പയ്യന്നൂരില് രണ്ട് മക്കളടക്കം കുടുബത്തിലെ നാല് പേര് മരിച്ച നിലയില്. ദമ്പതികള് തമ്മിലുള്ള തര്ക്കം രണ്ട് പിഞ്ചുകുഞ്ഞുങ്ങളുടെ കൊലപാതകത്തിലും രണ്ട് പേരുടെ ആത്മഹത്യയിലും കലാശിച്ചെ്നാണ് പ്രാഥമിക നിഗമനം. രാമന്തളി കൊയിത്തട്ട താഴത്തെ വീട്ടില് ഉഷ (56), മകന് പാചകത്തൊഴിലാളി കലാധരന് (36), കലാധരന്റെ മക്കളായ ഹിമ (ആറ്), കണ്ണന് (രണ്ട്) എന്നിവരാണ് മരിച്ചത്.
ഇന്നലെ രാത്രി ഒമ്പതോടെയാണ് ഇവരെ വീട്ടിനുള്ളില് മരിച്ചനിലയില് കണ്ടെത്തിയത്. മക്കള്ക്ക് വിഷം നല്കി കൊലപ്പെടുത്തിയശേഷം കലാധരനും അമ്മ ഉഷയും തൂങ്ങിമരിച്ചതായാണ് സംശയിക്കുന്നത്. കുടുംബപ്രശ്നമാണ് മരണത്തിന് കാരണമെന്നാണ് പ്രാഥമിക വിലയിരുത്തല്. കലാധരനും ഭാര്യ നയന്താരയും തമ്മില് കുടുംബ കോടതിയില് കേസ് നിലനില്ക്കുന്നുണ്ട്. കഴിഞ്ഞ ദിവസം കലാധരന്റെ കൂടെ താമസിക്കുന്ന രണ്ടുമക്കളെയും അമ്മക്കൊപ്പം പോകാന് കോടതി വിധിച്ചിരുന്നു. തുടര്ന്ന് കലാധരന്റെ ഭാര്യ നിരന്തരം മക്കളെ ആവശ്യപ്പെട്ട് വിളിച്ചിരുന്നതായി ബന്ധുക്കള് പറഞ്ഞു.
ഇന്നലെ രാത്രി ഉഷയുടെ ഭര്ത്താവ് ഉണ്ണികൃഷ്ണന് വീട്ടിലെത്തിയപ്പോള് വീട് അടച്ചനിലയിലായിരുന്നു. വീട്ടിനു മുന്നില് കത്ത് എഴുതിവെച്ചതായും കണ്ടു. തുടര്ന്ന് കത്തുമായി പൊലീസ് സ്റ്റേഷനില് എത്തുകയായിരുന്നു. ഉടന് പൊലീസെത്തി വീട് തുറന്ന് നോക്കിയപ്പോഴാണ് കിടപ്പുമുറിയില് ഉഷയെയും കലാധരനെയും തൂങ്ങിമരിച്ച നിലയിലും രണ്ടുമക്കള് നിലത്ത് മരിച്ചുകിടക്കുന്ന നിലയിലും കണ്ടെത്തിയത്.
പയ്യന്നൂര് ഡിവൈ.എസ്.പി കെ. വിനോദ് കുമാറിന്റെ നേതൃത്വത്തില് എത്തിയ പൊലീസ്, നടപടി പൂര്ത്തിയാക്കി മൃതദേഹങ്ങള് കണ്ണൂര് ഗവ. മെഡിക്കല് കോളജ് മോര്ച്ചറിയിലേക്ക് മാറ്റി.