Connect with us

Views

കാലിച്ചന്തയില്‍ രാഷ്ട്രീയം കളിക്കുന്ന ബി.ജെ.പി

Published

on

 

ഷാഫി ചാലിയം

ഇന്ത്യന്‍ ഭരണഘടനാനിര്‍മ്മാണ വേളയില്‍ തന്നെ പശു രാഷ്ട്രീയ വിഷയമായിട്ടുണ്ട്. പാല്‍ ചുരത്തുന്ന പശുവിനെ ആഹാരമാക്കുന്നത് ‘ശരിയുമല്ല ആദായകരവുമല്ല’ എന്ന സങ്കല്‍പ്പത്തില്‍ ഇന്ത്യയില്‍ നിരവധി സംസ്ഥാനങ്ങളില്‍ ഗോവധ നിരോധനമുണ്ട്. എന്നാല്‍ കറവ വറ്റുകയും പ്രസവ ശേഷി നഷ്ടപ്പെടുകയും ചെയ്യുന്ന പശുവിനെ തീറ്റിപ്പോറ്റാന്‍ പാവങ്ങളായ ക്ഷീര കര്‍ഷകന് സാധിക്കില്ല എന്ന് മാത്രമല്ല പോറ്റിയത് കൊണ്ട് യാതൊരു പ്രയോജനവുമില്ല. ഇത്തരം സാഹചര്യങ്ങളില്‍ നിവൃത്തികേടിന്റെ അവസ്ഥയില്‍ മാത്രമാണ് പശു അറവ് ശാലയിലേക്ക് എത്തുന്നത്. നിരോധിത സംസ്ഥാനങ്ങളിലെല്ലാം ഇത് നടന്നുവന്നിരുന്നു.
ഇന്ത്യന്‍ ജനസംഖ്യയില്‍ ഏകദേശം 30 ശതമാനത്തോളം ആളുകള്‍ നാല്‍ക്കാലികളുമായി ബന്ധപ്പെട്ട് ഉപജീവനം നടത്തുന്നവരാണ് എന്നാണ് കണക്ക്. ഇതില്‍ മുസ്‌ലിംകള്‍ 5 ശതമാനം പോലുമില്ല എന്നതാണ് യാഥാര്‍ഥ്യം. താഴെ തട്ടില്‍ ജീവിക്കുന്ന പാവപ്പെട്ട ഹൈന്ദവ ജനതയാണ് ഇതിലെ വലിയ വിഭാഗം. കാലികളുടെ മേല്‍ കൊണ്ട്‌വരുന്ന ഏതൊരു നിയന്ത്രണവും ബാധിക്കുക ഈ സമൂഹത്തെയായിരിക്കും. ഇത് വ്യക്തമാക്കാതെ ഇതൊരു മുസ്‌ലിം വിരുദ്ധ സംഭവമാക്കി പരിമിതപ്പെടുത്തി എന്ന് മാത്രമല്ല രാഷ്ട്രീയമായി മുസ്‌ലിം വോട്ട് സമാഹരിക്കാന്‍ ദുരുപയോഗം നടത്തുകയും ചെയ്തു എന്ന കൊടും പാതകമാണ് ഈ വിഷയത്തില്‍ സി.പി.എം ചെയ്തത്. ബി.ജെ.പി ആഗ്രഹിച്ചതും അതായിരുന്നു. ഒരു ജനവിരുദ്ധ നീക്കത്തെ, ഹൈന്ദവ സമൂഹത്തിലെ ബഹുഭൂരിപക്ഷം വരുന്ന പാവങ്ങളെ ദ്രോഹിക്കുന്ന നീക്കത്തെ, അല്ലെങ്കില്‍ കര്‍ഷക വിരുദ്ധ നീക്കത്തെ മുസ്‌ലിം വിരുദ്ധ നീക്കമായി പരിമിതപ്പെടുത്തി കൊടുത്തപ്പോള്‍ ബി.ജെ.പിക്കത് കൂടുതല്‍ ഗുണകരമായി ഭവിച്ചു.
