കൊച്ചി: യൂട്യൂബര്മാരുടെ സൈബര് ആക്രമണത്തിനെതിരെ സര്ക്കാരിനോട് സഹായം അഭ്യര്ത്ഥിച്ച നടി രേഖ രതീഷിനെ പരിഹസിച്ച് കലാമണ്ഡലം സത്യഭാമ. ഒരു കൂട്ടം യൂട്യൂബേഴ്സ് കാരണം കടുത്ത മാനസിക സമ്മര്ദത്തിലാണെന്നും തനിക്കെന്തെങ്കിലും സംഭവിച്ചാല് അതിനു കാരണം ഇവരായിരിക്കുമെന്നും രേഖ കഴിഞ്ഞ ദിവസം വീഡിയോയിലൂടെ വെളിപ്പെടുത്തിയിരുന്നു. കടുത്ത മാനസിക സമ്മര്ദ്ദത്തിലൂടെയാണ് താന് കടന്നുപോകുന്നതെന്ന് രേഖ രതീഷ് വീഡിയോയിലൂടെ വെളിപ്പെടുത്തി.
കഴിഞ്ഞ മൂന്ന് മാസമായി ഒരു കൂട്ടം യൂട്യൂബര്മാര് മോശം തലക്കെട്ടുകളോടെ തന്നെക്കുറിച്ച് വീഡിയോകള് ഇടുന്നുണ്ട്. കഴിഞ്ഞ ഒന്പത് മാസമായി ജോലിയില്ലാതെ ഫ്ലാറ്റില് കുട്ടിയോടൊപ്പം കഴിയുകയാണെന്നും ഈ സാഹചര്യത്തില് ഇത്തരം വ്യക്തിഹത്യകള് താങ്ങാന് കഴിയില്ലെന്നും താരം പറയുന്നു. ജീവിക്കാന് അനുവദിക്കാത്ത തരത്തിലുള്ള സൈബര് ആക്രമണങ്ങള്ക്കെതിരെ മുഖ്യമന്ത്രി നടപടി എടുക്കണമെന്നും, തനിക്ക് എന്തെങ്കിലും സംഭവിച്ചാല് അതിന്റെ ഉത്തരവാദിത്തം ഈ യൂട്യൂബര്മാരാണെന്നും രേഖ പറഞ്ഞു.
രേഖയുടെ വീഡിയോ പുറത്തുവന്നതിന് പിന്നാലെയാണ് കലാമണ്ഡലം സത്യഭാമ ഫേസ്ബുക്കിലൂടെ രൂക്ഷമായ ഭാഷയില് രംഗത്തുവന്നത്. ‘എന്തിനോ വേണ്ടി തിളയ്ക്കുന്ന സാമ്പാര്’ എന്ന തലക്കെട്ടോടെയാണ് സത്യഭാമ കുറിപ്പ് പങ്കിട്ടത്. പബ്ലിക് ഫിഗര് ആയതുകൊണ്ടാണ് ഇത്രയും ടെന്ഷന് അനുഭവപ്പെടുന്നതെന്നും, കുറച്ചുനാള് സോഷ്യല് മീഡിയ ഉപയോഗിക്കാതെ ഇരുന്നാല് എല്ലാം ശരിയാകുമെന്നും സത്യഭാമ പരിഹാസരൂപേണ പറയുന്നുണ്ട്.
സീരിയല് രംഗത്തെ നിരവധി പേര് ഇത്തരം യൂട്യൂബ് ചാനലുകള്ക്കെതിരെ നേരത്തെയും രംഗത്തെത്തിയിട്ടുണ്ട്.