അസമില്‍ വാഹനം ഇടിച്ചതുമായി ബന്ധപ്പെട്ട തര്‍ക്കം സംഘര്‍ഷത്തിലേക്ക് കലാശിച്ചതിനു പിന്നാലെ രണ്ട് മരണം. നാല് പേര്‍ക്ക് പരിക്കെന്നും റിപ്പോര്‍ട്ട്. ആദിവാസി വിഭാഗത്തിലുള്ളവരുടെ നേര്‍ക്ക് ബോഡോ വിഭാഗക്കാര്‍ വാഹനം ഓടിച്ച് കയറ്റിയതാണ് സംഘര്‍ഷങ്ങള്‍ക്ക് കാരണം. വാഹനാപകടത്തില്‍ പരിക്കേറ്റയാള്‍ ആശുപത്രിയില്‍ വെച്ച് മരണപ്പെട്ടിരുന്നു. കാര്‍ ഓടിച്ചിരുന്നയാളെ ആള്‍ക്കൂട്ടം തല്ലിക്കൊലപ്പെടുത്തിയതായാണ് വിവരം. ഇതാണ് കലാപത്തിലേക്ക് നയിച്ചതെന്ന് പൊലീസ് പറയുന്നു.

കൊക്രജാര്‍, ചിരാങ് ജിലകളിലാണ് സംഭവം. അക്രമികള്‍ കരിഗാവ് പോലീസ് ഔട്ട്‌പോസ്റ്റ് ഉപരോധികുകയും വീടുകളും ഓഫീസുകളും തീയിടുകയും ചെയ്തു. സംഘര്‍ഷം കലാപമായി മാറിയതോടെ രണ്ട് ജില്ലകളിലെയും മൊബൈല്‍ ഇന്റര്‍നെറ്റ് സേവനങ്ങള്‍ വിച്ഛേദിച്ചു. സുരക്ഷ സേനയും റാപ്പിഡ് ആക്ഷന്‍ ഫോഴ്സും പ്രദേശത്തിന്റെ നിയന്ത്രണം ഏറ്റെടുത്തതായും സ്ഥിതി നിയന്ത്രിതമെന്നും പൊലീസ് അറിയിച്ചു. നിലവില്‍ 19 പേരെ കസ്റ്റഡിയിലെടുത്തിട്ടുണ്ടെന്നും പൊലീസ് അറിയിച്ചു.

സംഭവത്തെ തുടര്‍ന്ന് ചൊവ്വാഴ്ച ബോഡോ വിഭാഗക്കാരും ആദിവാസി വിഭാഗക്കാരും നിരവധി വീടുകള്‍ക്ക് തീയിട്ടുവെന്നാണ് പൊലീസ് പറയുന്നത്.

നോയിഡ: നിർമാണത്തിനായി കുഴിച്ച കുഴിയിൽ കാർ വീണ് യുവാവ് മരിച്ച സംഭവത്തിൽ നിർമാണകമ്പനി ഉടമയെ പൊലീസ് അറസ്റ്റ് ചെയ്തു. വിഷ്ടൗൺ പ്ലാനേഴ്‌സ് പ്രൈവറ്റ് ലിമിറ്റഡ് സ്ഥാപന ഉടമകളിൽ ഒരാളായ അഭയ് കുമാറാണ് പിടിയിലായത്. കേസിലെ മറ്റൊരു ഉടമയായ മനീഷ് കുമാറിനായി ലുക്ക് ഔട്ട് നോട്ടീസ് പുറപ്പെടുവിച്ചിട്ടുണ്ട്. സംഭവത്തിൽ അന്വേഷണം നടത്താൻ പ്രത്യേക സംഘത്തെ നിയോഗിച്ചതായും പൊലീസ് അറിയിച്ചു. അതേസമയം, നോയിഡ അതോറിറ്റി സിഇഒ എം. ലോകേഷിനെ ചുമതലയിൽ നിന്ന് നീക്കം ചെയ്തിട്ടുണ്ട്.

ശനിയാഴ്ച പുലർച്ചെയായിരുന്നു അപകടം. കനത്ത മൂടൽമഞ്ഞിനെ തുടർന്ന് റോഡിൽ നിന്ന് തെന്നിമാറിയ യുവ സോഫ്റ്റ്‌വെയർ എൻജിനീയർ യുവരാജ് മേത്ത ഓടിച്ച ഗ്രാൻഡ് വിറ്റാര കാർ, വെള്ളം നിറഞ്ഞ് കിടക്കുന്ന ഏകദേശം 20 അടി താഴ്ചയുള്ള കുഴിയിലേക്ക് മറിയുകയായിരുന്നു. 2021-ൽ നിർമാണത്തിനായി കുഴിച്ച കുഴി വർഷങ്ങളായി മൂടാതെയും സുരക്ഷാ ക്രമീകരണങ്ങളില്ലാതെയും കിടക്കുകയായിരുന്നു.

നീന്തൽ അറിയാത്ത യുവരാജ് അപകടത്തിന് ശേഷം ഒന്നര മണിക്കൂറിലേറെ സമയം ജീവനോടെ ഉണ്ടായിരുന്നതായി വിവരം. അപകടം നടന്ന ഉടൻ തന്നെ യുവരാജ് അച്ഛനെ ഫോണിൽ വിളിച്ചിരുന്നുവെന്നും പറയുന്നു. കുടുംബാംഗങ്ങൾ സ്ഥലത്തെത്തി തിരച്ചിൽ നടത്തിയെങ്കിലും കനത്ത മൂടൽമഞ്ഞ് കാരണം കാർ കണ്ടെത്താൻ സാധിച്ചില്ല. പിന്നീട് പൊലീസ്, ഫയർഫോഴ്‌സ്, എസ്‌ഡിആർഎഫ് സംഘങ്ങൾ നടത്തിയ തെരച്ചിലിലാണ് മൃതദേഹം കണ്ടെത്തിയത്.

