വയനാട്ടില്‍ വിജയത്തിലേക്ക് രാഹുല്‍ ഗാന്ധി. നിലവില്‍ രാഹുല്‍ ഗാന്ധിയുടെ ലീഡ് 98000 പിന്നിട്ടു. സിപിഐയിലെ ആനി രാജയാണ് ഇവിടെ ഇടതുമുന്നണി സ്ഥാനാര്‍ത്ഥി. ബിജെപി സംസ്ഥാന പ്രസിഡന്റ് കെ. സുരേന്ദ്രനാണ് എന്‍ഡിഎയ്ക്ക് വേണ്ടി മത്സരിച്ചത്. ഉത്തര്‍പ്രദേശിലെ റായ്ബറേലി ലോക്‌സഭാ മണ്ഡലത്തിലും രാഹുല്‍ ഗാന്ധി മുന്നിലാണ്.

ലോക്സഭാ തെരഞ്ഞെടുപ്പിന്റെ വോട്ടെണ്ണല്‍ ഒന്നര മണിക്കൂര്‍ പിന്നിടുമ്പോള്‍ സുപ്രധാന മണ്ഡലങ്ങളിലൊന്നായ യു.പിയിലെ റായ്ബറേലിയില്‍ കോണ്‍ഗ്രസ് സ്ഥാനാര്‍ഥി രാഹുല്‍ ഗാന്ധി മുന്നില്‍. ബിജെപിയുടെ ദിനേശ് പ്രതാപ് സിങ്ങാണ് പിന്നില്‍. അതേസമയം, രാഹുല്‍ മത്സരിക്കുന്ന മറ്റൊരു മണ്ഡലമായ വയനാട്ടിലും അദ്ദേഹം മുന്നിലാണ്. എല്‍ഡിഎഫിന്റെ ആനി രാജയാണ് രണ്ടാമത്.

അമേഠിയില്‍ ബിജെപി സ്ഥാനാര്‍ഥി സ്മൃതി ഇറാനി പിന്നിലാണ്. ഇവിടെ കോണ്‍ഗ്രസ് സ്ഥാനാര്‍ഥി കിഷോരി ലാല്‍ ശര്‍മയാണ് മുന്നില്‍. കനൗജില്‍ എസ്.പി അധ്യക്ഷന്‍ അഖിലേഷ് യാദവും ഗുജറാത്തിലെ ഗാന്ധിനഗറില്‍ കേന്ദ്ര ആഭ്യന്തര മന്ത്രി അമിത് ഷായും മുന്നിലാണ്.

ഹരിയാനയിലെ കര്‍ണാല്‍ മണ്ഡലത്തില്‍ മുന്‍ മുഖ്യമന്ത്രിയും ബിജെപി നേതാവുമായ മനോഹര്‍ലാല്‍ ഖട്ടര്‍ പിന്നിലാണ്. ഇവിടെ കോണ്‍ഗ്രസ് സ്ഥാനാര്‍ഥിയും ഹരിയാന യൂത്ത് കോണ്‍ഗ്രസ് മുന്‍ അധ്യക്ഷനുമായ ദിവ്യാന്‍ഷു ബുദ്ധിരാജയാണ് ലീഡ് ചെയ്യുന്നത്.

കഴിഞ്ഞ തവണ രാഹുല്‍ ഗാന്ധി പരാജയപ്പെട്ട അമേഠിയില്‍ കോണ്‍ഗ്രസ് ലീഡ് ചെയ്യുന്നു. സിറ്റിങ് എം.പിയായ കേന്ദ്രമന്ത്രി സ്മൃതി ഇറാനി പിന്നിലാണ്. കോണ്‍ഗ്രസിന്റെ കിഷോരി ലാല്‍ ശര്‍മയാണ് ഇവിടെ ലീഡ് ചെയ്യുന്നത്. റായ്ബറേലിയിലും വയനാട്ടിലും രാഹുല്‍ ഗാന്ധി ലീഡ് ചെയ്യുകയാണ്.

ഉത്തര്‍പ്രദേശില്‍ ഇന്ത്യ സഖ്യം വന്‍ മുന്നേറ്റമാണ് നടക്കുന്നത്. പ്രധാനമന്ത്രി നരേന്ദ്ര മോദി അടക്കം പിന്നിലാണ്. ആറായിരത്തിലധികം വോട്ടിനാണ് മോദി യു.പി പി.സി.സി അധ്യക്ഷനായ അജയ് റായിയോട് പിന്നിട്ടുനില്‍ക്കുന്നത്. യു.പിയില്‍ 41 സീറ്റുകളിലാണ് ഇന്ത്യ സഖ്യം മുന്നിട്ടുനില്‍ക്കുന്നത്.

കേരളത്തില്‍ 16 സീറ്റുകളില്‍ യു.ഡി.എഫ് ആണ് ലീഡ് ചെയ്യുന്നത്. തിരുവനന്തപുരത്തും തൃശൂരും ബി.ജെ.പി ലീഡ് ചെയ്യുന്നു. മൂന്നിടത്ത് എല്‍.ഡി.എഫ് ആണ് ലീഡ് ചെയ്യുന്നത്. ദേശീയതലത്തില്‍ 255 സീറ്റില്‍ എന്‍.ഡി.എയും 237 സീറ്റില്‍ ഇന്ത്യ സഖ്യവുമാണ് മുന്നിട്ടുനില്‍ക്കുന്നത്.