ന്യൂഡല്‍ഹി: രാജ്യത്തെ പ്രമുഖ ക്ഷീരോത്പാദക ബ്രാന്‍ഡുകളുടെ ഉല്‍പ്പന്നങ്ങള്‍ ഗുണനിലവാര പരിശോധനയില്‍ പരാജയപ്പെട്ടതായി റിപ്പോര്‍ട്ട് പുറത്തുവന്നു. ‘ടേസ്റ്റ് ഓഫ് ഇന്ത്യ’ എന്ന അവകാശവാദത്തോടെ വിപണിയില്‍ മുന്നില്‍ നില്‍ക്കുന്ന അമുല്‍ ഉള്‍പ്പെടെയുള്ള ബ്രാന്‍ഡുകളുടെ വിവിധ ഉല്‍പ്പന്നങ്ങളില്‍ സുരക്ഷിത പരിധിയേക്കാള്‍ ഉയര്‍ന്ന അളവില്‍ ബാക്ടീരിയ കണ്ടെത്തി.

ഫുഡ് സേഫ്റ്റി ആന്‍ഡ് സ്റ്റാന്‍ഡേര്‍ഡ്‌സ് അതോറിറ്റി ഓഫ് ഇന്ത്യ (FSSAI) നിശ്ചയിച്ച പരിധിയേക്കാള്‍ കൂടുതലായ കോളിഫോം ബാക്ടീരിയ അമുല്‍ പാലില്‍ കണ്ടെത്തിയതായി റിപ്പോര്‍ട്ടില്‍ പറയുന്നു. അമുല്‍ താസ, അമുല്‍ ഗോള്‍ഡ് എന്നിവയിലും ബാക്ടീരിയ സാന്നിധ്യം കണ്ടെത്തി. കൂടാതെ അമുല്‍ തൈരില്‍ സുരക്ഷാ മാനദണ്ഡങ്ങളെ അപേക്ഷിച്ച് 2,100 മടങ്ങ് കൂടുതലായ കോളിഫോം ബാക്ടീരിയയും, 60 മടങ്ങ് കൂടുതലായ യീസ്റ്റും പൂപ്പലും കണ്ടെത്തിയതായും റിപ്പോര്‍ട്ടുണ്ട്.

എന്നാല്‍, ഈ കണ്ടെത്തലുകള്‍ തള്ളിക്കളഞ്ഞ അമുല്‍, തങ്ങളുടെ എല്ലാ ഉല്‍പ്പന്നങ്ങളും നിര്‍ദ്ദിഷ്ട സുരക്ഷാ മാനദണ്ഡങ്ങള്‍ പാലിക്കുന്നുണ്ടെന്നും ആരോപണങ്ങള്‍ അടിസ്ഥാനരഹിതമാണെന്നും വ്യക്തമാക്കി.

അമുലിന് പുറമെ മദര്‍ ഡയറി, കണ്‍ട്രി ഡിലൈറ്റ് എന്നീ ബ്രാന്‍ഡുകളും പരിശോധനയില്‍ പരാജയപ്പെട്ടതായി റിപ്പോര്‍ട്ടില്‍ പറയുന്നു. പാലിലെ ബാക്ടീരിയയുടെ ആകെ അളവ് അളക്കുന്ന ടോട്ടല്‍ പ്ലേറ്റ് കൗണ്ട് (TPC) പരിശോധനയിലാണ് മദര്‍ ഡയറി പരാജയപ്പെട്ടത്. കൃഷിയിടങ്ങളില്‍ നിന്ന് നേരിട്ട് ഉപഭോക്താക്കളിലേക്ക് ഉല്‍പ്പന്നങ്ങള്‍ എത്തിക്കുന്നതായി അവകാശപ്പെടുന്ന കണ്‍ട്രി ഡിലൈറ്റിന്റെ സാമ്പിളുകളിലും അനുവദനീയ പരിധിയേക്കാള്‍ കൂടുതലായ ബാക്ടീരിയ കണ്ടെത്തി.

പാലുല്‍പ്പന്നങ്ങള്‍ക്ക് പുറമേ, പ്രോട്ടീന്‍ സപ്ലിമെന്റായി ഉപയോഗിക്കുന്ന എഗ്ഗോസ് ന്യൂട്രീഷന്‍ കമ്പനിയുടെ മുട്ടകളും ഗുണനിലവാര പരിശോധനയില്‍ പരാജയപ്പെട്ടതായി കണ്ടെത്തി. ട്രസ്റ്റിഫൈഡ് നടത്തിയ പരിശോധനയില്‍ ഇവയുടെ മുട്ടകളില്‍ പല രാജ്യങ്ങളിലും നിരോധിച്ച അമിനോ ഓക്‌സസോളിന്‍ എന്ന രാസവസ്തുവിന്റെ സാന്നിധ്യം കണ്ടെത്തിയതായാണ് റിപ്പോര്‍ട്ട്.

