മുംബൈ: സമൂഹ മാധ്യമങ്ങളിലൂടെ അശ്ലീല വിഡിയോ കാട്ടി 14കാരിയെ ഭീഷണിപ്പെടുത്തിയ സംഭവത്തില്‍ സഹപാഠിയായ 13കാരനെതിരെ കേസ്. മുംബൈയിലെ പടിഞ്ഞാറന്‍ പ്രദേശത്താണ് സംഭവം.

ലോക്ഡൗണ്‍ സമയത്ത് പെണ്‍കുട്ടിയുമായി 13കാരന്‍ സമൂഹമാധ്യമങ്ങളിലൂടെ പരിചയപ്പെടുകയായിരുന്നു. 13കാരന്‍ യഥാര്‍ത്ഥ വിവരങ്ങള്‍ വെളിപ്പെടുത്തിയിരുന്നില്ല. രണ്ടുപേരും തമ്മില്‍ ചാറ്റിങ് ആരംഭിക്കുകയും സുഹൃത്തുക്കളാകുകയും ചെയ്തു.

ലോക്ഡൗണ്‍ സമയത്ത് ഇരുവരും ട്രൂത്ത് ഓര്‍ ഡെയര്‍ ഗെയിം കളിക്കാന്‍ ആരംഭിച്ചു. വിഡിയോ കോളിലൂടെ പെണ്‍കുട്ടിയോട് ഡെയര്‍ (ധൈര്യം) ആവശ്യപ്പെട്ടശേഷം 13കാരന്‍ സ്‌ക്രീന്‍ റെക്കോര്‍ഡ് ചെയ്യുകയായിരുന്നു. 13കാരന് സ്മാര്‍ട്ട് ഫോണ്‍ നന്നായി കൈകാര്യം ചെയ്യാന്‍ അറിയാമായിരുന്നുവെന്നും പൊലീസ് പറഞ്ഞു.

വിഡിയോ കോളിന് ശേഷം പെണ്‍കുട്ടിയെ ഭീഷണിപ്പെടുത്താന്‍ ആരംഭിച്ചു. 13കാരന്റെ ആവശ്യങ്ങള്‍ അംഗീകരിച്ചില്ലെങ്കില്‍ വിഡിയോ സമൂഹ മാധ്യമങ്ങളിലൂടെ പ്രചരിപ്പിക്കുമെന്നായിരുന്നു ഭീഷണി. തുടര്‍ന്ന് പെണ്‍കുട്ടി ഇന്‍സ്റ്റഗ്രാമില്‍ 13കാരനെ ബ്ലോക്ക് ചെയ്തു. ഇതോടെ പെണ്‍കുട്ടിയുടെ സുഹൃത്തിന് വിഡിയോ അയച്ചു നല്‍കി. എന്നാല്‍ സുഹൃത്ത് 13കാരനെ ബ്ലോക്ക് ചെയ്യുകയും പെണ്‍കുട്ടിയെ വിവരം അറിയിക്കുകയും ചെയ്തു. ഇതോടെ 14കാരി പൊലീസില്‍ പരാതി നല്‍കുകയായിരുന്നു.

ഐ.പി വിലാസം തെരഞ്ഞെത്തിയതോടെ പെണ്‍കുട്ടിയുടെ അതേ തെരുവിലാണ് താമസമെന്നും സ്‌കൂളില്‍ ഒരുമിച്ച് പഠിക്കുന്ന 13കാരനാണ് പിന്നിലെന്നും കണ്ടെത്തുകയായിരുന്നു. ലോക്ഡൗണ്‍ സമയത്ത് കുട്ടി കൂടുതല്‍ സമയം മുറിയില്‍ ചെലവഴിച്ചിരുന്നതായി 13കാരന്റെ മാതാപിതാക്കള്‍ പറഞ്ഞു.

13കാരനെതിരായ ആദ്യ കുറ്റമായതിനാലും പ്രായപൂര്‍ത്തിയാകാത്തതിനാലും പൊലീസ് നോട്ടീസ് അയച്ചു. കുറ്റപത്രം സമര്‍പ്പിക്കുന്ന സമയത്ത് കുട്ടികളുടെ കോടതിയില്‍ ഹാജരാകാന്‍ നിര്‍ദേശം നല്‍കുകയും ചെയ്തു.