ജോയ് മാത്യു / കമാല്‍ വരദൂര്‍

ആമുഖങ്ങള്‍ ആവശ്യമല്ല ജോയ് മാത്യു എന്ന വ്യക്തിക്ക്. മാധ്യമ പ്രവര്‍ത്തനത്തിലുടെ തുടങ്ങി ചലച്ചിത്രരംഗത്ത് വ്യക്തിമുദ്ര പതിപ്പിച്ച് കൃത്യമായ രാഷ്ട്രീയ ബോധം പരസ്യമാക്കുന്ന വ്യക്തി. ഇടത് മനസുളള അദ്ദേഹത്തിന് നിലവിലെ ഇടത്പക്ഷത്തോട്, പിണറായിസത്തോട് ശക്തമായ വിയോജിപ്പാണ്. അത് അദ്ദേഹത്തിന്റെ എഴുത്തിലും സംസാരത്തിലും സാമുഹ്യമാധ്യമ കുറപ്പുകളിലും വ്യക്തം. പറയാനുള്ളത് ആരുടെയും മുഖത്ത് നോക്കി അദ്ദേഹം പറയും. അഭിപ്രായങ്ങളെ കുച്ചുവിലങ്ങിടുന്ന വര്‍ത്തമാനകാല ഇടത് രാഷ്ട്രീയത്തോടുളള അമര്‍ഷം പ്രകടിപ്പിക്കുന്ന അദ്ദേഹത്തിന് ആനുകാലിക രാഷ്ട്രീയ സാമുഹ്യ വിഷയങ്ങളില്ലെല്ലാം സ്വന്തമായ അഭിപ്രായമുണ്ട്. തിരഞ്ഞെടുപ്പ് വേളയില്‍ അദ്ദേഹം ചന്ദ്രികയുമായി സംസാരിക്കുന്നു.

ഒന്നാമതായി ഇടതുപക്ഷം എന്ന് പറയുന്നത് തന്നെ നുണയാണ്. ശരിയായ ഇടത്പക്ഷം പുരോഗമനപരമായി ചിന്തിക്കുകയും ജനാധിപത്യ മൂല്യങ്ങളെ മുറുകെപ്പിടിച്ചുകൊണ്ട് മനുഷ്യരാശിയെ നേരായ ദിശയില്‍ നയിക്കുകയും ചെയ്യുന്നവരാണ്. എന്നാല്‍ കേരളത്തില്‍ നേര്‍ വിപരീതമാണല്ലോ സ്ഥിതി. പുരോഗമന ചിന്താഗതി എന്നത് പലപ്പോഴും വ്യക്തിപൂജയായി മാറുന്നു. വിമര്‍ശനമെന്നത് ഉള്‍ക്കൊള്ളാന്‍ കഴിയാത്ത കാര്യമായി മാറുന്നു. വിമര്‍ശിക്കുന്നവരെ സംഘം ചേര്‍ന്ന് ഇല്ലാതാക്കുന്നു. ലോകത്തെ കമ്മ്യൂണിസ്റ്റ് ഭരണകൂടങ്ങളെ നോക്കുക. എവിടെയും അഭിപ്രായ സ്വാതന്ത്ര്യമില്ല. സ്വേഛ്വാധിപത്യ ഭരണമാണല്ലോ..

കമ്മ്യുണിസ്റ്റ് പാര്‍ട്ടി എന്നാല്‍ പലയിടത്തും സ്വേഛാധിപത്യമാണ്. പാര്‍ട്ടിക്ക് സെക്രട്ടറിയുണ്ടാവും. അയാളാവും ഭരണാധികാരി. അത് റഷ്യയിലായാലും ചൈനയിലായാലും ഉത്തര കൊറിയയിലായാലും നമ്മള്‍ കാണുന്നത് സ്വേഛ്വാധിപതിമാണ്. പാര്‍ട്ടിയാണ് അവിടങ്ങളില്‍ ഭരണം നടത്തുന്നത്. ജനാധിപത്യ സംവിധാനമല്ല. ഇവിടെ നോക്കുക, പിണറായി വിജയന്‍ എന്ന സ്വേഛ്വാധിപതിയാണ് കാര്യങ്ങള്‍ നയിക്കുന്നത്. തിരഞ്ഞെടുപ്പിലും അദ്ദേഹം തന്നെ. പകരം നിര്‍ത്താന്‍ മറ്റൊരാളില്ലാത്ത വിധം ദയനീയമാണ് പാര്‍ട്ടി. അദ്ദേഹത്തിന് പകരക്കാരനെ കണ്ടെത്താന്‍ പാര്‍ട്ടിക്കാവുന്നില്ലെന്ന് മാത്രമല്ല അതിനുള്ള ശ്രമങ്ങളുമില്ല. 80 കഴിഞ്ഞ അനാരോഗ്യവാനായ അദ്ദേഹമാണ് ഇപ്പോഴും കാര്യങ്ങള്‍ നിയന്ത്രിക്കുന്നത്. അത് കൊണ്ട് തന്നെ അധികാരത്തോടുളള അമിതമായ ഭ്രമമാണ് അദ്ദേഹത്തിന്.
ഈ സ്വേഛാധിപത്യ പ്രവണതയെ നമ്മള്‍ തോല്‍പ്പിക്കണം. കഴിഞ്ഞ തവണ തോല്‍പ്പിക്കേണ്ടതായിരുന്നു. ഇത്തവണയെങ്കിലും ഈ ദുര്‍ഭരണത്തിന് അവസാനമിടണം.