ചെറിയ കുട്ടികള്‍ മുതല്‍ മുതിര്‍ന്നവര്‍ വരെ ദിവസേന ഉപയോഗിക്കുന്ന പാലും മുട്ടയും ഗുണനിലവാര മാനദണ്ഡങ്ങള്‍ പാലിക്കാത്തതായാല്‍ ഗുരുതര ആരോഗ്യപ്രശ്‌നങ്ങള്‍ക്ക് ഇടയാക്കാമെന്ന് വിദഗ്ധര്‍ മുന്നറിയിപ്പ് നല്‍കുന്നു. പ്രമുഖ ബ്രാന്‍ഡുകള്‍ തന്നെ സുരക്ഷാ പരിശോധനയില്‍ വീഴ്ച വരുത്തിയെന്ന റിപ്പോര്‍ട്ട് ഉപഭോക്താക്കളില്‍ ആശങ്ക വര്‍ധിപ്പിച്ചിരിക്കുകയാണ്.

തൃശൂര്‍: പാടശേഖരങ്ങളിലേക്ക് ആവശ്യമായ വെള്ളം ലഭിക്കാതായതോടെ ജില്ലയിലെ നെല്‍കര്‍ഷകര്‍ ഗുരുതര പ്രതിസന്ധിയില്‍. അരിമ്പൂര്‍, കൊടയാട്ടി, അന്തിക്കാട് മേഖലകളിലെ പാടശേഖരങ്ങളിലാണ് ജലക്ഷാമം രൂക്ഷമായത്. വെള്ളം ലഭിക്കാത്തതിനെ തുടര്‍ന്ന് നെല്‍ചെടികള്‍ കരിഞ്ഞ് ഉണങ്ങുന്ന നിലയിലേക്കെത്തിയതോടെ കര്‍ഷകര്‍ ആശങ്കയിലാണ്.

തൃശൂരിലെ പ്രധാന പാടശേഖരങ്ങളിലേക്ക് ഒഴുകിയെത്തുന്ന വെള്ളം തടയണ നിര്‍മാണത്തിന്റെ പേരില്‍ ഇറിഗേഷന്‍ വകുപ്പ് തടഞ്ഞതാണ് പ്രതിസന്ധിക്ക് കാരണമെന്നാണ് കര്‍ഷകരുടെ ആരോപണം. ഇതോടെ രണ്ടാഴ്ചയോളം പാടശേഖരങ്ങളിലേക്ക് വെള്ളം ലഭിക്കാതെ കൃഷി നാശത്തിന്റെ വക്കിലെത്തി. പ്രതിഷേധത്തെ തുടര്‍ന്ന് കൃഷി വകുപ്പ് ഇടപെട്ടെങ്കിലും പ്രശ്‌നത്തിന് പൂര്‍ണപരിഹാരം ഉണ്ടായിട്ടില്ലെന്ന് കര്‍ഷകര്‍ പറയുന്നു.

പ്രതിഷേധത്തിന് പിന്നാലെ ഭാഗികമായി വെള്ളം ലഭിച്ചെങ്കിലും അത് മതിയായതല്ലെന്നും കര്‍ഷകര്‍ പരാതിപ്പെടുന്നു. അരിമ്പൂര്‍ പഞ്ചായത്തിലെ വിളക്കുമാടം തോട്ടുപുര, കൊടയാട്ടി, അന്തിക്കാട് എന്നിവിടങ്ങളിലായി 2400 ഏക്കറിലധികം സ്ഥലത്താണ് നെല്‍കൃഷി നടക്കുന്നത്. ഏകദേശം 80 ദിവസം പ്രായമായ നെല്‍ചെടികള്‍ക്ക് വിളവെടുപ്പിന് ഇനിയും സമയം ആവശ്യമായതിനാല്‍ വെള്ളം ലഭിക്കാത്തത് വലിയ നഷ്ടത്തിലേക്കാണ് നയിക്കുന്നത്.

ഇതിനിടെ പാടശേഖരങ്ങളിലെ വെള്ളം താറാവ് കര്‍ഷകര്‍ കൂടുതലായി ഉപയോഗിക്കുന്നതും പ്രതിസന്ധി രൂക്ഷമാക്കുന്നതായി നെല്‍കര്‍ഷകര്‍ ആരോപിക്കുന്നു. നെല്‍കൃഷിക്ക് തടസ്സമാകുന്ന രീതിയില്‍ വെള്ളം ഉപയോഗിക്കരുതെന്ന നിര്‍ദ്ദേശങ്ങള്‍ ഉണ്ടായിട്ടും ഇത് പാലിക്കപ്പെടുന്നില്ലെന്നാണ് പരാതി.