മുസ്‌ലിം വിരുദ്ധതക്ക് ആഗോള തലത്തില്‍ ഒരിടമുണ്ട് ഇപ്പോള്‍. മോദി ഇന്ത്യയില്‍ പരീക്ഷിച്ചതും അതുതന്നെയാണ്. കൂടുതല്‍ മുസ്‌ലിം വിരുദ്ധ നീക്കങ്ങള്‍ക്ക് ലോകത്തെന്ന പോലെ ഇന്ത്യയിലും ഇടമുണ്ടെന്ന ചര്‍ച്ചയാണ് ഭുവനേശ്വറില്‍ ബി.ജെ.പി നടത്തിയത്. ഗോവധ നിരോധനത്തില്‍ ഏതെല്ലാം മൃഗങ്ങള്‍ ഉള്‍പ്പെടുന്നുവെന്നത് ഇന്ത്യയില്‍ തര്‍ക്ക വിഷയമാണ്. ഡല്‍ഹിയില്‍ പോത്തും കാളയും ഗോ വര്‍ഗത്തില്‍ പെടില്ല എന്ന വാദക്കാരുണ്ട്. മഹാരാഷ്ട്രയിലും ഹരിയാനയിലും ഗുജറാത്തിലും പോത്തും കാളയും ഗോ വര്‍ഗത്തില്‍ പെടുന്നുവെന്നും പറയുന്നുണ്ട്.
മൃഗങ്ങളോടുള്ള ക്രൂരത അവസാനിപ്പിക്കാനാണ് കേന്ദ്ര സര്‍ക്കാറിന്റെ പരിഷ്‌കാരമെങ്കില്‍ നിലവിലുള്ള നിയമങ്ങള്‍ക്ക് എന്ത് ന്യൂനതയാണുള്ളതെന്ന് അവര്‍ വ്യക്തമാക്കേണ്ടതുണ്ട്. യഥാര്‍ത്ഥത്തില്‍ മൃഗങ്ങളോടുള്ള ക്രൂരത എന്തെല്ലാമാണ്. ഇതില്‍ എന്തൊക്കെ ഈ നിയമം തടയുന്നുണ്ട്. 1. മൂക്ക് കുത്തുന്നത്. 2 . വെറ്ററിനറി ഡോക്ടര്‍ ചെവിയില്‍ ആയുധം കൊണ്ട് തുളയുണ്ടാക്കി കമ്മല്‍ പതിക്കുന്നത്. (ഇത് സര്‍ക്കാര്‍ നടപടി) 3. വൃഷണം ഉടക്കുന്നത് . 4. കുളമ്പില്‍ ലാട അടിക്കുന്നത്. 5. ഭാരം കയറ്റിയ വണ്ടി വലിക്കുന്നത്. 6. കിടാവ് കുടിക്കേണ്ട പാല്‍ കവര്‍ന്നെടുത്ത് മനുഷ്യന്‍ കുടിക്കുന്നത്. 7. എണ്ണയാട്ടുന്നതിനായി ഭാരം കയറ്റിയ ചക്ക് രാവിലെ മുതല്‍ വൈകും വരെ വൃത്താകൃതീയില്‍ ചുമന്ന് വലിക്കുന്നത്. ഇതൊക്കെ ക്രൂരതയല്ലേ?
തന്റെ കുഞ്ഞിനായി ദൈവം തന്ന പാല്‍ മനുഷ്യന്‍ കറന്നെടുക്കുന്നത് നിസ്സഹാതയോടെ നോക്കി നില്‍ക്കുന്ന ഗോ മാതാവിന്റെ വേദനയില്‍ ഒരു ഭക്തനും പരിഭവപ്പെട്ടതായി അറിവില്ല. ലോകത്തെ നിയമ വിധേയമായ മോഷണമാണ് (കുറ്റകൃത്യമാണ്) യഥാര്‍ത്ഥത്തില്‍ പശു കറവ. ഈ നിയമത്തില്‍ പശു, കാള, പോത്ത്, ഒട്ടകം ഇവ മാത്രമേയുള്ളൂ. ആട്, കുതിര, പന്നി തുടങ്ങിയവ എന്ത്‌കൊണ്ട് ഇല്ല? ഇവക്ക് നേരെ എന്ത് ക്രൂരതയും ആവാമോ. മൃഗങ്ങളോടുള്ള ക്രൂരത അവസാനിപ്പിക്കാനുള്ള നിയമം കൊണ്ട്‌വരുമ്പോള്‍ ഈ മൃഗങ്ങള്‍ എന്ത്‌കൊണ്ട് ഈ പരിധിയില്‍ വരുന്നില്ല.
