമാനകാല പ്രതിസന്ധികളെ സ്‌നേഹംകൊണ്ട് മറികടക്കാന്‍ രാഹുല്‍ഗാന്ധി ഇന്ത്യയുടെ ഹൃദയവീഥികളിലൂടെ നടത്തുന്ന ഭാരത് ജോഡോ യാത്ര കേരളത്തിന്റെ അതിര്‍ത്തി പിന്നിട്ടിരിക്കുന്നു. കേരളത്തിന്റെ മണ്ണില്‍ സ്‌നേഹത്തിന്റെ പുഴയായി ഒഴുകിയാണ് രാഹുലിന്റെ പ്രയാണം അയല്‍ സംസ്ഥാനങ്ങളിലേക്ക് തുടര്‍സഞ്ചാരം തുടങ്ങിയിരിക്കുന്നത്. കന്യാകുമാരിയില്‍നിന്നും തുടങ്ങിയ യാത്ര മലയാളനാടിന് സമ്മാനിച്ചത് സ്‌നേഹത്തിന്റെയും സാന്ത്വന സ്പര്‍ശത്തിന്റെയും കരുതലിന്റെയും 19 ദിനരാത്രങ്ങളായിരുന്നു.

രാജ്യത്ത് സ്‌നേഹത്തിന്റെയും ഐക്യത്തിന്റെയും സന്ദേശവുമായി രാഹുല്‍ഗാന്ധി എന്ന മനുഷ്യന്‍ നടന്നു തുടങ്ങിയപ്പോള്‍ അദ്ദേഹത്തെ വരവേല്‍ക്കാന്‍… ഒരു നോക്കു കാണാന്‍ ജനലക്ഷങ്ങള്‍ വഴിയോരങ്ങളിലേക്ക് ഒഴുകിയെത്തി.
‘ഞാന്‍ ഒറ്റയ്ക്ക് ലക്ഷ്യത്തിലേക്ക് നടന്നു തുടങ്ങി. ആളുകള്‍ അതിനൊപ്പം ചേര്‍ന്നു. ഒരാള്‍ക്കൂട്ടമായ് മാറി’ ഉറുദു കവി മജ്‌റൂഹ് സുല്‍ത്താന്‍പുരിയുടെ ഈ വരികള്‍ അന്വര്‍ഥമാക്കും വിധമായിരുന്നു രാഹുലിന്റെ കാല്‍നട യാത്ര.

കന്യാകുമാരിയില്‍നിന്ന് തുടങ്ങി ശ്രീനഗര്‍ വരെയുള്ള 3570 കിലോമീറ്റര്‍ ദൈര്‍ഘ്യം കാല്‍നടയായി താണ്ടാന്‍ കെല്‍പ്പ് കാട്ടിയ ഇന്ത്യയിലെ ഏക രാഷ്ട്രീയ നേതാവ് രാഹുല്‍ഗാന്ധിയാണ്. മറ്റു പല രാഷ്ട്രീയ യാത്രകളെയും പോലെ അധികാരശ്രേണിയിലേക്ക് നടന്നുകയറാനുള്ള യാത്രയായിരുന്നില്ല ആ മനുഷ്യനത്. മതത്തിന്റെയും ജാതിയുടെയും പേരില്‍ അകന്നു തുടങ്ങിയ ഇന്ത്യക്കാരുടെ മനസുകളെ സ്‌നേഹംകൊണ്ട് ഊട്ടിയുറപ്പിക്കാനുള്ള സദുദ്ദേശത്തിന്റെ ഭാഗമായിരുന്നു. അത് കൊണ്ട് തന്നെയാണ് പാറശാല മുതല്‍ വഴിക്കടവ് വരെയുള്ള കേരളത്തിന്റെ പാതയോരങ്ങളില്‍ ആ മനുഷ്യനെ ഒരു നോക്ക് കാണാന്‍ ജനലക്ഷങ്ങള്‍ കാത്തുനിന്നത്. അയാളുടെ കരം പുണരാന്‍ വെമ്പിയത്. അദ്ദേഹത്തിന്റെ ചേര്‍ത്തുനിര്‍ത്തലില്‍ സാന്ത്വനം കണ്ടെത്തിയത്. ആ സ്‌നേഹ വായ്പ്പില്‍ കണ്ണീരണിഞ്ഞത്. രാഹുല്‍ഗാന്ധി എന്ന നാമത്തെ ഹൃദയത്തിലേറ്റിയത്.

