ദിവസേന ദീര്‍ഘനേരം വെറുതെയിരിക്കുന്നത് ആരോഗ്യത്തിന് ഗുരുതരമായ ദോഷങ്ങള്‍ ഉണ്ടാക്കുമെന്ന് ലാന്‍സെറ്റ് ജേര്‍ണലില്‍ പ്രസിദ്ധീകരിച്ച പുതിയ പഠനം മുന്നറിയിപ്പ് നല്‍കുന്നു. എന്നാല്‍ വലിയ വ്യായാമങ്ങള്‍ ആവശ്യമില്ല ദിനചര്യയില്‍ ചെറിയ ശാരീരിക പ്രവര്‍ത്തനങ്ങള്‍ ഉള്‍പ്പെടുത്തുന്നതുപോലും അകാലമരണസാധ്യത കുറയ്ക്കാന്‍ സഹായിക്കുമെന്ന് ഗവേഷകര്‍ പറയുന്നു. നോര്‍വേ, സ്വീഡന്‍, അമേരിക്ക, യു.കെ. ബയോബാങ്ക് എന്നിവിടങ്ങളില്‍ നിന്നുള്ള 1,35,000 പേരുടെ ആരോഗ്യവിവരങ്ങള്‍ വിശകലനം ചെയ്താണ് പഠനം നടത്തിയത്.

ദിവസവും പത്ത് മണിക്കൂറോളം ഇരിക്കുന്നവര്‍ വെറുതെയിരിക്കുന്ന സമയം 30 മിനിറ്റ് കുറച്ചാല്‍ അകാലമരണ സാധ്യത ഏഴ് ശതമാനം വരെ കുറയ്ക്കാനാവുമെന്ന് പഠനം വ്യക്തമാക്കുന്നു. ഉദാസീനമായ ജീവിതശൈലി പിന്തുടരുന്നവരിലാണ് ഈ മാറ്റത്തിന്റെ ഗുണഫലം കൂടുതല്‍ വ്യക്തമായത്. ഇവരില്‍ ദിവസേന വെറും അഞ്ച് മിനിറ്റ് അധികം നടക്കുന്നതുപോലും ആരോഗ്യനില മെച്ചപ്പെടുത്തുന്നുവെന്ന് ഗവേഷകര്‍ കണ്ടെത്തി. ദീര്‍ഘസമയം ഇരിക്കുന്നത് ഒഴിവാക്കാന്‍ ഓരോ അരമണിക്കൂറിലും എഴുന്നേറ്റ് നില്‍ക്കുക, അല്പനേരം നടക്കുക, നടന്നുകൊണ്ട് ഫോണ്‍ ചെയ്യുക, ലിഫ്റ്റിന് പകരം സ്‌റ്റെയര്‍കേസ് ഉപയോഗിക്കുക തുടങ്ങിയ ലളിതമായ ശീലമാറ്റങ്ങള്‍ ശുപാര്‍ശ ചെയ്യപ്പെടുന്നു.

വ്യായാമം ഒഴിവാക്കുന്ന ഉദാസീന ജീവിതശൈലി അമിതവണ്ണം, ഹൃദ്രോഗങ്ങള്‍, ടൈപ്പ് 2 പ്രമേഹം, മാനസികാരോഗ്യ പ്രശ്‌നങ്ങള്‍, ചിലയിനം കാന്‍സറുകള്‍ എന്നിവയുടെ സാധ്യത വര്‍ധിപ്പിക്കുമെന്നും പഠനം ചൂണ്ടിക്കാട്ടുന്നു.

മലയാളികള്‍ക്ക് പ്രിയപ്പെട്ട നടന്‍ മണിക്കുട്ടന്‍, സാമ്പത്തിക ഭദ്രതയെക്കുറിച്ച് കമല്‍ ഹാസന്‍ നല്‍കിയ ഉപദേശത്തെക്കുറിച്ച് മനസ്സുതുറന്നു. വരുമാനത്തേക്കാള്‍ അധികം ചെലവഴിക്കാതെ സാമ്പത്തിക അച്ചടക്കം പാലിക്കുന്നവരാണ് ജീവിതത്തില്‍ സ്ഥിരതയോടെയും വിജയത്തോടെയും മുന്നേറുന്നതെന്നാണ് കമല്‍ ഹാസെന്റ നിലപാടെന്ന് മണിക്കുട്ടന്‍ പറഞ്ഞു.

