എറണാകുളം മഹാരാജാസ് കോളേജില്‍ എസ്എഫ്‌ഐ സംസ്ഥാന സെക്രട്ടറി പി എം ആര്‍ഷോയുടെ മാര്‍ക്ക് ലിസ്റ്റ് വിവാദത്തില്‍ തെറ്റ് തിരുത്തി അധികൃതര്‍. ആര്‍ഷോ ജയിച്ചെന്ന മാര്‍ക്ക് ലിസ്റ്റാണ് അധികൃതര്‍ തിരുത്തിയത്. ഇതോടെ അദ്ദേഹം തോറ്റതായി രേഖപ്പെടുത്തി മാര്‍ക്ക് ലിസ്റ്റ് പുതുക്കി.
പരീക്ഷയെഴുതാതെ വിജയിച്ചെന്ന മാര്‍ക്ക് ലിസ്റ്റ് വിവാദമായതോടെയാണ് കോളേജിന്റെ തിരുത്ത്. ആര്‍ഷോ പരീക്ഷ എഴുതിയിട്ടില്ലെന്നും അതിനാല്‍ തോറ്റു എന്നുമാണ് പുതിയ മാര്‍ക്ക് ലിസ്റ്റില്‍ ഉള്ളത്.
പരീക്ഷ എഴുതാത്ത എസ്.എഫ്.ഐ സംസ്ഥാന സെക്രട്ടറി പി.എം.ആര്‍ഷോ നേരേത്തെ പാസായവരുടെ പട്ടികയിലുണ്ടായിരുന്നു. മഹാരാജാസ് കോളേജിലെ രണ്ടാം വര്‍ഷ ആര്‍ക്കിയോളജി വിദ്യാര്‍ത്ഥിയാണ് ആര്‍ഷോ. ക്രിമിനല്‍ കേസില്‍ പ്രതി ആയതിനാല്‍ മൂന്നാം സെമസ്റ്റര്‍ പരീക്ഷ എഴുതിയിരുന്നില്ല. എന്നാല്‍ റിസല്‍റ്റ് വന്നപ്പോള്‍ പാസായിരിക്കുന്നു എന്നാണ് രേഖയില്‍ ഉണ്ടായിരുന്നത്. കേരളത്തിലെ ക്യാമ്പസുകളില്‍ എസ്.എഫ്.ഐ നേതാക്കള്‍ക്ക് വേണ്ടി പാരലല്‍ സംവിധാനങ്ങള്‍ പ്രവര്‍ത്തിക്കുന്നതിന്റെ സൂചനയായിട്ടാണ് ഇത് വിലയിരുത്തപ്പെടുന്നതെന്ന ആക്ഷേപം പരക്കെ നില നില്‍ക്കെയാണ് ഈ റദ്ദാക്കല്‍ നടപടി.സംഭവത്തില്‍ പ്രതിഷേധവുമായി വിദ്യാര്‍ത്ഥി സംഘടനകള്‍ രംഗത്തെത്തിയിരുന്നു.