വര്‍ത്തമാന കാല ഇന്ത്യ എത്രമാത്രം സ്‌നേഹവും ചേര്‍ത്തുനിര്‍ത്തലും ഐക്യവും കൊതിക്കുന്നുവെന്ന് ആ യാത്ര നമുക്ക് മുമ്പില്‍ സാക്ഷ്യപ്പെടുത്തിതന്നു. രാഹുല്‍ഗാന്ധി സ്‌നേഹത്തിന്റെ പുഴയായി ഒഴുകിയപ്പോള്‍ മനസുകളില്‍ അടിഞ്ഞു കൂടിയിരുന്ന വെറുപ്പിന്റെയും വിദ്വേഷത്തിന്റെയും അസമത്വത്തിന്റെയും മാലിന്യങ്ങള്‍ എല്ലാം ഇല്ലാതായിപ്പോയി.
ആണെന്നോ പെണ്ണെന്നോ ട്രാന്‍സ്‌ജെന്‍ഡറെന്നോ കറുത്തവനെന്നോ വെളുത്തവനെന്നോ ദരിദ്രനെന്നോ സമ്പന്നനെന്നോ വ്യത്യാസമില്ലാതെ അയാള്‍ എല്ലാ മനുഷ്യരെയും ചേര്‍ത്തുനിര്‍ത്തി. മഹാത്മാഗാന്ധിയെ നേരിട്ടു കാണാന്‍ ഭാഗ്യം സിദ്ധിച്ചിട്ടില്ലാത്ത ഒരു തലമുറക്ക് മുമ്പില്‍ ആരായിരുന്നു ഗാന്ധിജിയെന്ന മനുഷ്യസ്‌നേഹിയെന്ന് തന്റെ പ്രവൃത്തിയിലൂടെ രാഹുല്‍ഗാന്ധി നിരന്തരം കാണിച്ചു തന്നു.

ഐക്യംകൊണ്ട് തീര്‍ത്ത
പ്രതിരോധം

ആര്‍.എസ്.എസിന്റെ നേതൃത്വത്തില്‍ വര്‍ഗീയത ഉപയോഗിച്ച് ഇന്ത്യയില്‍ വളര്‍ത്തിക്കൊണ്ടുവന്ന വിദ്വേഷത്തിന്റെ രാഷ്ട്രീയത്തിനെതിരെ ഭാരത് ജോഡോ യാത്രയുടെ വേദികളില്‍ രാഹുല്‍ഗാന്ധി നിരന്തരം ശബ്ദമുയര്‍ത്തി. വര്‍ഗീയതക്കെതിരെ ഐക്യപ്പെടേണ്ടതിന്റെ അനിവാര്യതയെകുറിച്ച് അദ്ദേഹം നിരന്തരം സംവദിച്ചു കൊണ്ടേയിരുന്നു. എന്നാല്‍ മതേതര മുഖമുള്ളവരെന്ന് നാഴികക്ക് നാല്‍പത് വട്ടം വീമ്പുപറയുന്ന ഒരു വിഭാഗം രാഷ്ട്രീയക്കാര്‍ സൈബറിടത്തിലും അവരുടെ നേതാക്കള്‍ പൊതുയോഗങ്ങളിലുമെല്ലാം വെറുപ്പിന്റെ രാഷ്ട്രീയത്തിനെതിരായ രാഹുല്‍ഗാന്ധിയുടെ യാത്രയെ നിരന്തരം അവഹേളിക്കുകയാണ് ചെയ്തത്. രാഹുല്‍ഗാന്ധി കഴിക്കുന്ന ഭക്ഷണത്തിന്റെ പേരില്‍ പോലും കേരള മണ്ണില്‍ ബാനര്‍ ഉയര്‍ത്തി ഈ യാത്രയെ അത്രമേല്‍ അധിക്ഷേപിച്ചവര്‍ക്ക് കേരളത്തിന്റെ അതിര്‍ത്തി പിന്നിട്ടാല്‍ നാല് വോട്ട് കിട്ടണമെങ്കില്‍ അതേ രാഹുല്‍ഗാന്ധിയുടെ പോസ്റ്റര്‍ അടിച്ച് പ്രചാരണം നടത്തേണ്ട ഗതികേടാണെന്നത് വസ്തുതയാണ്. നിരന്തര അവഹേളനങ്ങള്‍ നേരിട്ടപ്പോഴും അതിനൊന്നും മറുപടി പറയാന്‍ നില്‍ക്കാതെ അവരെ നോക്കി പുഞ്ചിരിയോടെ നടന്നു നീങ്ങിയ മുഖമായിരുന്നു രാഹുലിന്റേത്.