കാലിച്ചന്തയില്‍ രേഖകള്‍ സഹിതം ഉരുവിനെ വാങ്ങാം. സത്യവാങ്മൂലത്തില്‍ കൃഷി ആവശ്യത്തിനാണെന്ന് എഴുതികൊടുക്കണം. ആറ് മാസത്തേക്ക് വില്‍ക്കാനും പാടില്ല. എന്നാല്‍ വാങ്ങിയ ഉരു കാര്‍ഷികാവശ്യത്തിന് ഉപയുക്തമല്ല എന്ന് ബോധ്യമായാല്‍ എന്ത് ചെയ്യും പാവം കര്‍ഷകന്‍? ആറ് മാസം വരെ കാത്തിരിക്കാനും അത് വരെയുള്ള ചെലവിന് വരുന്ന (ഉദ്ദേശം ഒരു ഉരുവിനാന് ദിവസം മിനിമം 150 രൂപ വെച്ച് 6 മാസത്തേക്ക് 6 ഃ 30 = 18000) ഏകദേശം ഉരുവിനെ വാങ്ങിയതിനേക്കാള്‍ വില) ഈ തുക കര്‍ഷകന് ആര് നല്‍കും.
കാലി ചന്തകള്‍ കാര്‍ഷികാവശ്യത്തിന് മാത്രം എന്ന നിഷ്‌കര്‍ഷകത ഇന്ത്യയില്‍ ഏത് നിയമത്തിലാണുള്ളത്. കാലികളെ വാങ്ങാനും വില്‍ക്കാനും പരസ്പരം വെച്ച് മാറാനുമാണ് ചന്തകള്‍. അത് കാര്‍ഷികാവശ്യങ്ങള്‍ക്കായി പരിമിതപ്പെടുത്തുന്നത് കാലികളോടോ കാര്‍ഷിക മേഖലയോടോ ഉള്ള താല്‍പര്യമല്ല എന്ന് സ്പഷ്ടം. കേരളം, ഗോവ പോലുള്ള സംസ്ഥാനങ്ങളില്‍ കാര്‍ഷികാവശ്യങ്ങള്‍ക്ക് നല്‍ക്കാലികളെ വളരെ വിരളമായേ ഉപയോഗിക്കുന്നുള്ളൂ. ഈ സംസ്ഥാനങ്ങളിലെ കാലി ചന്തകളില്‍ എന്ത് കച്ചവടമാണ് നടക്കുക. കാലികളുടെ അറവ് അവശിഷ്ടങ്ങള്‍ സംസ്‌കരിക്കപ്പെട്ട് എന്ത് മാത്രം ഉത്പന്നങ്ങള്‍ രാജ്യത്ത് ഉണ്ടാക്കുന്നുണ്ട്. ഫാര്‍മ മേഖലയിലെ ജലാറ്റിന്‍, വള നിര്‍മ്മാണ മേഖലയിലെ എല്ല് പൊടി, തുകല്‍ ഉത്പന്നങ്ങള്‍, എടക്ക, ചെണ്ട, ആര്‍. എസ്.എസുകാരുടെ ഡ്രില്ലില്‍ ഉപയോഗിക്കുന്ന ബാന്‍ഡ് അങ്ങിനെയെത്രയെത്ര. ഈ മേഖലയില്‍ ജോലി ചെയ്യുന്ന അനേകായിരങ്ങള്‍ ഇനി എന്തു ജോലിയാണ് ചെയ്യുക. തുകല്‍ സംസ്‌കരണത്തിനാവശ്യമായ തൊലിയുരിയല്‍ ഉള്‍പെടെയുള്ള ജോലികള്‍ താഴ്ന്ന വിഭാഗത്തില്‍പെട്ട ദലിതുകളാണ് ചെയ്തു വരുന്നത്. ബി.ജെ.പിക്കെതിരെ ശക്തമായി പ്രതികരിച്ചുവരുന്ന ദലിതരെ സാമ്പത്തികമായി തകര്‍ക്കുകയെന്ന ലക്ഷ്യംകൂടി മോദി സര്‍ക്കാറിനുണ്ട്.
ബി.ജെ.പി അധികാരമേറ്റത് മുതല്‍ ഉണ്ടാക്കിക്കൊണ്ടിരിക്കുന്ന നിയമങ്ങളിലെല്ലാം മുസ്‌ലിം വിരുദ്ധതയുണ്ട്. ഈ നിയമവും അതിനൊരപവാദമല്ല. മതപരമായ ബലി ആവശ്യങ്ങള്‍ക്കും എന്നൊരു പരാമര്‍ശം ഈ പരിഷ്‌കരണത്തിലുണ്ട്. നിലവിലുള്ള 1960 ലെ നിയമത്തില്‍ മതപരമായ ബലി കര്‍മ്മങ്ങള്‍ക്ക് യാതൊരു വിലക്കുമില്ല. പുതിയ നിയമം ബലി മൃഗങ്ങളെ കാലി ചന്തയില്‍ നിന്നും വാങ്ങുന്നത് മാത്രമാണോ വിലക്കിയതെന്നത് മദിരാശി