ഇടത് മുന്നണി കഴിഞ്ഞ പത്ത് വര്‍ഷം നടത്തിയ ഭരണം നോക്കുക. പൊതുജനങ്ങളെ ദ്രോഹിക്കുന്ന ഭരണം. എല്ലാത്തിലും വര്‍ധന. കെട്ടിട നികുതി, സ്ഥല രജിസ്‌ട്രേഷന്‍ നികുതി. വൈദ്യുതി നിരക്ക്, വെളളക്കരം-എല്ലാത്തിലും ഭീമമായ വര്‍ധന. മാത്രവുമല്ല പൊതുകടം ക്രമാതീതമായി വര്‍ധിച്ചു. ഇത് സാധാരണക്കാരന്റെ മുതുകില്‍ നികുതി ഭാരമായി വരും. കഴിഞ്ഞ ദിവസവും ഭീമമായ തുക കടമെടുത്തു. ഈ വിധം പ്ലാനില്ലാത്ത ഭരണ സംവിധാനം. ഇത് കാരണം കേരളത്തിന്റെ സാമ്പത്തിക സ്ഥിതി തകര്‍ന്നിരിക്കുന്നു. കൊള്ളാവുന്ന ഒരു മന്ത്രി പോലും കഴിഞ്ഞ അഞ്ച് വര്‍ഷക്കാലം ഉണ്ടായിരുന്നില്ല. ഇപ്പോള്‍ മല്‍സരിക്കുന്നവരില്‍ അത്തരം യോഗ്യതയുളളവരില്ല. കാര്യപ്രാപ്തിയുള്ള, സ്വന്തം അഭിപ്രായമുള്ള, വിവേചനാധികാരമുള്ള, കാര്യങ്ങള്‍ പഠിക്കാന്‍ അര്‍പ്പണ ബോധമുളള ഒരാള്‍ പോലും ഇല്ല.  കുത്തഴിഞ്ഞ അവസ്ഥയാണ് ആഭ്യന്തര വകുപ്പില്‍. ആ വകുപ്പ് കൈകാര്യം ചെയ്യുന്നത് മുഖ്യമന്ത്രിയാണ്. അത് അധികാരത്തോടുളള ആര്‍ത്തിയാണ്.

പൊലീസിലെ ഏകപക്ഷീയത, സ്വജനപക്ഷപാതം എല്ലാം പകല്‍ പോലെ പ്രകടം. ബി.ജെ.പിയുടെ പ്രതിനിധികളെ തന്നെ പൊലിസിന്റെ തലപ്പത്ത് അവരോധിച്ചിരിക്കുന്നു. അവരെ അഴിഞ്ഞാടാന്‍ അനുവദിച്ചിരിക്കുന്നു. നമ്മുടെ നടുറോഡുകളില്‍ പോലും ഗുണ്ടാ വിളയാട്ടമാണ്. പട്ടാപകല്‍ വന്ന് വെട്ടിക്കൊല്ലുന്നു. ലഹരി മാഫിയയുടെ അഴിഞ്ഞാട്ടമാണ് എല്ലായിടത്തും. വിദ്യാര്‍ത്ഥി രാഷ്ട്രീയത്തില്‍ എസ്.എഫ്.ഐ അല്ലാത്തവരെല്ലാം ക്രൂരമായി റാഗിംഗ് ചെയ്യപ്പെടുന്നു. വയനാട് വെറ്റനറി കോളജിലെ സിദ്ദാര്‍ത്ഥിന്റെ കാര്യം മാത്രം ഉദാഹരണം. എത്ര ഭീകരമായാണ് ആ ചെറുപ്പക്കാരനെ ഇല്ലാതാക്കിയത്. ക്യാമ്പസുകളില്‍ ഗുണ്ടായിസമാണ്. കാമ്പസ് രാഷ്ട്രീയമെന്നത് എസ്.എഫ്.ഐ വിളയാട്ടമാണ്. അവിടെ ഗുണ്ടായിസം കാട്ടി നേതാവാകണം. എല്ലം കൊണ്ടും കേരളത്തെ നശിപ്പിച്ച ഭരണം അവസാനിക്കണം. ആത്മാര്‍ത്ഥമായി ഒരു സാധാരണ വോട്ടര്‍ ആഗ്രഹിക്കുന്നത് ഈ സര്‍ക്കാരിന്റെ പതനമാണ്.