കൊച്ചി: കൊച്ചിയില്‍ നിന്ന് ലക്ഷദ്വീപ് അഗത്തിയിലേക്കുള്ള അലയന്‍സ് വിമാനം തുടര്‍ച്ചയായ രണ്ടാം ദിവസവും റദ്ദാക്കി. ഇന്ന് ഉച്ചയ്ക്ക് 1 മണിക്ക് വിമാനം പുപ്പെടുമെന്ന് അറിയിച്ചെങ്കിലും യാത്രക്കാരെത്തിയപ്പോഴേക്കും റദ്ദാക്കിയതായി അറിയിക്കുകയായിരുന്നു.

ഇന്നലെ രാവിലെ 9.15 ന് പുറപ്പെടേണ്ടിയിരുന്ന വിമാനം സാങ്കേതിക കാരണങ്ങള്‍ പറഞ്ഞാണ് റദ്ദാക്കിയത്. അതേസമയം, യാത്രയ്ക്കായി ബദല്‍ സംവിധാനം ഏര്‍പ്പെടുത്തണമെന്ന് ആവശ്യപ്പെട്ട് നാല്‍പതോളം യാത്രക്കാര്‍ നെടുമ്പാശേരി വിമാനത്താവളത്തില്‍ ജീവനക്കാരുമായി തര്‍ക്കത്തിലാണ്. നിലവില്‍ പ്രശ്‌നപരിഹാരമായിട്ടില്ല.

തിരുവനന്തപുരം: വീടിനുള്ളില്‍ പ്രത്യേക സജ്ജീകരണങ്ങളോടെ കഞ്ചാവ് കൃഷി നടത്തിയ യുവാവിനെ പൊലീസ് അറസ്റ്റ് ചെയ്തു. വലിയതുറ സ്വദേശി ധനുഷ് ആണ് പിടിയിലായത്.

ഇന്റര്‍നെറ്റില്‍ നിന്നാണ് കഞ്ചാവ് കൃഷി ചെയ്യുന്നതിനുള്ള രീതികള്‍ സംബന്ധിച്ച വിവരങ്ങള്‍ ഇയാള്‍ ശേഖരിച്ചതെന്ന് പൊലീസ് അറിയിച്ചു. മുറിക്കുള്ളില്‍ കഞ്ചാവ് ചെടികള്‍ക്ക് ആവശ്യമായ ചൂടും കാറ്റും ലഭിക്കുന്നതിനായി ലൈറ്റുകളും ഫാനുകളും ഘടിപ്പിച്ചായിരുന്നു കൃഷി.

മുറിക്കുള്ളിലേക്ക് മറ്റാരെയും പ്രവേശിപ്പിക്കാത്ത വിധത്തില്‍ പ്രത്യേക നിയന്ത്രണം ഏര്‍പ്പെടുത്തിയിരുന്നു. ഷൂ റാക്ക് പൊളിച്ചാണ് കഞ്ചാവ് ചെടികള്‍ക്ക് മറ ഒരുക്കിയിരുന്നത്. ഒരു ഗ്രോബാഗിലും മറ്റൊരു ട്രേയിലുമായാണ് ചെടികള്‍ നട്ടിരുന്നത്. പൊലീസ് കണ്ടെത്തിയ ചെടികള്‍ക്ക് ഏകദേശം 20 ദിവസത്തെ വളര്‍ച്ചയുണ്ടായിരുന്നു.

അറസ്റ്റിലായ ധനുഷ് എംഡിഎഎസ് കേസില്‍ നേരത്തെ പ്രതിയാണെന്നും പൊലീസ് പറഞ്ഞു. വീട്ടില്‍ കഞ്ചാവ് വാങ്ങാനും മറ്റുമായി പുറത്തുനിന്ന് ആളുകള്‍ എത്തുന്നതിനെ കുറിച്ചുള്ള രഹസ്യവിവരത്തിന്റെ അടിസ്ഥാനത്തിലാണ് ഷാഡോ പൊലീസ് പരിശോധന നടത്തിയത്.

പരിശോധനയ്ക്ക് ഷാഡോ പൊലീസ് എസ്‌ഐ അജേഷ്, നസിമുദീന്‍, സജിത്, വരുണ്‍ ഘോഷ്, രഞ്ജിത് എന്നിവരാണ് സംഘത്തിലുണ്ടായിരുന്നത്.

കണ്ണൂര്‍: കണ്ണൂരില്‍ റീലെടുക്കാന്‍ റെഡ് ലൈറ്റ് അടിച്ച് ട്രെയിന്‍ നിര്‍ത്തിച്ചു. 2 പ്ലസ് ടു വിദ്യാര്‍ഥികള്‍ക്കെതിരെ കേസെടുത്ത് പോലീസ്. ഇന്ന് പുലര്‍ച്ചെ മാഹിക്കും തലശ്ശേരിക്കുമിടയിലെ കുയ്യാലിഗേറ്റ് എന്ന സ്ഥലത്ത് വെച്ചാണ് സംഭവം. എറണാകുളം – പൂനെ എക്‌സ്പ്രസാണ് നിര്‍ത്തിച്ചത്. 2 പേരെയും കണ്ണൂര്‍ റെയില്‍വേ പോലീസ് അറസ്റ്റ് ചെയ്ത് ജാമ്യത്തില്‍ വിട്ടു.

പാളത്തിനോട് ചേര്‍ന്ന് നിന്ന് ചുവന്ന നിറത്തിലുള്ള ലൈറ്റ് അടിച്ചതിനെ തുടര്‍ന്ന് ട്രെയിന്‍ അടിയന്തരമായി നിര്‍ത്തുകയായിരുന്നു. തുടര്‍ന്ന് ലോക്കോ പൈലറ്റ് ട്രെയിനില്‍ നിന്നിറങ്ങിവരികയും രണ്ട് മിനിറ്റോളം യാത്ര തടസ്സപ്പെടുകയും ചെയ്തു. റെയില്‍വേ ഗേറ്റ് ഉദ്യോഗസ്ഥന്‍ നല്‍കിയ മൊഴിയുടെ അടിസ്ഥാനത്തിലാണ് പൊലീസ് രണ്ടുപേര്‍ക്കെതിരെ കേസെടുത്തത്. ഇവരെ വിശദമായി ചോദ്യം ചെയ്തപ്പോഴാണ് റീല്‍ ചിത്രീകരണമായിരുന്നു ഉദ്ദേശമെന്ന് മനസ്സിലായത്. ഇരുവരെയും ജാമ്യത്തില്‍ വിട്ടു.