അയാള്‍ എതിര്‍ക്കുന്നത് വെറുപ്പിന്റെ രാഷ്ട്രീയം പ്രചരിപ്പിക്കുന്നതിനെയാണ്. ആര്‍.എസ്.എസിന്റെ സ്ത്രീവിരുദ്ധ മുഖം ഭാരത് ജോഡോ യാത്രയിലെ പ്രസംഗങ്ങളില്‍ രാഹുല്‍ഗാന്ധി തുറന്നുകാട്ടി. രാജ്യത്തെ യുവാക്കള്‍ നേരിടുന്ന തൊഴിലില്ലായ്മ പൊതു സമൂഹത്തിന് മുമ്പില്‍ അവതരിപ്പിക്കാന്‍ അത്തരം യുവാക്കളെ തന്നെ യാത്രയില്‍ അണിനിരത്തി. എന്നിട്ടും രാഹുല്‍ ഭാരത് ജോഡോ യാത്രയില്‍ രാഷ്ട്രീയം സംസാരിക്കുന്നില്ലെന്ന പെരുംനുണ പ്രചരിപ്പിച്ചവര്‍ യഥാര്‍ഥത്തില്‍ ചെയ്തത് സംഘ്പരിവാറിന്റെ വിദ്വേഷ രാഷ്ട്രീയത്തെ പരോക്ഷമായി പിന്തുണക്കുക എന്നത് തന്നെയാണ്.

ഏതൊക്കെ പ്രസ്ഥാനമോ നേതാക്കളോ കൂടെനിന്നാലും ഇല്ലെങ്കിലും ഋഷിതുല്യനായി ഇന്ത്യയുടെ ഒരറ്റം മുതല്‍ മറ്റേ അറ്റം വരെ രാഹുല്‍ഗാന്ധി രാജ്യത്തിന്റെ യഥാര്‍ഥ മൂല്യങ്ങളെ വീണ്ടെടുക്കാനായി നടക്കുമ്പോള്‍ ആ പാദങ്ങള്‍ക്ക് കരുത്തേകാന്‍ ഇവിടെയുള്ള കോടാനുകോടി ജനതയുടെ പ്രാര്‍ഥനയും പിന്തുണയും ഉണ്ട്. ജാതി മത വര്‍ണ ലിംഗഭേദങ്ങള്‍ക്കപ്പുറം ജനാധിപത്യ ഇന്ത്യയെ വീണ്ടെടുക്കാന്‍ കൊതിക്കുന്ന ആ ജനകോടികളുടെ മനസ് തന്നെയാണ് ഭാരതാംബയുടെ വിരിമാറിലൂടെ സ്‌നേഹത്തിന്റെ പുഴയായ് ഒഴുകാന്‍ രാഹുലിന് പ്രചോദിതമാകുന്ന ഊര്‍ജ്ജവും. അവരാഗ്രഹിക്കുന്നു സ്‌നേഹസമ്പന്നമായ ഇന്ത്യയെ… ലോകത്തിന്മുമ്പില്‍ അഭിമാനം സ്ഫുരിക്കുന്ന മുഖമുയര്‍ത്തിനില്‍ക്കുന്ന ഇന്ത്യക്കാരനാവാന്‍… അവരെ നയിക്കാന്‍ രാഷ്ട്രീയത്തിന്റെ കാപട്യങ്ങളറിയാത്ത രാഹുല്‍ ഗാന്ധിയെന്ന ഭരണാധികാരിയെ ലഭിക്കാന്‍…

ഈ പുഴ ഇനിയുമൊഴുകട്ടെ… കാരണം ഇന്ത്യയെന്നാല്‍ വെറുപ്പല്ല, ഇന്ത്യയെന്നാല്‍ സ്‌നേഹമാണ്… അത് തന്നെയാണ് രാഹുല്‍ഗാന്ധി ഭാരത ഐക്യയാത്രയിലൂടെ പഠിപ്പിക്കുന്ന വലിയ നന്മയുടെ പാഠവും.

