സ്കൂള് കുട്ടികള്ക്കുള്ള എല്എസ്എസ്, യുഎസ്എസ് സ്കോളര്ഷിപ്പ് പരീക്ഷകളില് സമഗ്രമായ പരിഷ്കാരം നടപ്പാക്കുന്നു. പരീക്ഷകള്ക്ക് ഇനി ‘സിഎം കിഡ്സ് സ്കോളര്ഷിപ്പ്’ എന്ന പുതിയ പേരായിരിക്കും. പേരുമാറ്റത്തിനൊപ്പം പരീക്ഷാ സംവിധാനത്തിലും മൂല്യനിര്ണയ രീതിയിലും അടിമുടി മാറ്റങ്ങളാണ് പൊതുവിദ്യാഭ്യാസ വകുപ്പ് കൊണ്ടുവന്നിരിക്കുന്നത്.
മുന്കാലങ്ങളില് പരീക്ഷകളുടെ സമയക്രമം തെറ്റുന്നത് ഒഴിവാക്കുന്നതിനായി നിശ്ചിത അക്കാദമിക് കലണ്ടര് അനുസരിച്ചായിരിക്കും ഇനി പരീക്ഷകള് നടത്തുക. ഇതിന്റെ ഭാഗമായി ജനുവരി 31 വരെയുള്ള സ്കൂള് പാഠ്യപദ്ധതി ഉള്ളടക്കങ്ങള് മാത്രമായിരിക്കും പരീക്ഷാ ചോദ്യങ്ങളില് ഉള്പ്പെടുത്തുക.
നിലവിലെ രീതിയില് എല്എസ്എസ് പരീക്ഷയില് 60 ശതമാനവും യുഎസ്എസില് 70 ശതമാനവും മാര്ക്ക് ലഭിച്ചാല് സ്കോളര്ഷിപ്പ് ലഭിക്കുന്ന സംവിധാനമാണ് നിലനിന്നിരുന്നത്. എന്നാല്, ഇതുമൂലം ഓരോ വര്ഷവും സ്കോളര്ഷിപ്പ് ജേതാക്കളുടെ എണ്ണത്തില് വലിയ വ്യത്യാസം സംഭവിക്കുന്നതായി കണ്ടെത്തിയതോടെയാണ് ഈ രീതി അശാസ്ത്രീയമെന്ന് വിലയിരുത്തിയത്. അതിനാല് ഇനി മുന്കൂട്ടി നിശ്ചിത ശതമാനം പ്രഖ്യാപിക്കില്ല.
പുതിയ പരിഷ്കാരത്തിന്റെ ഭാഗമായി സ്കോളര്ഷിപ്പ് ലഭിക്കാന് കട്ട് ഓഫ് മാര്ക്ക് സംവിധാനം നടപ്പാക്കും. ഓരോ വര്ഷവും മൂല്യനിര്ണയം പൂര്ത്തിയാക്കിയ ശേഷം പൊതുവിദ്യാഭ്യാസ ഡയറക്ടറുടെ അധ്യക്ഷതയിലുള്ള പരീക്ഷാബോര്ഡാണ് കട്ട് ഓഫ് നിശ്ചയിക്കുക. എല്എസ്എസ് പരീക്ഷയില് സംസ്ഥാനതലത്തില് സ്കോളര്ഷിപ്പ് ജേതാക്കളെ തിരഞ്ഞെടുക്കുന്ന രീതി ഒഴിവാക്കി, ഇനി ഉപജില്ലാതലത്തിലാണ് ജേതാക്കളെ നിശ്ചയിക്കുക. യുഎസ്എസ് പരീക്ഷയില് നിലവിലുള്ള ഒഎംആര് പരീക്ഷാരീതി തുടരും.
ഇരുവിധ സ്കോളര്ഷിപ്പ് പരീക്ഷകളിലും വരുത്തിയ പരിഷ്കാരങ്ങള് ഉള്പ്പെടുത്തി പൊതുവിദ്യാഭ്യാസ വകുപ്പ് തിങ്കളാഴ്ച വിജ്ഞാപനം പുറത്തിറക്കി. മാതൃകാ ചോദ്യപ്പേപ്പറും വിജ്ഞാപനത്തില് ഉള്പ്പെടുത്തിയിട്ടുണ്ട്. പരീക്ഷ ഫെബ്രുവരി 26നാണ് നടക്കുക. സ്കൂള്തലത്തിലുള്ള ഓണ്ലൈന് രജിസ്ട്രേഷന് ഈ മാസം 30 മുതല് ആരംഭിക്കും.