ഹൈക്കോടതിയുടെ മധുരൈ ബഞ്ചില്‍ കേന്ദ്ര സര്‍ക്കാര്‍ അഭിഭാഷകന്‍ സമര്‍പ്പിക്കാനിരിക്കുന്ന സത്യവാങ്മൂലത്തിലൂടെയേ അറിയാന്‍ കഴിയൂ. മാംസാഹാരത്തിന് അമിത പ്രാധാന്യം ഇസ്‌ലാം കൊടുത്തിട്ടില്ല. പ്രവാചകന്‍ പോലും ആഘോഷ വേളകളിലും അതിഥി സല്‍ക്കാരങ്ങളിലുമാണ് മാംസാഹാരം വിളമ്പാന്‍ ആഗ്രഹിച്ചിരുന്നതെന്ന് ഹദീസുകളിലുണ്ട്. (മാംസാഹാരം പരിമിതമായി ഉപയോഗിക്കേണ്ടതാണെന്ന സന്ദേശം ഇതിലുണ്ട്). എന്നാല്‍ ലോകത്തെ ഇതര മത സമൂഹങ്ങള്‍ നിത്യേന തന്നെ മാംസ്യത്തിന്റെ ഉപഭോക്താക്കളാണ്. ഇന്ത്യയിലെ പ്രാചീന മതങ്ങളും ജാതികളും മതപരമായി തന്നെ മാംസ്യാഹാരം ഭുജിക്കുന്നവരാണെന്നതിന് വേദങ്ങളില്‍ തന്നെ തെളിവുകളുണ്ട്.
ഇന്ത്യയിലെ ബീഫ് കയറ്റുമതിക്കാര്‍ ബി.ജെ.പി അനുകൂലികളാണ്. അല്‍ കബീര്‍ എക്‌സ്‌പോര്‍ട്‌സ് ഉടമ സതീഷ് സബര്‍വാളിന് 650 കോടിയുടെ വ്യാപാരം നടത്തുന്ന ബീഫ് കയറ്റുമതി കമ്പനിയാണുള്ളത്. തെലുങ്കാനയില്‍ 400 ഏക്കറിലധികം വിസ്തൃതിയുള്ള അറവു ശാലയുണ്ട് സബര്‍വാളിന്. അല്‍ ആനം അഗ്രോ ഫുഡ്‌സ് ഉടമ സംഗീത് സോം ബി.ജെ.പി എം.എല്‍.എയാണ്. ഹലാല്‍ എക്‌സ്‌പോര്‍ട്‌സ് കമ്പനിയും അല്‍ ദുവാ ഫുഡ്‌സും സോമിന്റേത് തന്നെ. അല്‍ നൂര്‍ എക്‌സ്‌പോട്ടേഴ്‌സ് ഉടമ സൂദും ഭാര്യ പ്രിയാ സൂദും. എ.ഒ.പി എക്‌സ് പോര്‍ടേഴ്‌സ് ഉടമ ഒ.പി അറോറയാണ്. സ്റ്റാന്‍ഡേര്‍ഡ് ഫ്രോ സണ്‍ ഫുഡ്‌സ് ഉടമ കമല്‍ വര്‍മ്മയാണ്.
കന്നുകാലി വ്യാപാര നിരോധനത്തിന് പിറകിലെ കോര്‍പറേറ്റ് മൂലധന താല്‍പര്യങ്ങള്‍ മനസ്സിലാക്കുമ്പോഴാണ് സംഘ്പരിവാര്‍ അജണ്ടയുടെ യഥാര്‍ത്ഥ ലക്ഷ്യം മനസ്സിലാവുക. കോടിക്കണക്കിന് ഇന്ത്യക്കാരുടെ ഉപജീവനമാണ് കാലി വളര്‍ത്തലും കാലി കൈമാറ്റവും. ഇവ നിയന്ത്രിക്കുക വഴി ഈ മേഖലയിലുള്ളവര്‍ പിന്മാറാന്‍ നിര്‍ബന്ധിതരാകും. പാലും ഇറച്ചിയും ചാണകവും കന്നുകാലി വളര്‍ത്തുന്നവരുടെ വരുമാന സാധ്യതയാണ്. വിവിധോദ്ദേശ്യങ്ങള്‍ക്കായി കര്‍ഷകര്‍ക്ക് അവയെ വില്‍ക്കേണ്ടി വരും. ആ അവകാശമാണ് ഇവിടെ നിയന്ത്രിക്കപ്പെടുന്നത്. അതുവഴി കന്നുകാലി വ്യാപാരവും വ്യവസായവും കുത്തകളിലേക്ക് കേന്ദ്രീകരിക്കപ്പെടും.