Continue Reading

columns

കൂപ്പുകുത്തുന്ന രൂപ- എഡിറ്റോറിയല്‍

സാമ്പത്തിക പ്രതിസന്ധിയില്‍ നട്ടംതിരിയുന്ന ശ്രീലങ്കയും പാകിസ്താനുമെല്ലാം ഉദാഹരണമായി നമുക്ക് മുന്നിലുള്ളപ്പോള്‍ കേന്ദ്രസര്‍ക്കാര്‍ ജാഗ്രത പുലര്‍ത്തേണ്ടതുണ്ട്. റെയ്ഡുകളും അറസ്റ്റുകളുമായി ജനശ്രദ്ധ തിരിച്ചുവിട്ടതുകൊണ്ട് മാത്രം സമ്പദ്ഘടനയെ രക്ഷിക്കാനാവില്ല. ജനക്ഷേമം മുന്‍നിര്‍ത്തിയുള്ള ഉറച്ച കാല്‍വെപ്പുകള്‍ക്ക് തയാറായില്ലെങ്കില്‍ രാജ്യത്തിനുണ്ടാകുന്ന ഭവിഷ്യത്ത് വലുതായിരിക്കും.

Published

on

ആഗോള സമ്പദ്ഘടന വീണ്ടും മാന്ദ്യത്തില്‍ അമരാന്‍ പോകുന്നുവെന്നാണ് ലോക വ്യാപാര സംഘടന നല്‍കുന്ന ഏറ്റവും പുതിയ മുന്നറിയിപ്പ്. ഡബ്ല്യു.ടി.ഒ മേധാവി ജനറല്‍ ഗോസി ഒകോഞ്ചോ ഇവേലയുടെ വിലയിരുത്തല്‍ പ്രകാരം ആഗോള സാമ്പത്തിക സൂചികകള്‍ നല്‍കുന്നത് നല്ല സൂചനകളല്ല. റഷ്യയുടെ യുക്രെയ്ന്‍ അധിനിവേശവും വിലക്കയറ്റവും പണപ്പെരുപ്പും ഇന്ധന ക്ഷാമവുമെല്ലാം സമ്പദ്ഘടനയെ വലിച്ചുകൊണ്ടുപോകുന്നത് വന്‍ ദുരന്തത്തിലേക്കാണ്. ഈ വര്‍ഷം ആദ്യം മുറുമുറുപ്പില്‍ മാത്രമായി ഒതുങ്ങിയിരുന്ന മാന്ദ്യ ഭീഷണി ഇപ്പോള്‍ കൂടുതല്‍ ഉച്ചത്തിലായിട്ടുണ്ട്. സാമ്പത്തിക പ്രതിസന്ധി വാപിളര്‍ത്തി വിഴുങ്ങാന്‍ നില്‍ക്കുമ്പോഴാണ് ഇന്ത്യന്‍ രൂപയ്ക്ക് റെക്കോര്‍ഡ് മൂല്യത്തകര്‍ച്ച സംഭവിച്ചിരിക്കുന്നത്. ഡോളറിനെതിരെ രൂപയുടെ വിനിമയ നിരക്ക് 81 കടന്നിരിക്കുന്നു. വരും ദിവസങ്ങളിലും മൂല്യം താഴോട്ട് പതിക്കുമെന്നാണ് സാമ്പത്തിക വിദഗ്ധരുടെ മുന്നറിയിപ്പ്. രൂപയുടെ മൂല്യത്തില്‍ ഇടിവ് കണ്ടു തുടങ്ങിയതുമുതല്‍ റിസര്‍വ് ബാങ്ക് ഓഫ് ഇന്ത്യ ചില ഇടപെടലുകള്‍ നടത്തിയിരുന്നെങ്കിലും ഫലം കണ്ടിട്ടില്ല.