മേഖലയില്‍ നെല്‍കൃഷിയോടൊപ്പം താറാവ് കൃഷിയും വ്യാപകമായതിനാല്‍ എല്ലാവര്‍ക്കും ആവശ്യമായ ജലലഭ്യത ഉറപ്പാക്കാന്‍ ബന്ധപ്പെട്ട വകുപ്പുകള്‍ അടിയന്തരമായി ഇടപെടണമെന്ന് കര്‍ഷകര്‍ ആവശ്യപ്പെട്ടു. വരാനിരിക്കുന്ന വേനല്‍ക്കാലം മുന്നില്‍ക്കണ്ട് സ്ഥിരപരിഹാരം ഉണ്ടാക്കണമെന്നും കര്‍ഷകര്‍ മുന്നറിയിപ്പ് നല്‍കി.

തിരുവനന്തപുരം: ആറ്റുകാല്‍ ക്ഷേത്രം കേന്ദ്രീകരിച്ച് മാര്‍ച്ച് 3ന് നടക്കുന്ന പൊങ്കാല മഹോത്സവത്തോടനുബന്ധിച്ച് ഭക്തര്‍ക്കായി വിപുലമായ ഗതാഗത ക്രമീകരണങ്ങളുമായി കെഎസ്ആര്‍ടിസി. പതിവുപോലെ നിവേദ്യത്തിനു ശേഷം നഗരത്തിന്റെ വിവിധ ഭാഗങ്ങളിലേക്ക് യാത്രാ സൗകര്യം ഉറപ്പാക്കുന്നതിനായി ബസുകള്‍ മുന്‍കൂട്ടി ലൈന്‍ അപ്പ് ചെയ്ത് പാര്‍ക്ക് ചെയ്യുന്നതിന് തീരുമാനമായി. അധിക സര്‍വീസുകളുടെ റൂട്ടുകള്‍ ഉടന്‍ പ്രഖ്യാപിക്കും.

പൊങ്കാല നിവേദ്യത്തിനു രണ്ട് മണിക്കൂര്‍ മുന്‍പ് മുതല്‍ നിര്‍ദ്ദിഷ്ട സ്ഥലങ്ങളില്‍ ബസുകള്‍ പാര്‍ക്ക് ചെയ്ത് യാത്രക്കാരെ കയറ്റുന്നതിനുള്ള സൗകര്യം ഒരുക്കും. വികാസ് ഭവന്‍, ഗവ. ലോ കോളേജ്, ബാര്‍ട്ടണ്‍ഹില്‍ സ്‌കൂള്‍ ഗ്രൗണ്ട്, പാറ്റൂര്‍, വഞ്ചിയൂര്‍, ഉപ്പിടാംമൂട് പാലം, ഫോര്‍ട്ട് സ്‌കൂള്‍, എസ്.പി ഫോര്‍ട്ട് ആശുപത്രി, വാഴപ്പള്ളി ജംഗ്ഷന്‍, അട്ടക്കുളങ്ങര, കിഴക്കേകോട്ട, പഴവങ്ങാടി ഓവര്‍ബ്രിഡ്ജ് എന്നിവിടങ്ങളില്‍ ബസുകള്‍ ലൈന്‍ അപ്പ് ചെയ്യും. പൊങ്കാലയ്ക്ക് ശേഷം ഈസ്റ്റ് ഫോര്‍ട്ട് നോര്‍ത്ത് സ്റ്റാന്‍ഡില്‍ നിന്ന് സര്‍വീസ് നടത്തും. വികാസ് ഭവന്‍, ഫോര്‍ട്ട് സ്‌കൂള്‍, കിഴക്കേകോട്ട എന്നിവിടങ്ങളില്‍ പ്രത്യേക സ്റ്റേഷന്‍ മാസ്റ്റര്‍ ഓഫീസുകളും പ്രവര്‍ത്തിക്കും.

നെയ്യാറ്റിന്‍കര, നേമം ഭാഗങ്ങളിലേക്ക് പോകുന്ന ബസുകള്‍ കരമന പി.ആര്‍.എസ് ആശുപത്രി കിള്ളിപ്പാലം വഴി റൗണ്ട് കറങ്ങി പാര്‍ക്ക് ചെയ്ത് യാത്രക്കാരെ കയറ്റും. കരമന, പാപ്പനംകോട് എന്നിവിടങ്ങളില്‍ ഇതിനായി പ്രത്യേക ഓഫീസുകള്‍ പ്രവര്‍ത്തിക്കും. നെയ്യാറ്റിന്‍കര, നേമം ഭാഗങ്ങളില്‍ നിന്നുള്ള ഏകദേശം 15 ബസുകള്‍ കൈമനം, കരുമം റോഡ് വഴി കാലടി സ്‌കൂള്‍ മുതല്‍ മരുതൂര്‍ക്കടവ് പാലം വരെ ലൈന്‍ അപ്പ് ചെയ്ത് സര്‍വീസ് നടത്തും. മരുതൂര്‍ക്കടവിലും സ്റ്റേഷന്‍ മാസ്റ്റര്‍ ഓഫീസ് ഉണ്ടായിരിക്കും.