kerala

സംസ്ഥാനത്ത് ചൂട് കൂടും; പത്തു ജില്ലകളിൽ യെല്ലോ അലർട്ട്

Published

on

സംസ്ഥാനത്ത് വരുംദിവസങ്ങളില്‍ ചൂട് കൂടുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. പത്തു ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു.

ബുധന്‍ മുതല്‍ ശനി വരെ ദിവസങ്ങളില്‍ തൃശൂര്‍ ജില്ലയില്‍ ഉയര്‍ന്ന താപനില 40 ഡിഗ്രി സെല്‍ഷ്യസ് വരെയും കൊല്ലം, പാലക്കാട് ജില്ലകളില്‍ ഉയര്‍ന്ന താപനില 39 ഡിഗ്രി സെല്‍ഷ്യസ് വരെയും പത്തനംതിട്ട ജില്ലയില്‍ ഉയര്‍ന്ന താപനില 38 ഡിഗ്രി സെല്‍ഷ്യസ് വരെയും കോട്ടയം, എറണാകുളം, കണ്ണൂര്‍ ജില്ലകളില്‍ ഉയര്‍ന്ന താപനില 37 ഡിഗ്രി സെല്‍ഷ്യസ് വരെയും ആലപ്പുഴ, മലപ്പുറം, കാസര്‍കോട് ജില്ലകളില്‍ ഉയര്‍ന്ന താപനില 36 ഡിഗ്രി സെല്‍ഷ്യസ് വരെയും (സാധാരണയെക്കാള്‍ 2-4 ഡിഗ്രി സെല്‍ഷ്യസ് കൂടുതല്‍) ഉയരാന്‍ സാധ്യതയുണ്ട്.