ബുധനാഴ്ച അമേരിക്കന്‍ ഫെഡറല്‍ റിസര്‍വ് പലിശ നിരക്ക് 75 പോയിന്റ് ഉയര്‍ത്തിയതാണ് കിതച്ചുകൊണ്ടിരുന്ന രൂപക്ക് വലിയ ആഘാതമായത്. ഇത്തരമൊരു അപകട സാധ്യതയെക്കുറിച്ച് ലോക വ്യാപാര സംഘടന മുന്നറിയിപ്പ് നല്‍കിയതാണ്. വികസിത രാജ്യങ്ങളുടെ സെന്‍ട്രല്‍ ബാങ്കുകള്‍ പലിശനിരക്ക് ഉയര്‍ത്തുമ്പോള്‍ വികസ്വര രാജ്യങ്ങളെയാണ് ഏറെ ബാധിക്കുക. രൂപയുടെ മൂല്യത്തകര്‍ച്ചക്കുണ്ടായ കാരണങ്ങള്‍ പലതാണ്. വിദേശ മൂലധനത്തിന്റെ ഒഴുക്ക് ആഗോളതലത്തില്‍ പ്രകമ്പനങ്ങളുണ്ടാക്കുമെന്നതുകൊണ്ട് അപകടസാധ്യതകള്‍ മുന്‍കൂട്ടി കണ്ട് ഫലപ്രമായി പ്രവര്‍ത്തിച്ചില്ലെങ്കില്‍ ഏതൊരു രാജ്യവും മാന്ദ്യത്തില്‍ മുങ്ങിത്താവുകയേ ഉള്ളൂ. രാജ്യത്ത് വിലക്കയറ്റവും പണപ്പെരുപ്പവും ഉണ്ടാകുമ്പോള്‍ യുക്രെയ്ന്‍ യുദ്ധം ഉള്‍പ്പെടെയുള്ള വിദേശ സമ്മര്‍ദ്ദങ്ങളിലേക്ക് ചൂണ്ടിക്കാട്ടുകയാണ് കേന്ദ്ര സര്‍ക്കാര്‍ ചെയ്യുന്നത്. അതൊരു തരം ഒളിച്ചോട്ടമാണ്. ഉത്തരവാദിത്തം ഏറ്റെടുത്ത് പ്രവര്‍ത്തിക്കുന്നതില്‍ സര്‍ക്കാറിനുള്ള ബലഹീനതയാണ് അതിലൂടെ വെളിപ്പെടുന്നത്. 2008ലെ ആഗോള സാമ്പത്തിക മാന്ദ്യം ലോകത്തെ പിടിച്ചുകുലുക്കിയപ്പോള്‍ ഇന്ത്യയില്‍ പ്രകമ്പനങ്ങളില്ലാതെപോയത് മന്‍മോഹന്‍ സിങിന്റെ നേതൃത്വത്തില്‍ അന്നത്തെ ഭരണകൂടം നടത്തിയ ഇടപെടലായിരുന്നു. ഇപ്പോള്‍ ബി.ജെ.പി സര്‍ക്കാരില്‍ മന്‍മോഹനെ പോലൊരു സാമ്പത്തിക വിദഗ്ധന്‍ ഇല്ലെന്ന് മാത്രമല്ല, ദീര്‍ഘവീക്ഷണത്തോടെ സമ്പദ്ഘടനയെ സമീപിക്കാനും ഭരണൂടം തയാറല്ല.

