മലപ്പുറം: സംസ്ഥാന സ്കൂൾ കലോത്സവത്തിൽ ഓട്ടൻതുള്ളൽ ഹയർസെക്കൻഡറി വിഭാഗത്തിൽ എ ഗ്രേഡ് നേടി മലപ്പുറം മേലാറ്റൂർ ആർ.എം.എച്ച്.എസ്.എസ് ഒൻപതാം ക്ലാസ് വിദ്യാർത്ഥിനിയായ വൈശാഖി അശോക് ശ്രദ്ധേയയായി.

മലപ്പുറം സൈബർ പോലീസ് സ്റ്റേഷനിലെ ഉദ്യോഗസ്ഥനായ അശോക് കുമാറിന്റെയും കരുവാരകുണ്ട് ഗവ. എൽ.പി സ്കൂൾ അധ്യാപിക ശ്രീജയുടെയും മകളാണ് വൈശാഖി. രണ്ടാം ക്ലാസ് വിദ്യാർത്ഥിയായ വരദ് കൃഷ്ണയാണ് സഹോദരൻ.

കലാമണ്ഡലത്തിലെ പ്രശസ്ത ഗുരുവായ ശരത് ലാലിന്റെ ശിക്ഷണത്തിലാണ് വൈശാഖി ഓട്ടൻതുള്ളൽ അഭ്യസിക്കുന്നത്. കഴിഞ്ഞ വർഷം സംസ്ഥാന കലോത്സവത്തിൽ സംസ്കൃത നാടകത്തിൽ പങ്കെടുത്ത് എ ഗ്രേഡ് നേടിയതോടെയാണ് കലോത്സവ വേദിയിൽ വൈശാഖി തന്റെ കഴിവ് വീണ്ടും തെളിയിച്ചത്.

കണ്ണൂർ: സംസ്ഥാന സ്കൂൾ കലോത്സവത്തിൽ വീണ വാദനത്തിൽ ഹയർ സെക്കൻഡറി സ്കൂൾ വിഭാഗത്തിൽ എ ഗ്രേഡ് നേടി കണ്ണൂർ കൂടാളി എച്ച്എസ്എസിലെ പത്താം ക്ലാസ് വിദ്യാർത്ഥിനിയായ അരുന്ധതി എസ് ശ്രദ്ധേയയായി. കഴിഞ്ഞ വർഷത്തെ സംസ്ഥാന കലോത്സവത്തിലും അരുന്ധതി എ ഗ്രേഡ് നേടിയിരുന്നു.

കോഴിക്കോട് സ്വദേശി ശ്രീജു ശ്രീനിവാസിന്റെ പരിശീലനത്തിലാണ് അരുന്ധതി വീണ വായന അഭ്യസിച്ചത്. നാല് വർഷമായി വീണയിൽ സ്ഥിരമായ പരിശീലനം തുടരുകയാണ്.

കണ്ണൂർ മട്ടന്നൂർ തെരുർ സ്വദേശിയായ പോലീസ് ഉദ്യോഗസ്ഥൻ സജിഷിന്റെയും ഹൈസ്കൂൾ അധ്യാപിക ഷെല്ലിയുടെയും മകളാണ് അരുന്ധതി എസ്. സംഗീത രംഗത്ത് തുടർച്ചയായി നേട്ടങ്ങൾ സ്വന്തമാക്കി മുന്നേറുന്ന ഈ മിടുക്കി വിദ്യാർത്ഥിനി കലോത്സവ വേദിയിൽ വീണ്ടും തന്റെ കഴിവ് തെളിയിക്കുകയായിരുന്നു.

കൊച്ചി: ബിഗ് സ്‌ക്രീനിലൂടെ പ്രേക്ഷകരുടെ ശ്രദ്ധ നേടിയ കുഞ്ഞ് താരം മീതിക വെനേഷ് സംസ്ഥാന സ്‌കൂള്‍ കലോത്സവ വേദിയിലും മികച്ച പ്രകടനം കാഴ്ചവെച്ചു. എറണാകുളം ചെറായി എസ്.എം.എച്ച്.എസ്.എസ് സ്‌കൂള്‍ വിദ്യാര്‍ത്ഥിനിയും ഊലിക്കരചെറായി സ്വദേശികളായ വെനേഷിന്റെയും ലൈബയുടെയും മകളുമായ മീതിക വെനേഷ് ആണ് ഈ മിടുക്കി.

എറണാകുളം ജില്ലയില്‍ നിന്നായി 64-ാം സംസ്ഥാന സ്‌കൂള്‍ കലോത്സവത്തില്‍ ഹയര്‍ സെക്കന്‍ഡറി വിഭാഗത്തില്‍ എസ്.എം.എച്ച്.എസ്.എസ് സ്‌കൂളിനെ പ്രതിനിധീകരിച്ച് പങ്കെടുത്ത മീതിക മിമിക്രിയില്‍ എ ഗ്രേഡ് നേടി. നാഗസാരംഗി സിനിമയിലെ നടി ഷീല, കാര്‍ട്ടൂണ്‍ കഥാപാത്രമായ ഡോറ ബുജി, സാമുദായിക നേതാവ് വെള്ളാപ്പള്ളി നടേശന്‍ എന്നിവരുടെ ശബ്ദങ്ങള്‍ക്കൊപ്പം പ്രകൃതിയിലെ വിവിധ ശബ്ദങ്ങള്‍, ഡിജെ എഫക്റ്റുകള്‍, മമ്മി റിട്ടേണ്‍സ് സിനിമ ട്രെയ്ലര്‍ എന്നിവയും ഉള്‍പ്പെടുത്തി ആയിരുന്നു മീതികയുടെ അവതരണം.

പത്താം ക്ലാസ് വരെ സിബിഎസ്ഇയില്‍ പഠിച്ചിരുന്ന മീതിക കഴിഞ്ഞ വര്‍ഷം കഥകളിയിലും മിമിക്രിയിലും സംസ്ഥാന കലോത്സവത്തില്‍ എ ഗ്രേഡ് നേടിയിരുന്നു. നാലര വയസുമുതല്‍ ഭരതനാട്യം, കേരളനടനം, കുച്ചുപ്പുടി തുടങ്ങിയ നൃത്തശൈലികളില്‍ പരിശീലനം നേടിയിട്ടുള്ള മീതിക കഴിഞ്ഞ രണ്ട് വര്‍ഷമായി കഥകളിയും അഭ്യസിച്ചു വരികയാണ്.

കുട്ടിക്കാലം മുതലേ മിമിക്രി, മോണോ ആക്ട്, ക്ലാസിക്കല്‍ ഡാന്‍സ് എന്നിവയില്‍ നിരവധി സമ്മാനങ്ങള്‍ സ്വന്തമാക്കിയ മീതിക ചാനല്‍ പരിപാടിയായ കോമഡി ഉത്സവം എന്നിവയില്‍ പങ്കെടുത്തിട്ടുണ്ട്. ബാലനടിയായി തണ്ടര്‍ ബോയ്‌സ് എന്ന സിനിമയിലും അഭിനയിച്ചു. നിലവില്‍ അളിയന്‍സ് എന്ന സീരിയലിലും ബെറ്റര്‍ സിക്‌സ് എന്ന സിനിമയിലും അഭിനയിക്കാന്‍ അവസരം ലഭിച്ചിരിക്കുകയാണ്.

സംസ്ഥാന കലോത്സവത്തില്‍ കഥകളിയില്‍ ‘കീചകവധം’ എന്ന ആട്ടമാണ് മീതിക അവതരിപ്പിച്ചത്.