‘കായംകുളം കൊച്ചുണ്ണി’ എന്ന ജനപ്രിയ ടെലിവിഷന്‍ പരമ്പരയിലൂടെ ശ്രദ്ധേയനായ മണിക്കുട്ടന്‍, സിനിമയിലും മിനിസ്‌ക്രീനിലും സജീവമാണ്. ബിഗ് ബോസ് മലയാളം മൂന്നാം സീസണിലെ വിജയിയായി മാറിയ താരം, ‘കാര്യം സാമ്പത്തികമാണ്’ എന്ന യൂട്യൂബ് ചാനലിന് നല്‍കിയ അഭിമുഖത്തിലാണ് ഈ അനുഭവം പങ്കുവച്ചത്.

തമിഴില്‍ തന്റെ അടുത്ത സുഹൃത്തായ ഒരു തിരക്കഥാകൃത്ത് വഴിയാണ് കമല്‍ ഹാസെന്റ ഉപദേശം അറിഞ്ഞതെന്ന് മണിക്കുട്ടന്‍ പറഞ്ഞു. ലക്ഷ്വറി കാറുകള്‍ വാങ്ങാനുള്ള സാമ്പത്തികശേഷിയുണ്ടായിട്ടും അതിന് ഓടിയെത്താതെ, ആ പണം ജീവിതം മെച്ചപ്പെടുത്താന്‍ ഉപയോഗിക്കുന്നവരാണ് ദീര്‍ഘകാലത്തില്‍ സാമ്പത്തികമായി സ്ഥിരതയുള്ളവരാവുന്നതെന്നായിരുന്നു കമല്‍ ഹാസെന്റ അഭിപ്രായമെന്ന് അദ്ദേഹം വിശദീകരിച്ചു.

‘ഈ കാര്യം ഞാന്‍ അറിഞ്ഞപ്പോള്‍ ശരിയാണല്ലോ എന്ന് തോന്നി. സാമ്പത്തിക ബാധ്യത ഉണ്ടാക്കി വിലയേറിയ കാറുകള്‍ വാങ്ങുന്നതിന് പകരം, വില കുറഞ്ഞ ഒരു വാഹനം വാങ്ങി ബാക്കി പണം ലാഭകരമായ നിക്ഷേപങ്ങളിലേക്ക് മാറ്റുന്നതാണ് ഉചിതം,’ എന്നും മണിക്കുട്ടന്‍ കൂട്ടിച്ചേര്‍ത്തു. സാമ്പത്തിക അച്ചടക്കവും ദീര്‍ഘകാല ആസൂത്രണവും ജീവിതവിജയത്തിന് അനിവാര്യമാണെന്ന കമല്‍ ഹാസെന്റ സന്ദേശം തനിക്കും പ്രചോദനമായെന്നാണ് മണിക്കുട്ടന്റെ വാക്കുകള്‍.

ശബരിമല സ്വര്‍ണകൊള്ളക്കേസില്‍ ഉണ്ണികൃഷ്ണന്‍ പോറ്റി സമര്‍പ്പിച്ച ജാമ്യ ഹര്‍ജി തള്ളി കൊല്ലം വിജിലന്‍സ് കോടതി. രണ്ട് കേസുകളിലെയും ജാമ്യഹര്‍ജിയാണ് കോടതി തള്ളിയത്. ആദ്യം അറസ്റ്റിലായ ആളാണെന്നും, റിമാന്‍ഡ് 90 ദിവസം ആകുന്നു എന്നുമാണ് പോറ്റി കോടതിയില്‍ വാദിച്ചത്.

എന്നാല്‍ ഇനിയും തൊണ്ടി മുതല്‍ കണ്ടെടുക്കാന്‍ ഉണ്ടെന്ന് എസ്ഐടി കോടതിയെ അറിയിച്ചു. ഇത് അംഗീകരിച്ചാണ് ജാമ്യ ഹര്‍ജി തള്ളിയത്. രണ്ടാം തവണയാണ് ഉണ്ണികൃഷ്ണന്‍ പോറ്റിക്ക് ജാമ്യം നിഷേധിക്കുന്നത്. ആദ്യം സമര്‍പ്പിച്ച ജാമ്യപേക്ഷകള്‍ ഹൈക്കോടതി തള്ളിയതിന് പിന്നാലെയാണ് വീണ്ടും വിജിലന്‍സ് കോടതിയെ സമീപിച്ചത്.

അതേസമയം ദേവസ്വം ബോര്‍ഡ് മുന്‍ പ്രസിഡന്റ് എ പത്മകുമാറിനെ വീണ്ടും 14 ദിവസത്തേക്ക് ഇന്നലെ റിമാന്‍ഡ് ചെയ്തു. ദേവസ്വം ബോര്‍ഡ് മുന്‍ അംഗം കെ പി ശങ്കര്‍ദാസ് സമര്‍പ്പിച്ച മുന്‍കൂര്‍ ജാമ്യഹര്‍ജിയില്‍ കൊല്ലം ജില്ലാ സെഷന്‍സ് കോടതി ഇന്ന് വിശദമായ വാദം കേള്‍ക്കും.