ബിജെപി ലോകസഭാ സ്ഥാനാര്‍ത്ഥിയും നടനുമായ സുരേഷ് ഗോപി ക്ഷണിച്ച പരിപാടിയില്‍ നൃത്തം ചെയ്യാന്‍ കഴിയില്ലെന്ന് ആര്‍എല്‍വി രാമകൃഷ്ണന്‍. മറ്റ് പരിപാടികള്‍ ഉള്ളതിനാലാണ് അന്നേ ദിവസം അവിടെയെത്താന്‍ കഴിയാത്തതെന്നും അദ്ദേഹം മാധ്യമങ്ങളോട് പ്രതികരിച്ചു.
‘സുരേഷ് ഗോപി ക്ഷണിച്ച നൃത്ത പരിപാടിയില്‍ പങ്കെടുക്കില്ല. അന്ന് മറ്റു പരിപാടികള്‍ ഉണ്ട്. പക്ഷേ ഇത്തരമൊരു സാഹചര്യത്തിലെങ്കിലും സിനിമയില്‍ നിന്നൊരാള്‍ വിളിച്ചതില്‍ സന്തോഷമുണ്ട്. ഏട്ടന്‍ പോയി എട്ടു വര്‍ഷം കഴിഞ്ഞാണ് സിനിമയില്‍ നിന്ന് ഒരു വിളി വരുന്നത്. കക്ഷി രാഷ്ട്രീയം ഇതില്‍ ഇല്ല.’- ആര്‍ എല്‍ വി രാമകൃഷ്ണന്‍ പറഞ്ഞു
കറുത്ത നിറത്തോടുള്ള നിഷേധമനോഭാവം ജീര്‍ണിച്ച സമൂഹബോധമാണ്. അതിനോട് പൊറുക്കാന്‍ പറ്റില്ല. വ്യക്തിപരമായി അധിക്ഷേപിച്ചതിന് നിയമ നടപടികള്‍ സ്വീകരിച്ചിട്ടുണ്ട്. സത്യഭാമയുടെ ഭാഗത്തു നിന്ന് ഒരു മാപ്പ് പ്രതീഷിക്കുന്നില്ല.
ഒരു വ്യക്തി എന്നതിനപ്പുറം കലാകാരന്‍ എന്ന നിലയില്‍ ഇത്തരം വിവേചനം എതിര്‍ക്കാനാണ് പ്രതിഷേധിക്കുന്നത്. സമൂഹത്തില്‍ ഇതുപോലുള്ള ദുരാചാരങ്ങള്‍ വീണ്ടും കൊണ്ടുവരാന്‍ പാടില്ല എന്ന സന്ദേശം കൂടി പകരാനാണ് വേദികളില്‍ എത്തുന്നത് എന്നും ആര്‍ എല്‍ വി രാമകൃഷ്ണന്‍ പറഞ്ഞു.
കൊല്ലത്തെ കുടുംബ ക്ഷേത്രത്തിലെ ചിറപ്പ് മഹോത്സവത്തില്‍ രാമകൃഷ്ണനെ പരിപാടിക്കായി ക്ഷണിക്കുമെന്നും പ്രതിഫലം നല്‍കിത്തന്നെയാണ് വിളിക്കുന്നത് എന്നുമായിരുന്നു സുരേഷ് ഗോപി പറഞ്ഞത്.