ഭോപ്പാല്‍: മണിക്കൂറുകളോളം വൈദ്യുതി തകരാര്‍ ഉണ്ടായതിനെ തുടര്‍ന്ന് സര്‍ക്കാര്‍ ആശുപത്രിയിലെ കോവിഡ് വാര്‍ഡില്‍ മൂന്ന് രോഗികള്‍ മരിച്ചു. മധ്യപ്രദേശിലെ ഭോപ്പാലിലെ ഹമീദിയ ആശുപത്രിയിലാണ് സംഭവം. സംഭവത്തില്‍ മുഖ്യമന്ത്രി ശിവ് രാജ് ചൗഹാന്‍ അന്വേഷണത്തിന് ഉത്തരവിട്ടു.

വൈകിട്ട് 5.48ഓടെയാണ് കോവിഡ് വാര്‍ഡില്‍ വൈദ്യുതി തകരാര്‍ ഉണ്ടായത്. രാത്രി 7.45ഓടെയാണ് വൈദ്യുതി പുനഃസ്ഥാപിച്ചത്. ഭോപ്പാലിലെ ഏറ്റവും വലിയ ആശുപത്രിയിലെ കോവിഡ് വാര്‍ഡില്‍ 64 രോഗികളെയാണ് പ്രവേശിപ്പിച്ചിരുന്നത്. അവരില്‍ പലരും ഉയര്‍ന്ന ഓക്‌സിജന്‍ പിന്തുണയുള്ളവരായിരുന്നു.

ഒരു ജനറേറ്റര്‍ ഉപയോഗിച്ച് ആശുപത്രിയില്‍ പവര്‍ ബാക്കപ്പ് നല്‍കിയിരുന്നെങ്കിലും ഡീസല്‍ തീര്‍ന്നതിനെ തുടര്‍ന്ന് അതും തകരാറിലായി. മുന്‍ കോണ്‍ഗ്രസ് കോര്‍പ്പറേറ്റര്‍ എംഡി അക്ബര്‍ ഖാന്‍ (67) ഉള്‍പ്പെടെ മൂന്നുപേരാണ് മരിച്ചത്. സംഭവവുമായി ബന്ധപ്പെട്ട് വൈദ്യുതി ബാക്കപ്പ് പരിപാലിക്കുന്നതിന്റെ ചുമതലയുള്ള പിഡബ്ല്യുഡി എഞ്ചിനീയറെ സസ്‌പെന്‍ഡ് ചെയ്തു.