നിർമാണ കുഴിക്ക് ചുറ്റും ബാരിക്കേഡുകളോ അപകടസൂചനാ ബോർഡുകളോ ഇല്ലായിരുന്നുവെന്നും ആരോപണം ഉയർന്നു. റോഡിൽ നിന്ന് വെറും 10 അടി മാത്രം അകലെയായിരുന്നു ഈ അപകടക്കുഴി. ഈ മാസം ആദ്യം ഇതേ സ്ഥലത്ത് ട്രക്ക് ഡ്രൈവർ ഗുർവീന്ദർ സിംഗിന്റെ വാഹനവും അപകടത്തിൽപ്പെട്ടിരുന്നുവെങ്കിലും അന്ന് അദ്ദേഹം അത്ഭുതകരമായി രക്ഷപ്പെട്ടിരുന്നു.

യുവരാജിന്റെ പിതാവിന്റെ പരാതിയിൽ വിഷ്ടൗൺ പ്ലാനേഴ്‌സ്, ലോട്ടസ് ഗ്രീൻസ് എന്നീ കമ്പനികൾക്കെതിരെ എഫ്‌ഐആർ രജിസ്റ്റർ ചെയ്തു. സുരക്ഷാ മാനദണ്ഡങ്ങൾ പാലിക്കാതിരുന്നതിന് നോയിഡ അതോറിറ്റിയിലെ ഒരു ജൂനിയർ എൻജിനീയറെ പിരിച്ചുവിടുകയും മറ്റ് ഉദ്യോഗസ്ഥർക്ക് കാരണം കാണിക്കൽ നോട്ടീസ് നൽകുകയും ചെയ്തിട്ടുണ്ട്.

ബംഗളൂരു: ഡി.ജി.പി കെ. രാമചന്ദ്ര റാവുവിന്റെ അശ്ലീല വിഡിയോ വൈറലായ സംഭവത്തിൽ അദ്ദേഹത്തെ സസ്‌പെൻഡ് ചെയ്തതിന് പിന്നാലെ പിരിച്ചുവിടൽ വരെ നടപടിയുണ്ടാകാമെന്ന് സൂചന നൽകി കർണാടക ആഭ്യന്തരമന്ത്രി ജി. പരമേശ്വര. സംഭവത്തിൽ വിശദമായ അന്വേഷണത്തിന് ഉത്തരവിട്ടിട്ടുണ്ടെന്നും, അന്വേഷണ റിപ്പോർട്ടിന്റെ അടിസ്ഥാനത്തിലായിരിക്കും തുടർനടപടികളെന്നും മന്ത്രി വ്യക്തമാക്കി.

സർക്കാർ ജീവനക്കാരന് അനുയോജ്യമല്ലാത്ത പെരുമാറ്റവും സർവിസ് ചട്ടങ്ങൾ ലംഘിച്ചതുമാണ് സസ്‌പെൻഷന് കാരണമായതെന്ന് മന്ത്രി പറഞ്ഞു. വിഷയത്തിന്റെ ഗൗരവം കണക്കിലെടുത്ത് അടിയന്തര നടപടിയായാണ് സസ്‌പെൻഷൻ അനിവാര്യമായതെന്നും അദ്ദേഹം മാധ്യമങ്ങളോട് വിശദീകരിച്ചു.

‘അദ്ദേഹത്തെ സസ്‌പെൻഡ് ചെയ്തു. അന്വേഷണം പുരോഗമിക്കുകയാണ്. റിപ്പോർട്ട് ലഭിച്ച ശേഷം അതനുസരിച്ച് അടുത്ത നടപടി സ്വീകരിക്കും’ – മന്ത്രി പറഞ്ഞു. സസ്‌പെൻഡ് ചെയ്യപ്പെട്ട ഉദ്യോഗസ്ഥൻ തന്നെ കാണാൻ ശ്രമിച്ചതായി റിപ്പോർട്ടുകൾ വന്നതിനെക്കുറിച്ച് പ്രതികരിച്ച പരമേശ്വര, താൻ വിഷയത്തിൽ ഒരുതരത്തിലും ഇടപെടില്ലെന്നും ഇത്തരമൊരു സാഹചര്യത്തിൽ ജാഗ്രത പാലിക്കേണ്ടതുണ്ടെന്നും വ്യക്തമാക്കി.

ഉദ്യോഗസ്ഥനെ അറസ്റ്റ് ചെയ്യണമെന്ന ബിജെപിയുടെ ആവശ്യത്തെക്കുറിച്ച് ചോദിച്ചപ്പോൾ, റാവുവിന് സീനിയോറിറ്റി ഉണ്ടായിരുന്നിട്ടും സർക്കാർ നടപടിയെടുക്കുന്നതിൽ മടിച്ചില്ലെന്നും, ആവശ്യമായാൽ പിരിച്ചുവിടൽ വരെ ഉണ്ടാകാമെന്നും മന്ത്രി സൂചിപ്പിച്ചു. ഈ സംഭവം പൊലീസിനും മറ്റു വകുപ്പുകൾക്കും നാണക്കേടുണ്ടാക്കിയതായും അദ്ദേഹം കൂട്ടിച്ചേർത്തു.

അതേസമയം, തനിക്കെതിരായ വിഡിയോ കെട്ടിച്ചമച്ചതും വ്യാജവുമാണെന്ന് ഡി.ജി.പി കെ. രാമചന്ദ്ര റാവു പ്രതികരിച്ചു.