ഉയര്‍ന്ന താപനിലയും ഈര്‍പ്പമുള്ള വായുവും കാരണം ഈ ജില്ലകളില്‍, മലയോര മേഖലകളിലൊഴികെ 2024 മാര്‍ച്ച് 26 മുതല്‍ 30 വരെ ചൂടും അസ്വസ്ഥതയുമുള്ള കാലാവസ്ഥക്ക് സാധ്യതയുണ്ട്.

 

Continue Reading

Health

ജാഗ്രത വേണമെന്ന് ആരോഗ്യവകുപ്പ് വേനല്‍ കനത്തതോടെ ചിക്കന്‍ പോക്‌സ് പടരുന്നു

സ്വയം ചികിത്സ പാടില്ല. രോഗ ലക്ഷണങ്ങള്‍ ശ്രദ്ധയില്‍പ്പെട്ടാല്‍ എത്രയും വേഗം ചികിത്സ തേടണം.

Published

on

തിരുവനന്തപുരം: സംസ്ഥാനത്ത് ചൂട് തുടരുന്ന സാഹചര്യത്തില്‍ ചിക്കന്‍ പോക്സിനെതിരെ ജാഗ്രത പാലിക്കണമെന്ന് ആരോഗ്യ വകുപ്പ്. സ്വയം ചികിത്സ പാടില്ല. രോഗ ലക്ഷണങ്ങള്‍ ശ്രദ്ധയില്‍പ്പെട്ടാല്‍ എത്രയും വേഗം ചികിത്സ തേടണം. ശിശുക്കള്‍, കൗമാരപ്രായക്കാര്‍, മുതിര്‍ന്നവര്‍, ഗര്‍ഭിണികള്‍, പ്രതിരോധശേഷി കുറഞ്ഞവര്‍, കാന്‍സര്‍ ബാധിതര്‍, അവയവമാറ്റ ശസ്ത്രക്രിയ കഴിഞ്ഞവര്‍, കീമോതെറാപ്പി, സ്റ്റീറോയിഡ് മരുന്നുകള്‍ ഉപയോഗിക്കുന്നവര്‍, ദീര്‍ഘകാലമായി ശ്വാസകോശ/ ത്വക്ക് രോഗമുള്ളവര്‍ എന്നിവര്‍ക്ക് രോഗം ഗുരുതരമാകാന്‍ സാധ്യതയുള്ളതിനാല്‍ പ്രത്യേകം ശ്രദ്ധിക്കണം.

എന്താണ് ചിക്കന്‍ പോക്സ്

വേരിസെല്ലാ സോസ്റ്റര്‍ എന്ന വൈറസ് മൂലമുളള പകര്‍ച്ചവ്യാധിയാണ് ചിക്കന്‍ പോക്സ്. ഇതുവരെ ചിക്കന്‍ പോക്സ് വരാത്തവര്‍ക്കോ, വാക്സിന്‍ എടുക്കാത്തവര്‍ക്കോ ഈ രോഗം വരാന്‍ സാധ്യതയുണ്ട്.
രോഗപ്പകര്‍ച്ച

ചിക്കന്‍ പോക്സ്, ഹെര്‍പ്പിസ് സോസ്റ്റര്‍ രോഗമുളളവരുമായി അടുത്ത സമ്പര്‍ക്കത്തിലൂടെയും കുമിളകളിലെ സ്രവങ്ങളിലൂടെയും ചുമ, തുമ്മല്‍ എന്നിവയിലൂടെയുള്ള കണങ്ങള്‍ ശ്വസിക്കുന്നത് വഴിയും ചിക്കന്‍ പോക്സ് ബാധിക്കാം. ശരീരത്തില്‍ കുമിളകള്‍ പൊന്തി തുടങ്ങുന്നതിന് രണ്ട് ദിവസം മുന്‍പ് മുതല്‍ അവ ഉണങ്ങുന്നതു വരെ രോഗം പകരാം. 10 മുതല്‍ 21 ദിവസം വരെ രോഗലക്ഷണങ്ങള്‍ പ്രകടമാകും.