രൂപയുടെ മൂല്യത്തകര്‍ച്ചയില്‍ പരിഭ്രാന്തി വേണ്ടെന്നാണ് സര്‍ക്കാര്‍ അനുകൂലികളായ ചിലര്‍ പറഞ്ഞുകൊണ്ടിരിക്കുന്നത്. ഇതൊരു ആശ്വാസ വര്‍ത്തമാനം മാത്രമാണ്. ഇന്ത്യന്‍ ഓഹരി വിപണികളില്‍നിന്ന് നിക്ഷേപകര്‍ വന്‍തോതില്‍ പിന്‍വലിയുന്നതിന്റെ ക്ഷീണം നേരത്തെ തന്നെയുണ്ട്. അതോടൊപ്പം മൂല്യത്തകര്‍ച്ച കൂടിയാകുമ്പോള്‍ നിയന്ത്രണങ്ങള്‍ പിടിവിടുന്ന സാഹചര്യമുണ്ടാകുന്നു. ഏഷ്യന്‍ കറന്‍സികള്‍ പൊതുവെ ദുര്‍ബലമായി തുടരുന്ന സാഹചര്യത്തില്‍ വരുംദിവസങ്ങളിലും രൂപയുടെ ഇടിവ് തുടരാനാണ് സാധ്യത. വരും മാസങ്ങളില്‍ അത് ഡോളറിനെതിരെ 94 വരെ പോകുമെന്നാണ് സാമ്പത്തിക വിദഗ്ധരുടെ റിപ്പോര്‍ട്ട്. കരുതല്‍ ശേഖരത്തില്‍നിന്ന് ഡോളര്‍ എടുത്തു വില്‍ക്കുകയും പകരം രൂപ വാങ്ങുകയുമാണ് മൂല്യത്തകര്‍ച്ച തടയാന്‍ റിസര്‍വ് ബാങ്ക് ചെയ്യുന്ന പ്രധാന നടപടികളിലൊന്ന്. രൂപയുടെ മൂല്യം എണ്‍പത് തൊടുന്നത് തടയാന്‍ ജൂലൈയില്‍ മാത്രം റിസര്‍വ് ബാങ്ക് കരുതല്‍ ധനത്തില്‍നിന്ന് 19 ബില്യണ്‍ ഡോളര്‍ വിറ്റിരുന്നു. അതുപക്ഷേ, പേരിന് മാത്രമേ ഫലം ചെയ്തിട്ടുള്ളൂ. ഡോളറിനുള്ള ആവശ്യം ശക്തമാണെന്നുകൂടി ഇതോടൊപ്പം ഓര്‍ക്കേണ്ടതുണ്ട്. ഡോളര്‍ വിറ്റ് പിടിച്ചുനില്‍ക്കാവുന്ന സ്ഥിതിയല്ല ഇപ്പോഴുള്ളത്.

പണപ്പെരുപ്പം നിയന്ത്രിക്കാന്‍ അമേരിക്കന്‍ ഫെഡറല്‍ റിസര്‍വ് പലിശ നിരക്കുകള്‍ നിരന്തരം കൂട്ടിക്കൊണ്ടിരിക്കെ രൂപ ഇനിയും സമ്മര്‍ദ്ദത്തിലാകും. അന്താരാഷ്ട്രതലത്തില്‍ വന്‍കിട നിക്ഷേപകരെല്ലാം അമേരിക്കയിലേക്ക് പിന്‍വാങ്ങുകയും സ്വര്‍ണത്തെ ഏതാണ്ട് കൈവിട്ടിരിക്കുകയും ചെയ്യുന്ന സാഹചര്യത്തില്‍ രൂപ ഇനിയും പ്രതിരോധത്തിലാവും. രൂപയേക്കാള്‍ ഇടിവുപറ്റിയ കറന്‍സികളുണ്ടെന്ന് പറഞ്ഞ് സര്‍ക്കാര്‍ ആശ്വസിക്കാന്‍ ശ്രമിക്കുന്നുണ്ടെങ്കിലും അതൊരു മാതൃകയാക്കി മുന്നോട്ടുപോകാന്‍ സാധിക്കില്ല. ചുരുക്കത്തില്‍ സര്‍ക്കാറിനുമേല്‍ ഭാരിച്ച ഉത്തരവാദിത്തമാണ് ഇക്കാര്യത്തിലുള്ളത്. സാമ്പത്തിക പ്രതിസന്ധിയില്‍ നട്ടംതിരിയുന്ന ശ്രീലങ്കയും പാകിസ്താനുമെല്ലാം ഉദാഹരണമായി നമുക്ക് മുന്നിലുള്ളപ്പോള്‍ കേന്ദ്രസര്‍ക്കാര്‍ ജാഗ്രത പുലര്‍ത്തേണ്ടതുണ്ട്. റെയ്ഡുകളും അറസ്റ്റുകളുമായി ജനശ്രദ്ധ തിരിച്ചുവിട്ടതുകൊണ്ട് മാത്രം സമ്പദ്ഘടനയെ രക്ഷിക്കാനാവില്ല. ജനക്ഷേമം മുന്‍നിര്‍ത്തിയുള്ള ഉറച്ച കാല്‍വെപ്പുകള്‍ക്ക് തയാറായില്ലെങ്കില്‍ രാജ്യത്തിനുണ്ടാകുന്ന ഭവിഷ്യത്ത് വലുതായിരിക്കും.

Continue Reading

Trending