മലയിന്‍കീഴ്, കാട്ടാക്കട ഭാഗങ്ങളിലേക്ക് പോകുന്ന ബസുകള്‍ ബേക്കറി ജംഗ്ഷനില്‍ പാര്‍ക്ക് ചെയ്ത് യാത്രക്കാരെ കയറ്റും. വിഴിഞ്ഞം, തിരുവല്ലം ഭാഗങ്ങളിലേക്ക് പോകുന്ന ബസുകള്‍ ബൈപ്പാസ് പരുത്തിക്കുഴി വഴി സര്‍വീസ് റോഡ് കടന്ന് ആര്യന്‍കുഴി റോഡിലൂടെ കമലേശ്വരം സ്‌കൂളിന് സമീപം ലൈന്‍ അപ്പ് ചെയ്ത് അമ്പലത്തറ, തിരുവല്ലം, വിഴിഞ്ഞം ഭാഗങ്ങളിലേക്ക് വണ്‍വേയായി സര്‍വീസ് നടത്തും. കമലേശ്വരം സ്‌കൂളിലും സ്റ്റേഷന്‍ മാസ്റ്റര്‍ ഓഫീസ് പ്രവര്‍ത്തിക്കും.

തിരുവനന്തപുരം സെന്‍ട്രല്‍ ബസ് സ്റ്റാന്‍ഡില്‍ നിന്ന് ദീര്‍ഘദൂര സര്‍വീസുകള്‍ മുന്‍വര്‍ഷങ്ങളിലേതുപോലെ ക്രമീകരിക്കും. ഹ്രസ്വദൂര ഫാസ്റ്റ് പാസഞ്ചര്‍ സര്‍വീസുകള്‍ പാളയം ജംഗ്ഷന്‍ മുതല്‍ പനവിള ജംഗ്ഷന്‍ വരെ ലൈന്‍ അപ്പ് ചെയ്യും. തിരക്ക് അനുസരിച്ച് പനവിളയില്‍ നിന്ന് തിരുവനന്തപുരം സെന്‍ട്രല്‍ യൂണിറ്റിലേക്ക് ബസുകള്‍ എത്തിച്ച് സര്‍വീസ് നടത്തും. മോഡല്‍ സ്‌കൂള്‍ ജംഗ്ഷന്‍, തമ്പാനൂര്‍ ബസ് സ്റ്റാന്‍ഡ് എന്നിവിടങ്ങളിലും പ്രത്യേക ഓഫീസുകള്‍ പ്രവര്‍ത്തിക്കും.

സ്റ്റാച്യുവില്‍ നിന്ന് കിഴക്കേകോട്ടയിലേക്ക് വരുന്ന ബസുകള്‍ എസ്.എം.വി സ്‌കൂള്‍ വരെ പാര്‍ക്ക് ചെയ്ത് പിന്നീട് യാത്രക്കാരെ കയറ്റി സര്‍വീസ് നടത്തും. ഭക്തരെ തിരികെ കൊണ്ടുപോകുന്നതിനായി നിശ്ചയിച്ച ഏഴ് പാര്‍ക്കിംഗ് കേന്ദ്രങ്ങളില്‍ സ്വകാര്യ വാഹനങ്ങള്‍ പാര്‍ക്ക് ചെയ്യുന്നത് കര്‍ശനമായി നിരോധിച്ചിട്ടുണ്ട്.

ഉത്സവം ആരംഭിക്കുന്ന ഫെബ്രുവരി 23 മുതല്‍ ഉത്സവം അവസാനിക്കുന്നതുവരെ ക്ഷേത്ര പരിസരത്ത് കെഎസ്ആര്‍ടിസിക്കായി പ്രത്യേകമായി അനുവദിച്ച സ്ഥലങ്ങളില്‍ മറ്റ് വാഹനങ്ങള്‍ പാര്‍ക്ക് ചെയ്യുന്നത് വിലക്കിയിട്ടുണ്ട്. കൂടാതെ, ക്ഷേത്രനടയില്‍ പ്രത്യേക സ്റ്റേഷന്‍ മാസ്റ്റര്‍ ഓഫീസ് ഉത്സവകാലയളവില്‍ പ്രവര്‍ത്തിക്കും.