രോഗ ലക്ഷണങ്ങള്‍

പനി, ക്ഷീണം, ശരീരവേദന, വിശപ്പില്ലായ്മ, തലവേദന, ശരീരത്തില്‍ കുമിളകള്‍ എന്നിവയാണ് രോഗ ലക്ഷണങ്ങള്‍. മുഖം, ഉദരഭാഗം, നെഞ്ച്, പുറം, കൈകാലുകള്‍ എന്നിവിടങ്ങളില്‍ തടിപ്പുകളായി ആരംഭിച്ച് പിന്നീട് വെള്ളം കെട്ടിനില്‍ക്കുന്ന കുമിളകള്‍ വന്ന് നാലു മുതല്‍ ഏഴ് ദിവസത്തിനുള്ളില്‍ അവ പൊട്ടുകയോ ഉണങ്ങുകയോ ചെയ്യും.

കൂടുതല്‍ ശ്രദ്ധിക്കേണ്ടത്

4 ദിവസത്തില്‍ കൂടുതലുളള പനി, കഠിനമായ പനി, കുമിളകളില്‍ കഠിനമായ വേദന/ പഴുപ്പ്, അമിതമായ ഉറക്കം, ആശയകുഴപ്പം, സംഭ്രമാവസ്ഥ, നടക്കാനുള്ള ബുദ്ധിമുട്ട്, കഴുത്ത് വേദന, അടിക്കടിയുളള ഛര്‍ദ്ദില്‍, ശ്വാസംമുട്ട്, കഠിനമായ ചുമ, കഠിനമായ വയറുവേദന, രക്തസ്രാവം എന്നീ രോഗ ലക്ഷണങ്ങള്‍ കാണുന്നെങ്കില്‍ വളരെ ശ്രദ്ധിക്കണം. ഇവ ചിക്കന്‍ പോക്സിന്റെ സങ്കീര്‍ണതകളായ ന്യുമോണിയ, മസ്തിഷ്‌കജ്വരം, കരള്‍ വീക്കം, സെപ്സിസ് തുടങ്ങിയവയുടെ ലക്ഷണങ്ങളായതിനാല്‍ എത്രയും വേഗം ചികിത്സ തേടേണ്ടതാണ്.

രോഗം വന്നാല്‍ ശ്രദ്ധിക്കേണ്ടവ

വായു സഞ്ചാരമുളള മുറിയില്‍ പരിപൂര്‍ണമായി വിശ്രമിക്കുക. ധാരാളം വെളളം കുടിക്കുക. പഴവര്‍ഗങ്ങള്‍ കഴിക്കുക. മറ്റുളളവരുമായി നേരിട്ടുള്ള സമ്പര്‍ക്കം ഒഴിവാക്കുക. രോഗി ഉപയോഗിച്ച വസ്ത്രങ്ങളും മറ്റ് വസ്തുക്കളും മറ്റുളളവരുമായി പങ്കിടരുത്. അവ ബ്ലീച്ചിംഗ് ലായനി പോലുള്ള അണുനാശിനി ഉപയോഗിച്ച് അണുവിമുക്തമാക്കുക. ചൊറിച്ചിലുള്ള ഭാഗത്ത് കലാമിന്‍ ലോഷന്‍ പുരട്ടുക. ശരീരം മൃദുവായ നനഞ്ഞ തുണി കൊണ്ട് ഇടയ്ക്കിടെ ഒപ്പിയെടുക്കുക.ചിക്കന്‍ പോക്സ് ചികിത്സയിലാണെങ്കിലും സ്ഥിരമായി ഉപയോഗിച്ചു കൊണ്ടിരിക്കുന്ന മരുന്നുകള്‍ ഒന്നും തന്നെ നിര്‍ത്തരുത്.

Continue Reading

kerala

കടലിനും പൊള്ളുന്നു: മീൻ കിട്ടാതെ മത്സ്യത്തൊഴിലാളികൾ

കടലിൽ ചൂട് കൂടുന്നതിനാൽ മീനുകൾ മുകൾത്തട്ടിലേക്ക് വരുന്നില്ലെന്ന് മത്സ്യത്തൊഴിലാളികൾ പറയുന്നു.

