സന്തോഷ് ട്രോഫി ഫുട്ബോള് ഫൈനലില് കേരളത്തിന് വീണ്ടും നിരാശ. ആവേശകരമായ പോരാട്ടത്തിനൊടുവില് ഏകപക്ഷീയമായ ഒരു ഗോളിന് കേരളത്തെ തോല്പ്പിച്ച് സര്വീസസ് എട്ടാം തവണയും കിരീടമുയര്ത്തി. അധികസമയത്തിന്റെ 109-ാം മിനിറ്റില് അഭിഷേക് പവാര് നേടിയ ഗോളാണ് സര്വീസസ് വിജയത്തിലേക്കെത്താന് കാരണം.
നിശ്ചിത സമയത്ത് ഇരുടീമുകള്ക്കും ഗോള് നേടാനാകാത്തതിനെ തുടര്ന്നാണ് മത്സരം അധികസമയത്തേക്ക് നീട്ടിയത്. 109-ാം മിനിറ്റില് കേരള ഗോള്കീപ്പര് തട്ടിയകറ്റിയ പന്ത് പിടിച്ചെടുത്ത് അഭിഷേക് പവാര് വലകുലുക്കുകയായിരുന്നു. ഗ്രൂപ്പ് ഘട്ടത്തിലും അഭിഷേക് കേരളത്തിനെതിരെ ഗോള് നേടിയിരുന്നു.
മത്സരത്തിലുടനീളം കേരളം മുന്നിട്ടുനിന്നെങ്കിലും ഫിനിഷിംഗിലെ പോരായ്മ വിനയായി. 27-ാം മിനിറ്റില് അര്ജുന്റെ ഷോട്ട് പോസ്റ്റില് തട്ടിത്തെറിച്ചതും വിഘ്നേഷിന്റെ ഗോളെന്നുറച്ച നീക്കങ്ങള് സര്വീസസ് ഗോള്കീപ്പര് ഗഗന്ദീപ് തടഞ്ഞതും കേരളത്തിന് തിരിച്ചടിയാവുകയായിരുന്നു.
കഴിഞ്ഞ വര്ഷം ബംഗാളിനോട് ഫൈനലില് തോറ്റ കേരളത്തിന് ഇത് തുടര്ച്ചയായ രണ്ടാം ഫൈനല് തോല്വിയാണ്.