Published

on

ചൂട് കൂടിയതോടെ കടലിൽ മത്സ്യലഭ്യത ഗണ്യമായി കുറഞ്ഞത് മത്സ്യ ത്തൊഴിലാളികളെ പ്രതിസന്ധിയിലാക്കുന്നു. വല നിറയെ മീനുമായി മടങ്ങാമെന്ന പ്രതീക്ഷയിൽ മത്സ്യബന്ധന ബോട്ടുകളുമായി കടലിലിറങ്ങുന്ന മത്സ്യത്തൊഴിലാളികൾക്ക് കഴിഞ്ഞ രണ്ട് മാസമായി വറുതിയുടെ കാലമാണ്.

കടലിൽ ചൂട് കൂടുന്നതിനാൽ മീനുകൾ മുകൾത്തട്ടിലേക്ക് വരുന്നില്ലെന്ന് മത്സ്യത്തൊഴിലാളികൾ പറയുന്നു. ചൂട് കൂടിയതനുസരിച്ച് കടലിനോട് ചേർന്നുള്ള പുഴകളിലും കനാലുകളിലും വെള്ളത്തിന് അമിത ചൂടായതോടെ പുഴയിലും മത്സ്യലഭ്യത കുറഞ്ഞു.

മത്സ്യലഭ്യത കുറഞ്ഞതോടെ തമിഴ്‌നാട്, കർണാടക സംസ്ഥാനങ്ങളിൽ നിന്നാണ് പ്രധാനമായും കേരളത്തിലേക്ക് മീനുകളെത്തിക്കുന്നത്. പൊന്നാനി, താനൂർ ഭാഗങ്ങളിൽ നിന്ന് മത്സ്യബന്ധനത്തിന് പോകുന്നവർക്ക് അയല, മത്തി, മാന്തൾ, ചെറിയ ചെമ്മീൻ എന്നിവയാണ് കുറച്ച് ദിവസങ്ങളായി ലഭിക്കുന്നത്.

30 കിലോ അയലയ്ക്ക് 4,500രൂപ, മത്തി 4,000, ചെറിയ ചെമ്മീൻ 2,400, മാന്തൾ, 6,000 എന്നിങ്ങനെയാണ് മൊത്തവില. നെയ്‌മീൻ, കരിമീൻ, അയക്കൂറ, ചൂര എന്നിവ വിരളമായേ ലഭിക്കുന്നുള്ളൂ. റംസാൻ മാസമായതോടെ മീൻ വാങ്ങുന്നവരുടെ എണ്ണത്തിലും കുറവ് വന്നിട്ടുണ്ട്.

നാല് ദിവസം കടലിൽ പോകുന്നതിനായി ഒരു വലിയ ബോട്ടിന് 2,000 ലിറ്റർ ഡീസലാണ് ആവശ്യം. തൊഴിലാളികൾക്ക് കൂലിയും നൽകണം. ഇത്രയും തുക മുടക്കി കടലിൽ പോകുമ്പോൾ മതിയായ മത്സ്യം ലഭിക്കാത്തത് കനത്ത നഷ്ടമാണ് മത്സ്യത്തൊഴിലാളികൾക്ക് വരുത്തുന്നത്.പല ദിവസങ്ങളിലും ഡീസൽ തുക പോലും ലഭിക്കാറില്ല.

പിടിച്ചുനിൽക്കാൻ പ്രയാസപ്പെട്ടതോടെ ബോട്ടുകൾ കിട്ടുന്ന വിലയ്ക്ക് വിറ്റ് മറ്റ് തൊഴിൽ തേടി പോകുന്നവരും പൊളിക്കാൻ കൊടുക്കുന്നവരും ഏറെയാണ്. ബോട്ടുകളിൽ വലിയൊരു വിഭാഗവും അന്യ സംസ്ഥാന തൊഴിലാളികളാണ്. മത്സ്യലഭ്യതക്കുറവ് മൂലം പലരും നാട്ടിൽപോയി. നിലവിൽ 220 മത്സ്യബന്ധന ബോട്ടുകളാണ് പൊന്നാനി മേഖലയിലുള്ളത്.

Continue Reading

Trending